Eky'Ebiragiro 25

Ebindi biragiro

1Abantu ku bariba baine eki barikutongana, baija kucwerwa orubanja, abaramuzi baarubacwera, baryaiha orubanja aha muntu otarwine, barusingise okozire kubi; 2kandi ogwo muntu okozire kubi ku ariba ashemereire kuteerwa, omuramuzi aryaragiira bamurambikye omu maisho ge, bamuteere kiboko ezishemereire ekibi kye. 3#2 Kor 11:24. Naikirizibwa kumuteera kiboko makumi ana, kwonka atarizirenzya; ahakuba ku arigumizamu kumuteera, yaayeshumbya ahari ezo, aryaba amumaziremu ak'obuntu, haza ari mwene waanyu.

4 # Enf 12:10; 1 Tim 5:18. Otariboha akanwa k'ente neejunga oburo.

5 # Luk 20:28; Rus 1:12. Abashaija enyine-emwe ku bariba batwire hamwe, omwe yaafa atazaire mwana w'omwojo, omukazi wa nyakufa atarishwerwa otari w'omu ruganda rwa iba; murumuna wa iba niwe arimuhungura, akamushwera, akamukorera ebi muramu w'omuntu akorera muka mukuru we. 6#Kut 38:9. Kandi omwojo ou aribanza kuzaara aryahungurira nyakufa, ayetwe eiziina rye, rirekye kweba omuri Israeli. 7Kwonka ogwo mushaija ku ariba atarikwenda kuhungura muka mukuru we, ogwo mukazi aryaza aha bakuru omu irembo ry'orurembo, abagira ati: Muramu wangye ayangire kugaruraho eiziina rya mukuru we omuri Israeli; tarikwenda kunkorera ebi muramu w'omuntu akorera muka mukuru we. 8Abakuru b'orurembo rwabo bamwete, bagambe nawe; ku ariguma ayangire, yaagira ati: Tindikwenda kumuhungura, 9#Rus 4:7. ogwo mukazi muramu we amuhikye haihi omu maisho g'abakuru, amujuure enkaito, amucwere amacwante omu maisho, amugire ati: Omuntu weena oryanga kwombeka eka ya mukuru we, akorwe atyo. 10Eiziina ry'eka ye omuri Israeli riryayetwa, Eka y'owaajwirwe enkaito. 11Abashaija ku barirwana, omukazi w'omwe aharibo yaaza kujuna iba orikumuteera, yaatayo omukono, yaakwata kiteera iba eifo, 12ogwo mukazi oryamucwaho engaro; eriisho ryawe ritarimusaasira.

13 # Lev 19:35; Amo 8:5. Omu nshaho yaawe otaritwaramu amabaare g'okurengyesa oburemeezi bumwe, haza kunu nigakiraakirana; 14n'omu nju yaawe otarigiramu endengo z'okurengyesa obwingi bumwe, haza kunu nizikiraakirana. 15#Kur 20:12. Kureka oryagira amabaare gahikire kandi agarikwinganira kimwe; kandi n'endengo ezihikire kandi ezirikwinganira kimwe nizo origira, obone kuhangaarira omu nsi ei MUKAMA waawe arikukuha; 16#Enf 11:1; 1 Tes 4:6. ahabw'okuba boona abakora nk'ebyo, boona abakora eby'okutahikiirira, abo n'ebirikunugwa ahari MUKAMA Ruhanga waawe.

17 # Kur 17:8-16. Mwijukye oku Abaamaleki baabagizire nimuruga Misri, 18oku baababugaine omu muhanda, bakashanga muruhire, mugwire enshazi, bakaita abantu baanyu abaabaire bataine maani, batsigaire enyima; kandi tibaratiinire Ruhanga. 19#1 Sam 15:3. N'ahabw'ekyo MUKAMA Ruhanga waanyu ku ariheza kubahuumuza engamba z'abazigu baanyu ababeehinguririize omu nsi ei MUKAMA Ruhanga waanyu arikubaha kukubuura kuba obuhunguzi bwanyu, muryamariraho kimwe eiziina ry'Abaamaleki, rirekye kwijukwa ahansi y'eiguru; mutarikyebwa.

Currently Selected:

Eky'Ebiragiro 25: RR64

Highlight

Copy

Compare