Isaaya 22

Eby'okuteisa Abayuda ahabw'obushema bwabo

1Ebi nabi yaahanwire aha ruhanga rw'okworekyerwamu.

Mbwenu obaire ota, n'abantu baawe boona?

Ka muri aha mitwe y'amaju,

2Iwe rurembo rwijwire oruyombo 'we,

Orujagaraire, orurikwesiima!

Abantu baawe abaitsirwe ka bataitsirwe na rurara,

Kandi ka batagwire ha rugamba!

3Abategyeki baawe boona bahungiire hamwe,

Baakwatwa bateerwaineho;

Abantu baawe, ahu bashangirwe hoona, baakwatwa.

N'obu baraabe babaire bahungiire hare.

4 # Yer 9:1. Nikyo ngiriire nti:

Muunyiheho amaisho.

Mundekye, ndire munonga,

Muteerusya kwenda kummara obusaasi,

Obu nyine ahabw'eihanga ryangye erinyagirwe.

5 # Isa 2:12. Ahakuba n'eizooba ery'okujagarara, eery'okuribatiirirwaho,

Ery'okushoberererwaho omu ruhanga rw'okworekyerwamu,

Erirugire ahari Mukama RUHANGA ow'amahe,

Ery'okusheenyeraho engo z'amabaare,

Kandi n'ery'okuboroogyeraho nibatakira ebibungo.

6Aba Elamu bahagatiire emitana,

Baija n'ebigaari n'abarikugyendera aha mbaraasi,

N'aba Kiiri baashohoza engabo.

7Empita zaawe ezirikukira oburungi ziijwire ebigaari,

N'abarikugyendera aha mbaraasi babambiire amarembo.

8 # 1 Bag 7:2; 10:17. Yaihaho ekyabaire kikingiire Yuda.

Ahari eryo izooba mukata amaisho aha by'okurwanisa by'omu nju y'ekibira, 9#2 Bus 32:5; Neh 3:16. Mwareeba emyanya y'omu rugo rw'orurembo rwa Daudi esheenyukire eri mingi; mwateeranira hamwe amaizi g'omu kiyanja kya ifo, 10mwabara amaju ga Yerusaalemu, mwagasheenya ahabw'okugumya orugo; 11#Isa 5:12; 2 Bag 20:20; 25:4; 2 Bus 32:3, 4. bwanyima amaizi g'omu kiyanja ekya ira mwagatimbira eiziba ahagati y'engo zombi. Kwonka timwaijuka owaakozire ebyo, n'obu kwakuba okweta aha Waateekateekire ira ku bibaho.

12Eryo izooba Mukama RUHANGA ow'amahe

Akeeta abantu ngu barire, baboroogye,

Bamwe enkomborora, kandi bajware ebiguniya.

13 # Isa 56:12; 1 Kor 15:32. Mbwenu reeba, n'okushemererwa, n'okunanuka,

N'okwita ente n'entaama,

N'okurya enyama n'okunywa viinyo,

Nimugira muti: Reka tweriire, twenywere,

ahakuba nyencakare turi ab'okufa.

14 # 1 Sam 3:14. MUKAMA ow'amahe yaanyeyoreka, nangambira omu kutu ati:

Buzimazima okutahikiirira oku timurikusaasirwa

Okuhitsya obu murifa;

Nikwo Mukama RUHANGA ow'amahe arikugira.

Shebuna okubingwa aha murimo, na Eliakimu okuza omu mwanya gwe

15 # Isa 36:3; 2 Bag 18:18, 26, 37; 19:2. Oku nikwo Mukama RUHANGA ow'amahe arikugamba naagira ati: Irooko oze ow'ogwo mubiiki, Shebuna, orikutegyeka eby'omuri nyaruju, omubuuze oti: 16#Mat 27:60. Nookora ki aha; kandi aha oineho oha, waaza kwetimbira aha ekituuro, iwe orikukyetimbira omu mwanya gw'ahaiguru, okeekorera aha'okutuura omu rukiri? 17Iwe mushaija w'amaani 'we, reeba, MUKAMA aryakujuguta n'amaani; aryakukwata, akuhamye, 18#Isa 36:9. akuzongoze, akurekyere nk'omupiira, akungaye omu nsi egarami; okwo niyo origwa, n'ebigaari byawe by'ekitiinisa niyo biriguma, iwe orikuhemura enju ya mukama waawe. 19Ndyakubinga omu murimo gwawe, ogarurwe ahansi orugye omu bukuru bwawe. 20#2 Bag 18:18. Eryo izooba ndyayeta omwiru wangye Eliakimu mwene Hilukia, 21mmujwekye ekanzu yaawe, mmuzirikye orukoba rwawe, n'obushoboorozi bwawe mbumuhe; kandi aryaba ishe w'abatuuzi ba Yerusaalemu, n'ab'enju ya Yuda. 22#Kush 3:7. Ekishumuruzo ky'enju ya Daudi ndyakita aha ibega rye. Niwe ariigura, hatagire waakinga, kandi arikinga, hatagire waigura. 23#Ezr 9:8; Mub 12:11. Ndyamuteererera omu mwanya guhamire nk'enkondo, abeere enju ya ishe ekitebe ky'ekitiinisa, 24bamuhanikyeho oburemeezi bwona obw'enju ya ishe, ab'enda ye n'oruzaaro rwe, ebintu byona ebikye, okwiha aha bikopo okuhika aha nnywero zoona. 25Kandi MUKAMA ow'amahe naagira ati: Eryo izooba egyo nkondo, eyaateerereirwe omu mwanya oguhamire, eryakuuka, etemwe, egwe; n'ebibaire bigihanikirweho biihweho; ahabw'okuba MUKAMA niwe akigambire.

Currently Selected:

Isaaya 22: RR64

Highlight

Copy

Compare