2 Samueli 10

Daudi okusingura Abaamoni n'Abasiria

1 # 1 Bus 19:1-19. Bwanyima y'ebyo omugabe w'Abaamoni yaafa, omutabani Hanuni yaategyeka omu mwanya gwe. 2Daudi ku yaakihuriire, yaagira ati: Niinyija kukorera gye Hanuni mwene Nahashi, nk'oku ishe yankoreire gye. Atyo Daudi yaayohereza abagaragwa be kumuyaagira ahabw'okufeerwa ishe. Abagaragwa ba Daudi baahika omu nsi y'Abaamoni. 3Kwonka abategyeki b'Abaamoni baagira Hanuni mukama waabo bati: Noogira ngu Daudi okukwoherereza ab'okukuyaagira n'okuha sho ekitiinisa? Torikumanya ku Daudi ayohereize abagaragwa be kwetegyereza orurembo n'okurutata, ngu arumareho? 4#Isa 20:4. N'ahabw'ekyo Hanuni yaakwata abagaragwa ba Daudi, yaabamwa ebireju by'orubaju rumwe, yaahirimburira rwagati ekicweka kya ifo eky'ebijwaro byabo okugarukira aha bibunu, yaaboohereza. 5Ku baabigambiire Daudi, yaayohereza ab'okubabugana, ahabw'okuba bakaba baine enshoni nyingi munonga. Omugabe yaabatumaho ati: Mugume Yeriko okuhitsya obu obureju burikura, mukaija.

6 # 2 Sam 8:3, 5. Abaamoni ku baamanyire ngu beetamiise Daudi, baatuma aha Basiria ba Besi-rehobu n'aba Zooba kubagurira ngu babahe engabo ezirikugyendesa ebigyere obukumi bubiri, n'omugabe wa Maaka kureeta engabo rukumi, n'aba Tobu kureeta kakumi n'enkumi ibiri. 7#2 Sam 23:8. Daudi ku yaakihuriire, yaayohereza Yoabu n'eihe ryona ery'amamanzi. 8Abaamoni baashohora, baatenga orugamba aha irembo; kandi Abasiria ba Zooba n'aba Rehobu n'engabo za Tobu na Maaka bakaba bari ahakwabo omu ishwa. 9Yoabu ku yaareebire engabo zimuri omumaisho n'enyima, yaatoorana abashaija entoore omu Baisraeli boona, yaabatengyesa orugamba kurwana n'Abasiria; 10abandi boona yaabaha omurumuna Abishai, nawe yaabatengyesa orugamba kurwana n'Abaamoni. 11Yaamugira ati: Abasiria ku barankize amaani, oije ompe emikono; kandi naiwe Abaamoni ku baraakukize amaani, naanye niinyija kugikuha. 12#Bir 31:6; 1 Kor 16:13. Guma omutima, turwane mashaija ahabw'eihanga ryaitu n'ahabw'endembo za Ruhanga waitu; kandi MUKAMA akore eki arikusiima. 13Atyo Yoabu n'engabo ezi yaabaire aine, bairira haihi kurwanisa Abasiria; Abasiria baabahunga. 14Abaamoni ku baareebire Abasiria baahunga, nabo baahunga Abishai, baataaha omu rurembo rwabo. Bwanyima Yoabu yaareka Abaamoni, yaagaruka Yerusaalemu. 15Kwonka Abasiria ku baareebire babingirwe Abaisraeli baayeteerana. 16#2 Sam 8:3. Hadadezeeri yaatuma aha Basiria abaabaire batwire seeri y'omugyera Furaati baarugayo, baaza Helamu, beebembeirwe Shobaki omukuru w'eihe rya Hadadezeeri. 17Ku baagambiire Daudi, nawe yaateerana Israeli yoona, baayambuka Yorudani, baaza Helamu, Abasiria baatenga orugamba, baarwana na Daudi. 18Abasiria baahunga Abaisraeli, Daudi yaita omu Basiria abantu abarikurwanira aha bigaari magana mushanju, n'ab'aha mbaraasi obukumi buna, kandi baacumita Shobaki omukuru w'eihe ryabo, baamugwisaho. 19#2 Sam 8:6. Abo bagabe boona abaabaire nibaheereza Hadadezeeri, ku baareebire baasingurwa Abaisraeli, baabeehongyera, baabatabaarira. N'ahabw'ekyo Abasiria baatiina kugaruka kuha Abaamoni emikono.

Currently Selected:

2 Samueli 10: RR64

Highlight

Copy

Compare