2 Samueli 9

Daudi okugarura Mefiboshesi omu bintu bya Saulo ishenkuru

1 # 1 Sam 18:3; 20:14, 15, 42. Bwanyima Daudi yaabuuza ati: Ebyo haine owaatsigaireho omu nju ya Saulo, nkamukorera eby'embabazi ahabwa Yonasaani? 2#2 Sam 16:1-4; 19:17, 29. Omu biro ebyo hakaba hariho omuheereza ow'omu nju ya Saulo orikwetwa Ziiba; baamwetera Daudi omugae, yaamubuuza ati: Niiwe Ziiba? Onu ati: Niinye omwiru waawe. 3#2 Sam 4:4. Omugabe yaamubuuza ati: Omu nju ya Saulo haine okiriho nkamukorera eby'embabazi za Ruhanga? Ziiba yaamugarukamu ati: Hakiriho mutabani wa Yonasaani, oremaire ebigyere. 4#2 Sam 17:27. Omugabe yaamubuuza ati: Arahi? Ziiba yaamugarukamu ati: Ari Lodebaari omu nju ya Makiri mwene Amieli. 5Omugabe Daudi nikwo kutuma, bakamwiha Lodebaari omu nju ya Makiri mwene Amieli. 6#2 Sam 16:4; 19:24, 25, 30; 21:7. Atyo Mefiboshesi mwene Yonasaani, mwijukuru wa Saulo yaija owa Daudi, yaajuumara omu maisho ge, yaamutangirira. Daudi yaamugira ati: Mefioshesi! Onu yaamugarukamu ati: Omwiru waawe ari aha. 7#2 Sam 19:28. Daudi yaamugira ati: Otatiina, ahabw'okuba buzimazima niinyija kukukorera eby'embabazi ahabwa Yonasaani sho, nkugarurire ebibanja bya shwenkuru byona; kandi oryaguma nooriira aha meeza yangye obutoosha. 8Mefiboshesi yaagaruka yaamwinamira, yaagira ati: omwiru waawe ni kintu ki, iwe okuunyetaho, nyowe embwa efiire?

9Bwanyima omugabe yaayeta Ziiba omuheereza wa Saulo, yaamugira ati: Ebyabaire biri ebya Saulo byona n'eby'ab'omu ka ye boona, naabiha mutabani wa mukama waawe. 10#2 Sam 19:17. Kandi iwe na batabani baawe n'abairu baawe mugume mumuhingire emisiri, mumureetere ebyezire, mutabani wa mukama waawe abone kutunga eby'okurya; kwonka Mefiboshesi mutabani wa mukama waawe aryaguma naariira aha meeza yangye obutoosha. Kandi Ziiba ogwo akaba aine abatabani ikumi na bataano, n'abairu makumi abiri. 11Ziiba yaagira omugabe ati: Ebi Nyakusinga omugabe yaaragiira omwiru we byona, omwiru we nikwo araagume naabitwaza. Okuruga aho Mefiboshesi yaaguma naariira aha meeza y'omugabe, nk'omwana w'omugabe. 12#1 Bus 8:34. Kandi Mefiboshesi akaba aine omutabani muto orikwetwa Miika; ab'omu ka ya Ziiba boona bakaba bari abairu ba Mefiboshesi. 13Atyo Mefiboshesi yaaguma Yerusaalemu, ahakuba akaba ariira aha meeza y'omugabe obutoosha; kandi akaba aremaire ebigyere byombi.

Currently Selected:

2 Samueli 9: RR64

Highlight

Copy

Compare