2 Abagabe 24

Nebukadeneeza okusingura Abayuda n'okubatwara Babulooni bari enkwatwa

1 # 2 Bus 36:6; Yer 25:1, 9; Dan 1:1. Omu busingye bwa Yehoyakimu, Nebukadeneeza omugabe wa Babulooni akainamuka, Yehoyakimu yaamwehongyera, yaamara emyaka eshatu ari omwiru we; bwanyima yaamuhinduka, yaamugomera. 2#2 Bag 21:12-14; 23:27; 25:4; Yer 35:11. MUKAMA yaamwoherereza emtwe y'engabo z'Abakaludaaya, n'ez'Abasiria, n'ez'Abamoabu kandi n'ez'Abaamoni, ngu bateere Yuda bagicwekyereze, nk'oku MUKAMA yaagambire naaraba omu bairu be baanabi. 3#2 Bag 21:11; 23:26. Buzimazima ekyo kikaba ahari Yuda ahabw'ekiragiro kya MUKAMA, ngu abone kubaiha omu maisho ge, naabatura ebibi bya Manaase nk'oku yaabikozire byona, 4#2 Bag 21:16. kandi n'eshagama y'abataine rubanja ei yaaseesire; ahabw'okuba akagiijuza Yerusaalemu, na'ahabw'ekyo MUKAMA yaayanga kubimusaasira. 5#2 Bus 36:8. Mbwenu endiijo mirimo ya Yehoyakimu n'ebi yaakozire byona tibihandiikirwe omu kitabo ky'eby'omu busingye bw'abagabe ba Yuda? 6#2 Bus 36:6; Yer 22:18, 19; 36:30. Bwanyima Yehoyakimu yaagwejegyera, yaashanga baishenkuru, Yehoyakiini omutabani yaategyeka omu mwanya gwe. 7#Yer 37:5, 7; 46:2, 20, 24, 26. Kandi omugabe wa Misri taragarukire kuruga mu nsi ye, ahakuba omugabe wa Babulooni akaba akubwire ensi yoona eyaabaire eri ey'omugabe wa Misri, okuruga aha kagyera ka Misri okuhika aha mugyera Furaati.

8 # 1 Bus 3:16; Est 2:6; Yer 22:24. Yehoyakiini akaza aha ngoma aine emyaka ikumi na munaana, yaategyekyera Yerusaalemu ameezi ashatu. Nyina akaba naayetwa Nehushiita, muhara wa Elinasani owa Yerusaalemu. 9Naawe yaakora ebirikwangwa MUKAMA, nk'ebi ishe yaakozire byona. 10#Dan 1:1. Omu biro ebyo abashaija ba Nebukadeneeza omugabe wa Babulooni bakainamuka, baateera Yerusaalemu, baagota orurembo. 11Bwanyima Nebukadeneeza omugabe wa Babulooni yaijayo, abashaija be bakirugotsire. 12#2 Bag 25:27; 2 Bus 36:10; Yer 24:1; 29:1; Ezk 17:12. Yehoyakiini omugabe wa Yuda yaashohora, yaayehayo omu mikono y'omugabe wa Babulooni, we na nyina n'abagaragwa be n'abanyiginya be, n'abakuru b'ekikaari kye. Ogwo mugabe wa Babulooni omu mwaka gwe gwa munaana nibwo yaakwata Yehoyakiini, akamutwara ari enkwatwa, 13#1 Bag 7:48-50; 2 Bag 20:17; 2 Bus 36:7; Ezr 1:7; Isa 39:6; Yer 20:5; Dan 1:2; 5:2, 3. kandi yaanyaga eby'obutungi by'omu nju ya MUKAMA byona n'eby'omu nju y'omgabe, yaatematema ebintu by'ezaabu byona eby'omuri hekalu ya MUKAMA, ebi Sulemaani omugabe wa Israeli yaakozire, nk'oku MUKAMA yaabaire agambire. 14#2 Bag 25:12; Yer 29:2; 52:28. Kandi yaatwara ab'omuri Yerusaalemu boona bari enkwatwa n'abanyiginya boona, n'amamanzi goona ag'amaani; enkwatwa zoona hamwe n'abanyamyoga boona n'abaheesi zaaba kakumi; tihaagira owaatsigarayo, kureka abantu abarikuhereerukayo omu bworo bonka omuri egyo nsi. 15#2 Bus 36:10; Ezk 17:13. Atyo yaatwara Yehoyakiini Babulooni; na nyin'omugabe n'abakazi be n'abatware be n'abakuru b'ensi ye, yaabaiha Yerusaalemu, yaabatwara Babulooni bari enkwatwa. 16Abashaija boona amamanzi enkumi mushanju, abanyamyoga hamwe n'abaheesi rukumi, boona ab'amaani abarikumanya eby'engamba, omugabe wa Babulooni yaabatwara Babulooni bari enkwatwa. 17#2 Bus 36:10-13. Bwanyima yaata Matania, ishento wa Yehoyakiini, aha ngoma omu mwanya gwe, yaahindura eiziina rye, yaamweta Zedekia.#1 Bus 3:15; Yer 37:1.

Eby'omu busingye bwa Zedekia

18 # Yer 52:1-27. Zedekia akaza aha ngoma aine emyaka makumi abiri na gumwe, yaategyekyera Yerusaalemu emyaka ikumi na gumwe. Nyina akaba naayetwa Hamutaali muhara wa Yeremia owa Libuna.#2 Bag 23:21. 19#2 Bag 23:37. Yaakora ebirikwangwa MUKAMA nk'ebi Yehoyakiini yaakozire byona oku byabaire biri. 20#Ezk 17:18. Ahakuba ekiniga kya MUKAMA kikaba kingi munonga ahari Yerusaalemu na Yuda, okuhitsya obu yaababingiire kimwe omu maisho ge. Bwanyima Zedekia yaagomera omugabe wa Babulooni.

Currently Selected:

2 Abagabe 24: RR64

Highlight

Copy

Compare