2 Samueli 16

Ziiba okuhwera Daudi n'okubeiherera Mefiboshesi

1 # 2 Sam 9:2-13; 15:30, 32. Daudi ku yaabaire yaahika aha mutwe gw'ekibungo, yaarengaho kakye, yaabugana Ziiba omugaragwa wa Mefiboshesi, aine endogoya ibiri eziriho amatandiiko, zeekoreire emigaati magana abiri, n'emitsitsa igana y'emizaabibu eyomire, n'endiijo igana ey'ebijuma by'omu kyanda, n'efurebe ya viinyo. 2Omugabe yaabuuza Ziiba ati: Ebi n'ebya ki? Ziiba yaamugarukamu ati: Endogoya n'ez'okuheeka ab'omu ka y'omugabe, emigaati n'ebijuma by'omu kyanda n'eby'okufugurira abatsigazi, kandi na viinyo n'ey'okunywebwa abaraagwere enshazi omu ihamba. 3Omugabe yaagaruka yaamubuuza ati: Beitu shi, mutabani wa mukama waawe arahi? Ziiba yaamugarukamu ati: Reeba, atsigaire Yerusaalemu; ahakuba agizire ati: Eri izooba enju ya Israeli neija kungarura aha ngoma ya tata. 4Omugabe yaagira Ziiba ati: Reeba, ebibaire biri ebya Mefiboshesi byona, hati n'ebyawe. Ziiba yaagira ati: Kasingye, Nyakusinga omugabe. Ngume ngirirwe ntyo embabazi omu maisho gaawe.

Shimei okujuma Daudi

5 # 2 Sam 19:16, 21; 1 Bag 2:8, 36-46. Omugabe Daudi ku yaahikire haihi na Bahurimu, haarugayo omushaija ow'omu muryango gw'enju ya Saulo orikwetwa Shimei mwene Geera; yaija naamukyeena; 6yaarekyera Daudi n'abagaragwa be boona amabaare; abantu boona n'abashaija be amamanzi bakaba bamushagatiire aha rubaju rwa buryo n'orwa bumosho. 7Shimei ku yaabaire naamukyeena, yaaguma naagira ati: Rugaho, rugaho, iwe mwitani 'we, ekishaija kitaine mugasho. 8#2 Sam 1:16. MUKAMA akutuzire eshagama y'enju ya Saulo yoona, ou waahunguriire, okaza aha ngoma ye; mbwenu MUKAMA ahaire Abusalomu mutabani waawe obugabe bwawe; reeba, otuzirwe eitima ryawe, ahakuba ori omwitani.

9 # Kur 22:28. Abishai mwene Zeruiya yaagira omugabe ati: Ahabw'enki nitureka egi mbwa efiire kujuma mukama wangye omugabe? Ninkweshengyereza, reka nyambukye, mmutemeho omutwe. 10#1 Sam 26:6; 2 Sam 19:22; 1 Bus 2:16. Omugabe yaati ati: Nyine kakwate ki naimwe, imwe beene Zeruiya? MUKAMA ku araabe niwe amugizire ati: Kyeena Daudi, mbwenu n'oha oraamugire ati: Ahabw'enki waakora otyo? 11#2 Sam 12:11. Daudi yaagira Abishai n'abagaragwa be boona ati: Nimureeba mutabani wangye ou nyezaariire nampiiga kuunyita; kaashwa ogu Mubenyamiini. Nimumurekye akyeene, ahakuba MUKAMA amuragiire. 12Obundi MUKAMA akaareeba oku ndikwitwa kubi, arugaho anzimuurira ebirungi ahabw'oku kukyeenwa oku naakyeenwa eri izooba. 13Atyo Daudi n'abashaija be baagumya omuhanda, na Shimei yaakiikama omu rukiizi rw'ekibungo seeri yaabo naamukyeena, naamurekyera amabaare n'omucuucu. 14Bwanyima omugabe n'abantu boona abu yaabaire aine, baahika Yorudani baruhire; omugabe yaaruhuukirayo.

Abusalomu okwehanuuza ahari Ahisofeeli na Hushai

15Abusalomu n'Abaisraeli boona baahika Yerusaalemu hamwe na Ahisofeeli. 16#1 Sam 10:24; 2 Sam 15:37; 1 Bag 1:25, 39; 2 Bag 11:12. Kandi Hushai mwene Aruki, munywani wa Daudi, yaija owa Abusalomu, yaamugira ati: Omugabe nakaramaare! Omugabe nakaramaare! 17Abusalomu yaabuuza Hushai ati: Obwo nibwo bwesigwa obu oine ahari munywani waawe? Ekikuzibiire kugyenda nawe n'enki? 18Hushai yaagira Abusalomu ati: Ngaaha! kureka omuntu otoorainwe MUKAMA n'aba bantu n'Abaisraeli boona, niwe ndiba owe, kandi niwe ndiguma nawe. 19#2 Sam 15:34. Kandi ekindi, n'oha ou nshemereire kuheereza? T'omutabani? Nk'oku naabaire mpeereza sho, naiwe nikwo ndikuheereza.

20Bwanyima Abusalomu yaagira Ahisofeeli ati: Tuhe obwengye, oku turaatwaze. 21#2 Sam 15:16; 20:3. Ahisofeeli yaagira Abusalomu ati: Irooko obyame n'ebinyanshunju bya sho, ebi atsigiire eka ye kugirinda; haza Abaisraeli boona nibaija kumanyira aho ku otamirwe sho; n'ahabw'ekyo abu oine boona nibaija kuhama. 22#2 Sam 12:11, 12. Batyo baateerera Abusalomu eihema aha mutwe gw'enju; Abusalomu yaaritaahamu, yaabyama n'ebinyanshunju bya ishe, Abaisraeli boona nibakireeba. 23#2 Sam 15:12. Kandi omu biro ebyo obwengye obu Ahisofeeli yaabaire aha, bukaba buba nk'obu omuntu ahairwe Ruhanga; okwo nikwo obwengye bwa Ahisofeeli bwabaire busiimwa Daudi, kandi na Abusalomu.

Currently Selected:

2 Samueli 16: RR64

Highlight

Copy

Compare