Eky'Ebiragiro 24

Ebindi biragiro

1 # Mak 10:4. Omushaija ku aritwara omukazi, yaamushwera, bwanyima ataamusiima ahabw'okureeba aine emicwe mibi, naikirizibwa kuhandiika ebaruha y'okumushenda, agimukwatse, amubingye omu nju ye. 2Ogwo mukazi ku araarugye omuri egyo nju, naikirizibwa kushwerwa ondiijo mushaija. 3Kwonka ogwo mushaija owaaba amushweire bushumbakazi nawe ku araamwangye, yaahandiika ebaruha y'okumushenda, yaagimukwatsa, yaamubinga omu nju ye, nari shi yaafa, 4#Yer 3:1. omushaija we ow'okubanza owaamubingire tariikirizibwa kumugarura akaba omukazi we, yaaherize kusiisikara atyo; ahabw'okuba ekyo n'ekihagaro omu maisho ga MUKAMA, kandi mutarireeta orubanja aha nsi, ei MUKAMA Ruhanga waanyu arikubaha kuba obuhunguzi.

5 # Enf 5:18. Omushaija ku arishwera omukazi, atarihurura n'abandi aha rugamba, n'obu kwakuba okukoresibwa omurimo gwona; kureka aryamara omwaka gwona ari omuka, naashemererwa n'omukazi we, ou ashweire.

6Hatarigira owaakwatirizibwa orubengo nari eseiso, ahakuba naaba akwatiriziibwe amagara ga mukama waabyo.

7 # Kur 21:16. Omuntu ku arishangwa aine ou yaibire weena omuri beene waabo Abaisraeli, naamutwaza nk'omuhuuku, nari yaamutunda, ogwo mushuma aryaitwa; ku muritwaza mutyo, muryaiha ekyo kibi omuriimwe.

8 # Lev 13:2; Mat 8:4. Ku oriba waakwatsirwe ebibembe, oyerinde, oteho omutima okore ebi abanyamurwa Abaleevi barikuhabura byona; nk'oku naabaragiire, naimwe mube nikwo mwakora. 9#Kub 12:10. Mwijukye oku MUKAMA Ruhanga waanyu yaagizire Miriamu, muri omu rugyendo nimuruga Misri.

10Ku origuza mutaahi waawe, nari waamutiiza ekintu kyona, otariza omu nju ye kwihamu eky'okukukwatiriza; 11kureka oryayemerera aheeru; ou ogurize abe niwe yaakureetera eky'okukukwatiriza. 12Kandi ku ariba ari omworo, otariraazayo eki akukwatiriize; 13#Yob 24:7, 8; 31:16-20; Ezk 18:7, 12, 16; Bir 6:25. otaribura kukimugarurira, eizooba nirirengarenga, abone kuraara omu kijwaro kye, akushabire omugisha; ekyo kiryakurugiramu okuhikiirira omu maisho ga MUKAMA Ruhanga waawe.

14 # Enf 14:31; Mal 3:5. Otariita kubi omupakasi, oriba ari omworo nari omukyene, yaaba w'omuri beene waanyu, nari ow'omu banyamahanga oriba atwire omu rurembo rwona aha ndembo z'omu nsi yaanyu; 15#Lev 19:13; Yer 22:13; Yak 5:4. oryaguma omuhe ebihembo bye ebi yaakorera, eizooba ritarirenga otakabimuhaire, nyentsya atakaatakira MUKAMA naakutabaariza, haza kikakurugiramu ekibi; ahabw'okuba n'omworo, kandi ebihembo bye nibyo ataireho omutima. 16#2 Bag 14:6, 12; Ezk 18:20. Baishe b'abaana batariitwa nibaturwa abaana baabo; kandi n'abaana batariitwa nibaturwa baishebo; kureka omuntu weena aryaitwa ahabw'ekibi kye.

17 # Kur 22:21, 22; Isa 1:23. Otariita orubanja rw'omunyaihanga, nari orw'efuuzi; kandi otarikwatirizibwa ekijwaro ky'omufaakazi; 18kureka oryaguma oijukye ku waabaire ori omuhuuku omuri Misri, kandi MUKAMA Ruhanga waawe ku yaakucungwire, akakwihayo; nikyo ndikukuzibirira kutwaza otyo. 19#Lev 23:22. Ku orishaaruura omusiri gwawe, waayebwayo ekiba, otarigarukayo kukiihayo; kiryaba eky'omunyaihanga n'efuuzi n'omufaakazi, MUKAMA Ruhanga waawe abone kukuha omugisha omu bi orikukora n'emikono yaawe byona. 20Ku oriteera omuti gwawe gw'omuzeituuni kwihamu ebijuma, otarigaruka omu mataagi gaagwo; ebiritsigaramu biryaba eby'omunyaihanga n'efuuzi n'omufaakazi. 21Kandi ku orishoroma ebijuma by'emizaabibu yaawe, otarigarukamu kuhumba; ebiritsigaramu bibe eby'omunyaihanga n'efuuzi n'omufaakazi. 22Oryaguma oijukye ku waabaire ori omuhuuku omu nsi Misri; nikyo ndikukuragiirira kutwaza otyo.

Currently Selected:

Eky'Ebiragiro 24: RR64

Highlight

Copy

Compare