Omubuurizi 9

Ababi n'abarungi okuhikwaho ebirikushushana

1 # Bir 33:3. Ebyo byona nkabita aha mutima, naabyetegyereza, abahikiriire n'abanyabwengye n'ebi bakora oku biri omu mikono ya Ruhanga; yaaba biruga ahari rukundo, nari ahari rwango, tihaine orikukimanya. Byona biri aho omu maisho gaabo. 2#Mub 2:14; Yob 9:22; Zek 5:3. Byona bihika ahari boona omu muringo gumwe, ahari ohikiriire n'ahari otahikiriire, aha murungi n'aha mubi, ahari oshemeire n'ahari otashemeire, aha mutambi w'ebitambo n'aha muntu otabitamba. Oku omurungi aba, nikwo n'omusiisi aba; arahira ni nk'otarahira. 3Obwo n'obubi obuba omuri byona ebikorwa ahansi y'eizooba, abantu boona kuhikwaho omuheru gumwe; ekindi, emitima y'abantu eijwire ebibi, kandi n'omu mitima yaabo habamu eiraro bakiriho; bwanyima y'ebyo bakurata abaafiire. 4Kwonka okwatanisa n'abahuriire boona aba aine amatsiko, ahabw'okuba embwa ehuriire ekira entare efiire. 5#Mub 1:11; Yob 14:21; Zab 31:12; 88:12; Isa 26:14. Abahuriire bamanya ku barifa; kwonka abafiire tibagira ki bamanya, kandi baba batakiine bindi bihembo; ahabw'ouba tibaakiijukwa. 6Okukunda kwabo n'okwangana kwabo n'eihari ryabo, byona biba byahweireho; kandi baba batakiine mugabo gwona omuri byona ebirikukorwa ahansi y'eizooba okuhitsya ebiro byona.

7 # Mub 8:15. Irooko oyeriire eby'okurya byawe n'okushemererwa, kandi oyenywere viinyo yaawe n'okweruhuura; ahabw'okuba Ruhanga aherize kusiima ebi orikukora. 8Ebijwaro byawe bigume nibyera, kandi omutwe gwawe gurrekye kuburamu amajuta.

9 # Mub 2:10; 7:15. Oyesiime n'omukazi waawe ou okunda ebiro byona eby'amagara gaawe agataine muhoho, ebi Ruhanga akuhaire kumara ahansi y'eizooba, ahabw'okuba ogwo nigwo mugabo gwawe omu biro by'amagara gaawe n'omu kufa kubi kwawe oku orikufa kubi ahansi y'eizooba. 10#Kol 3:23. Kyona eki orikwenda kukora n'emikono yaawe, okikore n'amaani; ahabw'okuba okuzimu ei oriza tihabayo murimo, nari enaama, nari okumanya, n'obu bwakuba obwengye.

11 # 1 Bag 22:34; Yer 9:23; Amo 2:14, 15. Naagaruka naareeba ahansi y'eizooba ngu abairuki rugambwa tibo basinga omu mpaka z'okwiruka, n'ab'amaani tibo basingura omu rugamba, n'ab'obwengye tibo batunga eby'okurya, n'abarikwegyereza tibo bagira eitungo, n'abahangu tibo bashongoka; kureka boona bahikwaho obunaku n'ebihikiirizi. 12#Mub 8:7; Enf 7:23; Luk 21:34-35; 1 Tes 5:3. Ahabw'okuba tihariho muntu omanya obunaku bwe; nk'oku eby'enyanja bikwatwa akatimba kabi, n'enyonyi zikakwatwa omutego, nikwo n'abantu bakwatwa omutego omu bunaku bubi, ku bubagwaho kitaraariire. 13Kandi naareeba ahansi y'eizooba eky'okureeberaho eki eky'obwengye ekyansusiire kikuru. 14#2 Sam 20:15, 16, 22. Omu rurembo rukye hakaba harimu abantu bakye; bwanyima omugabe rugambwa yaija, yaarugota, yaarwombekaho ebigo bihango. 15Kwonka omuri orwo rurembo hakaba harimu omworo oine obwengye; bwanyima ahabw'obwengye bwe yaarukiza. N'obu kiraabe kyabaire kityo, tihaine muntu weena owaijukire ogwo mworo. 16#Mub 7:19; Mak 6:2, 3. Ntyo naagira nti: Obwengye bukira amaani; kwonka obwengye bw'omworo bugaywa, kandi ebigambo bye tibabyetaho.

17Ebigambo by'omunyabwengye ebirikugambwa mpora nibikir aebi omutegyeki orikuyombera omu bashema. 18#Yos 7:1; 2 Bag 17:21. Obwengye nibukira eby'okurwanisa, kwonka omusiisi omwe aita ebirungi bingi.

Currently Selected:

Omubuurizi 9: RR64

Highlight

Copy

Compare