2 Abagabe 23

Yosia okurwanisa eby'obukafiiri, n'okugarura abantu ahari Ruhanga

1 # 2 Bus 34:29-32. Bwanyima omugabe yaatuma, abakuru ba Yuda n'aba Yerusaalemu boona baateeranira ah'ari. 2#2 Bag 22:8; Bir 31:11. Omugabe yainamuka omu nju ya MUKAMA hamwe n'abashaija b'omuri Yuda boona, abatuuzi b'omuri Yerusaalemu boona, abanyamurwa, na baanabi, abantu boona abakuru n'abato; yaabashomera ebigambo byona eby'omu kitabo ky'endagaano ekizoirwe omu nju ya MUKAMA. 3#2 Bag 11:14, 17; Bir 13:4. Omugabe yaayemerera aha rubaju rw'enyomyo, yaaragaana endagaano omu maisho ga MUKAMA, naaraganisa ku mukuratira, okworobera ebiragiro bye, n'ebi yaahamize, n'ebi yaataireho, n'omutima gwe gwona n'amagara ge goona, kandi n'okuhikiiriza ebigambo by'omuri egyo ndagaano ebihandiikirwe omu kitabo ekyo; n'abantu boona baakwatanisa nawe omuri egyo ndagaano.

4 # 2 Bag 21:3; 25:18; Bir 16:21; Yer 52:24. Bwanyima omugabe yaaragiira Hilukia omunyamurwa omukuru, n'abanyamurwa abarikukurataho, kandi n'abarinzi b'eirembo, kwiha omu nju ya MUKAMA ebintu byona ebyakoreirwe Baali na Ashera n'eihe ryona ery'omu iguru; yaabyokyeza aheeru ya Yerusaalemu omu kahanga ka Kidirooni, eiju ryabyo yaaritwara Beseeli. 5Yaabinga abanyamurwa b'ebishushani ebirikuramibwa ebyatairweho abagabe ba Yuda kuguma nibabyoterera obubaane omu myanya mikuru y'okuramizamu ey'omu ndembo za Yuda n'eyeehinguririize Yerusaalemu; kandi yaabinga n'abandi abaabaire nibooterera Baali obubaane, n'eizooba n'okwezi n'eigana ry'enyonyoozi n'eihe ryona ery'omu iguru. 6#2 Bus 15:16; 34:4. Kandi yaiha Ashera omu nju ya MUKAMA, yaagitwara aheeru ya Yerusaalemu aha kagyera Kidirooni, yaagyokyezaho, yaagihondahonda, yaagicwa omucuucu, ogwo mucuucu yaagushuka aha bituuro by'abantu b'obutoosha. 7#1 Bag 14:24; 15:12; Ezk 16:16. Kandi yaasheenya amaju ga baamaraya agaabaire gari omu nju ya MUKAMA, ahu abakazi baabaire barukira enyegamo z'okukingira Ashera. 8Yaiha abanyamurwa boona omu ndembo za Yuda, yaashiisha emyanya mikuru y'okuramizamu, ahu abanyamurwa baabaire booterera obubaane, okuruga Geeba okuhika Beeri sheba; yaasheenya zaanyaruju z'emyanya mikuru eyaabaire eri aha irembo ahu orikutaahira nooza omu nju ya Yoshua omukru w'orurembo, emyanya egyo ekaba eri aha rubaju rwa bumosho rw'eryo irembo. 9#Ezk 44:10-14. Kwonka abanyamurwa b'emyanya mikuru ey'okuramizamu tibainamuka ha itambiro rya MUKAMA omuri Yerusaalemu, kureka baaguma nibariira emigaati etatumbisiibwe omuri bagyenzi baabo. 10#Lev 18:21; Yos 15:8; Isa 30:33; Yer 7:31, 32; 19:11-14. Kandi yaashiisha Tofesi ey'omu ruhanga rwa beene Hinoomu, ngu hatagira omuntu weena owaarabya omutabani nari muhara we omu muriro kumutambira Moleki. 11Yaihaho ebishushani by'embaraasi, ebi abagabe ba Yuda baabaire bahongyeire eizooba, ebyabaire biri ahu orikutaahira nooza omu nju ya MUKAMA, haihi n'ekishengye kya Nasani-meleki omukuru w'enju ekyabaire kihereraine na hekalu; yaayotsya n'ebigaari by'eizooba. 12#2 Bag 21:5; Yer 19:13; 32:29; Zef 1:5. Kandi amatambiro agaabaire gari aha mutwe gw'ekishengye kya Ahazi eki abagabe ba Yuda baayombekire, n'amatambiro agu Manaase yaabaire akozire omu bikaari bibiri eby'enju ya MUKAMA, yaagahanantura, yaagatuura ahansi, yaagasheenyagura, omucuucu gwago yaagunaga omu kagyera Kidirooni. 13#Kub 21:29; 1 Bag 11:5, 7. Kandi omugabe yaashiisha emyanya mikuru ey'okuramizamu eyaabaire eri aha burugwa-izooba bwa Yerusaalemu, aha rubaju rwa buryo rw'akabungo k'eijundiro, ei Sulemaani omugabe wa Israeli yaabaire ayombekyeire Ashitaroosi ekirikunugwa ky'Abasidoni, na Kemoshi ekirikunugwa ky'Abamoabu, na Milikomu ekririkunugwa ky'Abaamoni. 14#Kur 23:24. Yaasheenyagura enyomyo, yaatema ebishushani bya Ashera, kandi omu myanya yaabyo yaijuzamu amafuga g'abantu.

