Abaheburaayo 2

1Nikyo tushemerereire kuta omutima aha bi twahuriire, ngu tutahaba tukabirugaho. 2#Byak 7:38, 53. Mbwenu ekigambo ekyagambirwe baamaraika, ku kiraabe kyahamire, kandi n'okushiisha kwona n'okutahurira kwona ku biraabe byahairwe ekifubiro ekibishemereire, 3#Heb 12:25. itwe turyakira tuta, ku turiba tuteetaire ha kujunwa okukuru okurikwingana kuti? Okujunwa okwo kukabanza kugambwa Mukama, twakuhamizibwa abaamuhuriire; 4#Mak 16:18, 20. kandi na Ruhanga yaakuhamya n'obumanyiso n'eby'okutangaaza n'eby'amahano by'emiringo mingi n'ebiconco by'Omwoyo Orikwera, ebi Ruhanga yaagabire nk'oku yaasiimire.

5Ahakuba baamaraika ti bo Ruhanga yaahaire kutegyeka ensi eribaho, ei turikugambaho. 6#Zab 8:4-6. Kandi hariho owaahamize ahandi ati:

Omuntu ni kintu ki, Iwe kumwijuka,

Nari Omwana w'omuntu, Iwe kumwetaho?

7Omu mwanya mukye waamugarura ahansi okukira baamaraika,

Waamujweka ekirunga ky'ekitiinisa n'okuhimbisibwa,

Waamutegyekyesa emirimo y'emikono yaawe,

8 # 1 Kor 15:27. Waata ebintu byona ahansi y'ebigyere bye.

Ruhanga omu kumugomoorera byona taine ki yaatsigire kitari mu butegyeki bwe. Mbwenu hati titurikureeba bintu byona bimugomookyeire. 9#Fil 2:8, 9. Kureka owaagarwirwe ahansi omwanya mukye okukira baamaraika, niwe Yesu, nitumureeba ajwekirwe ekirunga ky'ekitiinisa n'okuhimbisibwa ahabw'okwemera obusaasi bw'okufa, ngu aroze aha kufa omu mwanya gw'abantu boona ahabw'embabazi za Ruhanga.

10Ahakuba Ruhanga, Omuhangi wa byona, ou ebintu byona byahangiirwe, ku yaayenzire kutaasya abaana baingi omu kitiinisa, kikamushemerera kuhindura Omwebembezi w'okujunwa kwabo kuba ohikire ahabw'obusaasi. 11#Mak 3:34, 35. Ahakuba Orikweza n'abarikwezibwa boona bakakomooka ahari Omwe. Nikyo atakwatirwa nshoni kubeeta beene Ishe, 12#Zab 22:22. naagira ati:

Ndyagamba eiziina ryawe omuri beene Tata,

Ndyayeshongora eby'okukuhimbisa omu kanisa.

13 # Isa 8:18. Kandi ahandi ati: Ndyamwesiga. Kandi ahandi ati: Reeba ndi aha n'abaana abu Ruhanga yampaire.

14 # 2 Tim 1:10; Kush 12:10. N'ahabw'ekyo nk'oku abaana baine omubiri n'eshagama, nikwo nawe yaabigizire, ngu ahabw'okufa kwe ahindure busha ogwo oine obushoboorozi bwa rufu, niwe Sitaane, 15kandi ajune boona abatuura omu buhuuku ebiro byona eby'amagara gaabo ahabw'okutiina okufa. 16#Isa 41:8. Ahakuba nitumanyira kimwe ngu baamaraika tibo ahwera, kureka baijukuru ba Abrahamu. 17#Fil 2:7. N'ahabw'ekyo kikamushemerera kushushanisibwa na beene Ishe omuri byona, ngu abone kuba Omunyamurwa omukuru ow'embabazi kandi ow'ekwesigwa omu murimo gwa Ruhanga, ahongyerere ebibi by'abantu; 18#Heb 4:15. ahabw'okuba We, nk'oku yaabonabonesiibwe atyo, kandi akoohibwa, naabaasa kuhwera abarikwohibwa.

Currently Selected:

Abaheburaayo 2: RR64

Highlight

Copy

Compare