2 Samueli 15

Abusalomu okugomesa abantu

1 # 1 Bag 1:5. Bwanyima y'ebyo Abusalomu yaayegirira ekigaari n'embaraasi n'abashaija makumi ataano b'okumwebembera. 2#Rus 4:1. Kandi akaba aimuka kare, ayemerera aha rubaju rw'eirembo; omuntu weena owaabaire aija aha mugabe aine eki arikutongana, Abusalomu amweta, amubuuza ati: Ori owa rurembo ki? Onu amugarukamu ati: Nyowe omwiru waawe ndi ow'omu ruganda nanka orw'omu nganda za Israeli. 3Abusalomu amugira ati: Reeba, orubanja rwawe ni rurungi kandi ruhikire; kwonka omugabe taine u atsigiire kuhurira ebyawe. 4Abusalomu agaruka amugira ati: Kuri noogira ngu niinye muramuzi w'omu nsi egi, buri muntu weena owaakubaire aine eki arikufa nari orubanja, akaanyizireho, ncwa orubanja rwe omu buryo obuhikire. 5Kandi omuntu ku yaabaire aija kumutangirira, akaba amukununkirira, amukwata, amunywegyera. 6Okwo nikwo Abusalomu yaabaire atwaza Abaisraeli boona abaabaire bareeta emanja zaabo aha mugabe; omu buryo obwo Abusalomu yaiba emitima y'Abaisraeli.

7 # 1 Sam 16:1. Ku haahingwireho emyaka ena, Abusalomu yaagira omugabe ati: Ninkweshengyereza, nyikiriza nze Heburooni, mpikiirize okuhiga oku naahigire nindaganisa MUKAMA. 8#Kut 28:20, 21; 1 Sam 1:11; 2 Sam 13:38. Ahakuba nyowe, omwiru waawe, obu naabaire ndi Geshuri omuri Siria, nkahiga nindaganisa nti: MUKAMA ku aringarura Yerusaalemu, buzima ndyamuheereza. 9#1 Sam 1:17. Omugabe yaamugira ati: Gyenda n'obusingye. Atyo yaimuka yaaza Heburooni. 10Kwonka Abusalomu yaayohereza entatsi omu nganda za Israeli zoona, naagira ati: Ku muraahurire okugamba kw'enzamba, ahonaaho mugire muti: Abusalomu yaaba omugabe omuri Heburooni. 11#1 Sam 9:13; 16:3, 5. Kandi omuri okwo kugyenda kwa Abusalomu akagyenda n'abashaija magana abiri, abu yaayetsire kugyenda nawe okuruga Yerusaalemu, baafa okugyenda bataine ki barikumanya. 12#2 Sam 15:31; 16:20; 17:1, 14, 23; 1 Bus 27:33; Zab 3:1; 55:12-14; 41:9. Bwanyima Abusalomu ku yaabaire naatamba ebitambo bye, yaatuma kweta Ahisofeeli owa Giilo, omuhi w'obwengye wa Daudi kuruga omu rurembo rw'owaabo Giilo. Kutyo okwebumba okwo kwayeyongyera kuba okw'amaani, ahakuba abantu bakeeyongyera obutoosha kwebumba na Abusalomu.

Daudi okuhunga Abusalomu

13Bwanyima haija entumwa ahari Daudi, yaagira eti: Emitima y'Abaisraeli ekumbiire ahari Abusalomu. 14Daudi nikwo kugira abagaragwa be boona, abu yaabaire aine Yerusaalemu ati: Nimwimukye tuhungye; ku turaabe tutahungire, tihariho n'omwe omuriitwe oraakire Abusalomu. Murahukye kugyenda, atakaatuhika, akatukora kubi, akacwekyereza orurembo na rurara. 15Abagaragwa b'omugabe baamugira bati: Reeba, abairu baawe beeteekateekire kukora kyona, eki mukama waitu omugabe arikusiima. 16#2 Sam 16:21, 22; 20:3. Atyo omugabe yaashohora n'ab'omu ka ye boona bamukuratiire; kwonka yaatsigamu abakazi ikumi b'ebinyanshunju kurinda eka. 17Omugabe yaagyenda n'abantu boona bamukuratiire; ku baahikire Besi-merubaaki, baayemereraho. 18Batyo abagaragwa be boona baamurabaho; n'aba Keresi boona, n'aba Pelesi boona, n'aba Gaasi boona, abashaija magana mukaaga abaarugire Gaasi omumaisho g'omugabe.