Yosia okuhikiiriza ebyahanwirwe omu busingye bwa Yerobaomu mwene Nebati

15 # 1 Bag 12:28, 29, 33; 14:16. Kandi eitambiro rya Beseeli riri na nyaruju ey'omwanya mukuru ebi Yeroboamu mwene Nebati owaassissise Israeli yaabaire ayombekire, yaabikumbagaza, yaayatagura amabaare gaabyo, yaagacwa omucuucu; yaagaruka yaayotsya Ashera. 16#1 Bag 13:2. Yosia ku yaahindukire ati, yaareeba ebituuro hangahari aha kabungo; yaatuma, baiha amagufa omuri ebyo bituuro, yaagookyeza aha itambiro, yaarishiisha nk'ekigambo kya MUKAMA eki omushaija wa Ruhanga ori yaarangire naaragura oku kyabaire kiri. 17#1 Bag 13:1, 30. Bwanyima yaagira ati: Kiriya kiijutsyo eki ndikureeba obuseeri n'eky'enki? Abashaija b'omuri orwo rurembo baamugarukamu bati: N'ekituuro ky'omushaija wa Ruhanga owaarugire Yuda, akaragura ahari ebi ebi waakora eri itambiro. 18#1 Bag 13:11, 31. Omugabe yaagira ati: Mumurekye; hatagira owaaziikuura amagufa ge. Batyo baareka amagufa ge hamwe n'aga nabi owaarugire Samaria. 19#2 Bus 34:6, 7. Kandi zaanyaruju zoona ez'omu myanya mikuru y'okuramizamu ey'omu ndembo za Samaria, ezaabaire zombekirwe abagabe ba Israeli nibagwisa kubi MUKAMA, Yosia yaazigira nk'ebi yaagizire nyaruju ya Beseeli byona oku byabaire biri. 20#Kur 22:20; 1 Bag 18:40; 2 Bag 11:18; 2 Bus 34:5. Kandi abanyamurwa b'egyo myanya mikuru boona abaabaire bariyo, yaabaitira aha matambiro, yaayokyezaho n'amagufa g'abantu. Bwanyima yaagaruka Yerusaalemu.

Yosia okugaruraho obugyenyi bw'Okuhingurwaho

21 # Kur 12:3-11; Lev 23:5-8; Kub 9:2-4; Bir 16:2-8; 2 Bus 35:1-17. Bwanyima omugabe yaaragiira abantu boona ati: Mukorere MUKAMA Ruhanga waanyu obugyenyi bw'Okuhingurwaho, nk'oku kihandiikirwe omuri eki kitabo ky'endagaano. 22#2 Bus 35:18, 19. Buzimazima okwiha omu biro by'abaramuzi abaabaire bacwera Abaisraeli emanja n'omu biro byona eby'abagabe ba Israeli n'aba Yuda; tihakabahoga bungyenyi bw'Okuhingurwaho oburikushusha nk'obwo; 23kureka omu mwaka gwa ikumi na munaana ogw'omu busingye bw'omugabe Yosia nibwo baakorera MUKAMA obugyenyi obwo omuri Yerusaalemu.

