Isaaya 21

Eby'okugwa kwa Babulooni

1 # Zek 9:14. Ebi nabi yaahanwire aha ihamba ry'aha rubaju rw'enyanja.

Nk'akasooroora k'omuri Negebu oku kagyenda nikasingoorera,

Nikwo ebyahanwirwe ebyo biruga omu ihamba, omu nsi rikutiinisa.

2 # Isa 13:17; 24:16; 33:1. Nyorekirwe okworekwa kw'obusaasi;

Omunyagi naanyaga,

Omuhwerekyerezi naahwerekyereza.

Iwe Ealmu, hurura,

Naiwe Media, obagote.

amaganya goona agu yaareetsire ngamazireho.

3N'ahabw'ekyo nyine obusaasi bw'okuunyita;

Ninshaasha munonga nk'omukazi orikurumwa;

Obusaasi nibunzibira kuhurira,

N'okuhahaaza omutima nikunzibira kureeba.

4 # Bir 28:67. Obwengye bwampwamu, ebirikutiinisa byanyitsya obwoba,

Akairima aku nyetegyere kandugiramu okutetema.

5 # Yer 51:39. Abantu nibatebeekanisa gye emeeza,

Nibaara emikyeeka,

Nibarya kandi nibanywa.

Mwimukye, imwe banyiginya 'mwe,

Musiigye amajuta aha ngabo!

6Ahabw'okuba MUKAMA akangira ati:

Irooko, oteho omurinzi,

Agume agambe eki araareebe.

7Ku araareebe omutwe gw'abantu

Abarikugyendera aha mbaraasi babiri-babiri,

Abarikugyendera aha ndogoya n'aha ngamira,

Ahurire ataireho omutima,

Ataireho omutima munonga.

8 # Hab 2:1. Bwanyima owaareebire yaagamba munonga ati:

Ai MUKAMA, obutoosha nyomushana

Nyemerera aha munaara gw'abarinzi,

Kandi buri kiro nguma omu mwanya ogu ntairweho.

9 # Yer 50:2; 51:8; Kush 14:8; 18:2. Kandi reeba, nihaija omutwe gw'abantu

Abatembire embaraasi babiri-babiri!

Yaagarukamu ati:

Babulooni egwire! Babulooni egwire!

N'ebishushani bya baaruhanga baayo byona byahendagurika.

10 # Yer 51:33; Amo 1:3. Iwe muntu wangye 'we, ou mpirwe, nkaheheeza,

Ebi mpuriire MUKAMA ow'amahe, Ruhanga wa Israeli nangambira,

Nibyo ndikukugambira.

11 # Kut 36:8; Ezk 35:2. Ebi nabi yaahanwire ahari Duma.

Hariho orikuunyeta naayema Seiri, naagira ati:

Iwe murinzi 'we, ekiro kyahika hi!

Iwe murinzi 'we, ekiro kyahika hi?

12Omurinzi nawe yangarukamu ati:

Nibuza kusheesha, kandi kwira.

Ku muraabe nimwenda kwehanuuza, mwehanuuze;

Muhindukye, mwije.

13 # Kut 37:25. Ebi nabi yaahanwire ahari Buharabu.

Imwe emitwe y'Abadedani erikuhingura,

Muryaraara omu bishaka bya Buharabu.

14Imwe abatwire omu nsi ya Teema,

Nimureetere abaine eiriho amaizi,

Abarikucwa mubabuganise eby'okurya;

15Ahakuba bahungire zaarurara,

Zaarurara ezisyoirweyo,

Amata agareegire,

N'ahu orugamba ruhamire.

16 # Isa 60:7; Ezk 27:21. Ahakuba oku nikwo Mukama arikungambira naagira ati: Omwaka gutakahweireho, nk'emyaka y'orikukorera ebihembo oku eri, ekitiinisa kya Kedari kiryahwaho, 17#Isa 1:20. kandi n'abaritsigara aha barasi, abashaija rugambwa aba Kedari, baryaba mbarwa; ahabw'okuba MUKAMA Ruhanga wa Israeli niwe akigambire.

Currently Selected:

Isaaya 21: RR64

Highlight

Copy

Compare