19 # 2 Sam 18:2; Rus 1:16, 17. Omugabe yaagira Itaayi owa Gaasi ati: Ahabw'enki naiwe noogyenda naitwe? Garukayo, ogume n'omugabe; ahabw'okuba ori omunyaihanga, owaarugire owaabo abingirwe. 20Iwe oizire nyomwabazyo; nimbaasa nta kukugambira kuzengyerera naitwe, ntarikumanya i ndikuza? Garukayo, ogarureyo na beene waanyu; MUKAMA abahe embabazi n'obwesigwa. 21Itaayi yaagarukamu omugabe ati: Nindahira MUKAMA otahwaho, na mukama wangye omugabe, ei mukama wangye omugabe ariza, yaaba kufa nari okugumaho, naanye omwiru waawe niyo ndiza. 22Daudi yaagira Itaayi ati: Irooko oyambukye. Atyo Itaayi owa Gaasi yaayambuka n'abantu be boona hamwe n'abaana boona abu yaabaire aine. 23#2 Sam 16:2; 17:16, 29; Yoh 18:1. Abantu boona ku baabaire nibarabaho, ab'omuri ekyo kyanga kyona baaborooga; bwanyima omugabe yaayambuka akagyera Kidirooni, n'abantu boona baagumizamu bagyemire omuhanda ogurikuza omu ihamba.

24 # 1 Sam 22:20; 2 Sam 8:17; 20:25; Kub 4:15. Kandi Abiasaari yaija, na Zadoki yaija n'aba Leevi boona baheekire eshanduukye y'endagaano ya Ruhanga; baahuumuza egyo shanduukye ya Ruhanga ahansi, okuhitsya obu abantu boona baarugire omu rurembo. 25#Kur 15:13. Omugabe yaagira Zadoki ati: Garura eshanduukye ya Ruhanga omu rurembo; MUKAMA ku arangirire embabazi, aryangarura, anyikirize ngireebe hamwe n'obutaaho bwe. 26#1 Sam 3:18; 9:9; Kub 14:8; 2 Sam 17:17; 22:20; Zab 18:19. Kwonka ku araagire ati: Tindikukushemerererwa; ndi aha, angire oku arikwenda. 27Omugabe yaagaruka yaagira Zadoki omunyamurwa ati: Tori omuhanuuzi? Garuka omu rurembo n'obusingye, iwe na Abiasaari na batabani baanyu bombi, Ahimaazi mutabani waawe, na Yonasaani mutabani we. 28#2 Sam 17:16. Reeba, niinyija kuguma aha nyambukiro y'omu ihamba, ntegyereize okuhitsya obu murantumeho kungambira. 29Zadoki na Abiasaari nikwo kuheeka eshanduukye ya Ruhanga, bakagigarura Yerusaalemu, bakagumayo. 30Bwanyima Daudi yaatemba aharikwinamuka omu kibungo kya Zeituuni, yaagyenda naarira, ayetwekyereire, atajwaire nkaito; kandi n'abaabaire bari hamwe nawe boona baayetwekyerera, bainamuka nibarira. 31#2 Sam 16:23; 17:14, 23. Haagira owaagambira Daudi ku Ahisofeeli n'omwe aha beebumbire na Abusalomu. Daudi yaashaba ati: Ai MUKAMA, ninkweshengyereza, faafaatikanisa enaama ya Ahisofeeli.

32Daudi ku yaahikire aha mutwe gw'ekibungo ahu baabaire bashabira Ruhanga, Hushai mwene Aruki yaija kumubugana, ebijwaro bye bitaagukire, n'eitaka rimuri omu mutwe. 33Daudi yaamugira ati: Ku oraagyende naanye, noija kundusya; 34#2 Sam 16:19. kwonka ku oraagaarukye omu rurembo, waagira Abusalomu oti: Nyakusinga, niinyija kuba omwiru waawe; nk'oku naabaire ndi omwiru wa sho omu biro ebyahweire, na hati nikwo ndikwija kuba ahariiwe; noija kunsiisira enaama za Ahisofeeli. 35#2 Sam 17:15, 16. Beitu torikwija kuba oineyo Zadoki na Abiasaari abanyamurwa? N'ahabw'ekyo eki oraahurire kyona ekirikuruga omu ka y'omugabe, okigambire Zadoki na Abiasaari abanyamurwa. 36#1 Sam 17:17. Kandi noomanya ku baineyo batabani baabo bombi, Ahimaazi mwene Zadoki na Yonasaani mwene Abiasaari; abo nibo murantumeho kungambira ebi muraabe mwahuriire byona. 37#2 Sam 16:15, 16; 1 Bus 27:33. Atyo Hushai munywani wa Daudi yaaza omu rurembo, yaashanga Abusalomu naataaha Yerusaalemu.

Currently Selected:

2 Samueli 15: RR64

Highlight

Copy

Compare