24 # Kut 31:19; Lev 19:31; 20:27; Bir 18:11; 2 Bag 21:6, 11, 21; 22:8. Kandi Yosia yaihaho abarikugambisa emizimu n'abarogi, na baateraafi n'ebishushani ebirikuramibwa n'ebirikunugwa byona ebyashangirwe omuri Yuda na Yerusaalemu, ngu abone kuhikiiriza ebigambo by'Ebiragiro ebihandiikirwe omu kitabo eki Hilukia omunyamurwa yaazoire omu nju ya MUKAMA. 25#2 Bag 18:5. Omu bagabe boona abaamubandiize tihaine owaashushaine nawe, owaahindukiire MUKAMA n'omutima gwe gwona, n'amagara ge goona, n'amaani ge goona, nk'ebiragiro bya Musa byona oku biri; kandi n'omu baamukuratiire tihaine waashushaine nawe.

26 # 2 Bag 21:11; 24:3, 4; Yer 15:4. N'obu biraabe byabaire biri bityo MUKAMA tarahindukire kureka ekiniga kye kingi, eki yaagiriire Yuda, naabatura byona ebi Manaase yaakozire naamugwisa kubi. 27#2 Bag 17:18-20; 18:11; 21:4, 13. Ekyarugiremu MUKAMA yaagira ati: Ndyaiha Abayuda omu maisho gangye, nk'oku naihiremu Abaisraeli, kandi nyogye oru rurembo Yerusaalemu oru naatooraine, n'enju ei naagizire nti: Nimwo eiziina ryangye ririguma.

Okufa kwa Yosia

28Nbwenu endiijo mirimo ya Yosia n'ebi yaakozire byona, tibihandiikirwe omu kitabo ky'eby'omu busingye bw'abagabe ba Yuda? 29#Bar 5:19; 2 Bus 35:20-24; Yer 46:4; Zek 12:11. Kandi omu busingye bwe Faraho Neeko omugabe wa Misri akainamuka aha mugyera Furaati kurwanisa omugabe wa Asiria; omugabe Yosia nawe yaaza kumurwanisa. Faraho Neeko ku yaamureebire, yaamwitira Megido. 30#2 Bus 36:1-4. Abaheereza be baiha omutumbi gwe Megido, baaguta omu kigaari, baagutwara Yerusaalemu, baamuziika omu kituuro kye. Abantu b'omuri egyo sni baatwara Yehoahazi mwene Yosia, baamushukaho amajuta, baamwemeka omu mwanya gwa ishe.#2 Bag 9:28.

31 # 2 Bag 24:18; 1 Bus 3:15; Yer 22:11. Yehoahazi akaba aine emyaka makumi abiri n'eshatu, obu yaatandika kutegyeka, yaategyekyera ameezi ashatu omuri Yerusaalemu. Nyina akaba naayetwa Hamutaali muhara wa Yeremia owa Libuna. 32#2 Bag 24:9, 19. Yaakora ebirikwangwa MUKAMA, nk'ebi baishenkuru baakozire byona. 33#2 Bag 25:6, 20, 21; Yer 39:5, 6; 46:2; 52:9, 10, 26, 27. Bwanyima Faraho Neeko yaamubohera Ribula omu nsi ya Hamasi, ngu arekye kuguma Yerusaalemu aha ngoma, n'abantu b'omuri egyo nsi yaabacwera omutoijo gw'etalanta z'efeeza igana, n'etalanta emwe y'ezaabu. 34#Yer 22:11, 12; Ezk 19:3, 4. Faraho Neeko yaagira Eliakimu mwene Yosia omugabe omu mwanya gwa ishe, yaahindura eiziina rye, yaamweta Yehoyakimu; kandi yaihayo Yehoahazi; Yehoahazi ogwo ku yaahikire Misri, yaagwayo. 35Yehoyakimu yaaha Faraho ezo feeza n'ezaabu; kwonka yaacwera ensi omushoro, ngu bareete empiiha nk'ekiragiro kya Faraho oku kyabaire kiri. Yaashoroza efeeza n'ezaabu aha bantu b'omuri egyo nsi, buri muntu nk'oku yaabaire acwereirwe, kubiha Faraho Neeko.

36 # 2 Bus 36:5. Yehoyakimu akaba aine emyaka makumi abiri n'etaano, obu yaatandika kutegyeka, yaategyekyera emyaka ikumi na gumwe Yerusaalemu. Nyina akaba naayetwa Zebida muhara wa Pedaaya owa Ruma. 37#2 Bag 24:9, 19. Yaakora ebirikwangwa MUKAMA nk'ebi baishenkuru baakozire byona.

Currently Selected:

2 Abagabe 23: RR64

Highlight

Copy

Compare