2 Samueli 17

Hushai okufaafaatikanisa enaama ya Ahisafeeli

1Kandi Ahisofeeli yaagaruka yaagira Abusalomu ati: Ka ntoorane engabo kakumi n'enkumi ibiri, nyimukye, nkurate Daudi eki kiro; 2#2 Sam 16:14. niinyija kumugwaho aruhire, atakiine maani, mmutiinise, abantu boona abu aine bahungye, nyite omugabe wenka; 3haza abantu boona mbakugarurire. Manya eki orikwenda n'okwita omuntu omwe, reero abantu boona bakagira obusingye. 4Enaama egyo yaasiimwa Abusalomu n'abakuru ba Israeli boona.

5 # 2 Sam 16:16-18. Bwanyima Abusalomu yaagira ati: Mwete Hushai mwene Aruki, nawe tuhurire eki arikugamba. 6Hushai ku yaahikire ahari Abusalomu, Abusalomu yaamugira ati: Ahisofeeli yaatugambira ati n'ati; mbwenu tukore nk'oku yaagamba? Ku oraabe otarikukisiima, naiiwe otugambire. 7Hushai yaagarukamu Abusalomu ati: Obwengye obu Ahisofeeli yaaha eri izooba ti burungi. 8Kandi yaagaruka yaagira ati: noomanya sho n'engabo ze ku bari amamanzi; kandi hati bashaariire nk'edubu eyaayakwa ebyana byayo omu ihamba; kandi sho aba rugambwa omu kurwana, tarikwenda kuraara mu bantu. 9Mbwenu ayesherekire omu kiina nari ahandi. N'ahabw'ekyo ku haraagire abaafa nibakitandika kurwana, oraakihurire weena naija kugira ati: Hafiire abantu baingi omu ba Abusalomu. 10Ekyo nikyija kureetera omuntu weena kuhahaara, n'obu yaakuba ari emanzi aine omutima nk'ogw'entare, ahabw'okuba Abaisraeli boona nibamanya sho ku ari emanzi, kandi n'abu aine boona ku bari amamanzi. 11#2 Sam 3:10; Kut 22:17. Kureka nyowe obwengye obu ndikukuha n'obu. Teeranira hamwe Abaisraeli boona, okutandikira Daani okuhika Beeri-sheba, bangane n'omusheenyi gw'aha rubaju rw'enyanja obwingi, kandi naiwe wenka ohurure nabo. 12Tutyo nitwija kumugwaho ahu turaamushangye hoona, tumutondeho nk'oku orume rutonda ahansi; we n'abantu abu aine boona, titurikwija kutsigaho n'omwe. 13Kandi ku araahungire omu rurembo, nabwo Abaisraeli boona nibaija kureeta emirunga, turukumbagaze omu ruhanga, okuhitsya obu ruraahweho, hatatsigareho kabaare na kamwe. 14#2 Sam 15:31, 34. Abusalomu n'Abaisraeli boona baagira bati: obwengye bwa Hushai mwene Aruki bwakira obwa Ahisofeeli. Ahabw'okuba MUKAMA akaba ataireho enaama y'okushiisha obwengye burungi bwa Ahisofeeli, ngu abone kureetera Abusalomu akabi.

Batabani b'abanyamurwa okugambira Daudi enaama za Abusalomu

15 # 2 Sam 15:35, 36. Bwanyima Hushai yaagira Zadoki na Abiasaari abanyamurwa ati: Obwengye obu Ahisofeeli ahaire Abusalomu n'abakuru ba israeli n'obu; kwonka nyowe obu mmuhaire ni buti na buti. 16#2 Sam 15:28. N'ahabw'ekyo mutume juba ahari Daudi muti: Eki kiro otaraara aha nyambukiro y'eihamba; oyambukye, hatagira ekyakuzibira, omugabe atakaamirwa n'abantu abu aine boona. 17#2 Sam 15:27, 36. Kandi Yonasaani na Ahimaazi bakaba bari Eni-rogeli bategyereize; omuzaana yaaguma naija naabibagambira, nabo nibaza kubigambira omugabe Daudi; ahakuba bakaba batarikwikirizibwa kutaaha omu rurembo nibareebwa. 18kwonka haagira omwojo owaabareeba, yaagambira Abusalomu. Abo batsigazi bombi baagyenda nibeehuta, baahika Bahurimu, baataaha omu nju y'omushaija owaabaire aine eiziba omu kibuga kye; baarizamu. 19#Yos 2:6. Omukazi yaagira ekifundikizo, yaakita aha munwa gwaryo, yaakyanikaho omushekure gw'engano; tikyamanywa. 20Abambari ba Abusalomu baahika aha nju, baabuuza omukazi bati: Ahimaazi na Yonasaani barahi? Omukazi yaabagarukamu ati: Baayambuka akagyera. Ku baabasherwire, baabura, baagaruka Yerusaalemu. 21#2 Sam 17:15, 16. Ku baaherize kugyenda, abo batsigazi baaruga omu iziba, baagyenda, baagambira Daudi ebi batumirwe; baamugira bati: Mwimukye, murahukye kwambuka omugyera, ahakuba Ahisofeeli aine enaama eti n'eti y'okubarwanisa. 22Atyo Daudi yaimuka n'abantu abu yaabaire aine boona, baayambuka Yorudani; omushekye ku gwagiire kujuguta, haashangwa hatakiine n'omwe otakambukire.

23 # 2 Sam 15:12; Mat 27:5. Ahisofeeli ku yaareebire obwengye bwe butaikirizibwa, yaatandiika endogoya ye, yaimuka, yaataaha owe omu rurembo rw'owaabo; yaatebeekanisa eby'omu ka ye, yaayehanika, yaafa, baamuziika omu kituuro kya ishe.

24 # Kut 32:2. Bwanyima Daudi yaahika Mahanaimu. Abusalomu nawe yaayambuka Yorudani n'Abaisraeli boona. 25#2 Sam 19:13; 20:9, 12; 1 Bag 2:5, 32; 1 Bus 2:13, 16, 17. Kandi Abusalomu akaba ataireho Amasa kuba omukuru w'eihe omu mwanya gwa Yoabu. Kandi Amasa ogwo akaba ari mutabani w'omushaija orikwetwa Itura Omuishimaeli, owaashweire Abigaili muhara wa Nahashi, murumuna wa Zeruiya nyina wa Yoabu. 26Bwanyima Abaisraeli na Abusalomu baasiisira omu nsi ya Gileadi.

27 # 2 Sam 9:4; 10:1, 2; 19:31, 32; 1 Bag 2:7; Ezr 2:61. Daudi ku yaahikire Mahanaimu, Shobi mwene Nahashi owa Rabba ey'Abaamoni, na Makiri mwene Amieli owa Lodebaari, na Baruzilai Omunyagileadi owa Rogelimu, 28baareeta ebitanda, enyabya, enyungu, engano, sayiri, esaano, engano zikarangire, ebihimba, enkoore zikarangire, 29#2 Sam 16:2. obwoki, amajuta, entaama n'encumate za ciizi, baabireetera Daudi n'abantu abu yaabaire aine kubafungurira; ahakuba bakagira bati: Abantu baine enjara, baruhire, kandi baitiirwe eiriho omu ihamba.

Currently Selected:

2 Samueli 17: RR64

Highlight

Copy

Compare