2 Abagabe 18

Eby'omu busingye bwa Hezekia

1 # 2 Bag 17:1; 2 Bus 28:27; Mat 1:9. Omu mwaka gwa kashatu ogw'omu busingye bwa Hoshea mwene Ela, omugabe wa Israeli, Hezekia mutabani wa Ahazi omugabe wa Yuda akatandika kutegyeka. 2#2 Bus 29:1, 2. Yaatandika aine emyaka makumi abiri n'etaano, yaategyekyera emyaka makumi abiri na mwenda omuri Yerusaalemu. Nyina akaba naayetwa Abi muhara wa Zekaria. 3#2 Bag 20:3; 2 Bus 31:20. Yaakora ebirikusiimwa MUKAMA nk'ebi Daudi ishenkuru yaakozire byona oku byabaire biri. 4#Kur 23:24; Kub 21:8, 9; Bir 16:21; 2 Bag 17:10, 16; 18:22; 2 Bus 31:1. Yaihaho emyanya mikuru ey'okuramizamu, yaasheenya enyomyo z'amabaare, yaatema Ashara; kandi yaacwagacwagura enjoka y'omuringa ei Musa yaabaire akozire, ahabw'okuba okuhitsya omu bunaku obwo Abaisraeli bakaba nibakigyoterera obubaane; neeyetwa Nehushitaane. 5#2 Bag 23:25. Akaba naayesiga MUKAMA Ruhanga wa Israeli; n'ahabw'ekyo tihariho mugabe weena owaabaire naamushusha omu bagabe ba Yuda boona abaamukuratiire, n'obu baakuba abaamubandiize. 6#Bir 10:20; Yos 23:8. Ahabw'okuba akagumira ahari MUKAMA, tiyaareka kumukuratira, yaaguma naayorobera ebiragiro ebi MUKAMA yaaragiire Musa. 7#2 Bag 16:7; 2 Bus 15:2. MUKAMA yaaguma nawe; ei yaabaire ahurura yoona, aba gye. Kandi yaagomera omugabe wa Asiria, yaayanga kumuheereza. 8#Isa 14:29. Kandi yaateera Abafilistia okuruga aha munaara gw'abarinzi okuhika aha ndembo ezizitiire n'engo z'amabaare, yaabahitsya Gaaza n'omu byanga byayo.

9 # 2 Bag 17:3-7. Omu mwaka gwa kana ogw'omu busingye bw'omugabe Hezekia, ogwabaire guri omwaka gwa mushanju ogwa Hoshea mwene Ela omugabe wa Israeli, Shalumaneseeri omugabe wa Asiria akainamuka, yaateera Samaria, yaagigota; 10aha muheru gw'omwaka gwa kashatu yaagikwata. Omu mwaka gwa mukaaga ogwa Hezekia, ogwabaire guri omwaka gwa mwenda ogwa Hoshea omugabe wa Israeli, nimwo Samaria yaakwatiirwe. 11Bwanyima omugabe wa Asiria yaatwara Abaisraeli omu nsi ye bari enkwatwa, yaabata omuri Haala, n'aha mugyera Habora ogw'omuri Gozani, n'omu ndembo z'Abameedi, 12ahakuba tibarahuriire iraka rya MUKAMA Ruhanga waabo, kureka bakaita endagaano ye, nangwa n'ebi Musa omugaragwa wa MUKAMA yaaragiire byona, baayanga kubihurira, n'obu kwakuba okubyorobera.

Omugabe wa Asiria okuteera Yuda

13 # 2 Bus 32:1-20; Isa 36:1-22. Omu mwaka gwa ikumi n'ena ogw'omu busingye bw'omugabe Hezekia, Senakeribu omugabe wa Asiria akainamuka, yaateera endembo zoona eza Yuda ezaabaire zizitiirwe n'engo z'amabaare, yaazikwata. 14#2 Bag 23:33. Hezekia omugabe wa Yuda yaatuma aha mugabe wa Asiria ari Lakishi, ati: Nshobize; ndeka; kyona eki orancwe ninkyemera. Omugabe wa Asiria yaacwa Hezekia omugabe wa Yuda etalanta magana ashatu z'efeeza, kandi n'ez'ezaabu makumi ashatu. 15#2 Bag 12:18; 16:8. Hezekia yaamuha efeeza yoona eyaashangirwe omu nju ya MUKAMA, n'omu mabiikiro g'enju y'omugabe. 16Omu biro ebyo Hezekia omugabe wa Yuda akaiha ezaabu aha nyigi za hekalu ya MUKAMA, n'aha biti by'emiryango, ei yaabaire abishwekire, yaagiha omugabe wa Asiria. 17#Isa 20:1. Omugabe wa Asiria, ku yaabaire akiri Lakishi, yaatuma abatware be Tarutaani, Rabusaari, na Rabushaake, n'eihe rihango aha mugabe Hezekia omuri Yerusaalemu. Bainamuka, baaza Yerusaalemu. Ku baahikireyo, baayemerera aha mukura gw'ekiyanja ky'eruguru, ekiri aha muhanda rugyendwa ogurikuza aha kibanja ky'omwozi. 18#Isa 22:15, 20. Ku baayetsire omugabe, haija Eliakimu mwene Hilukia, owaabaire ari omukuru w'ekikaari, na Shebuna omuhandiiki, na Yoa mwene Asafu omuhandiiki w'ebirikubaho, baabashanga aho.

19Omutware Rabushaake yaabagira ati: Mwirooko mugire Hezekia muti: Oku nikwo omugabe rugambwa, omugabe wa Asiria arikugamba naagira ati: Mbwenu ou orikwesiga n'oha? 20Noogira ngu ebigambo bugambo nibyo naama n'amaani eby'okurwanisa? Hari ou oyegamiire hati n'oha, waaza kungomera? 21#Isa 30:2, 3, 7; Ezk 29:6, 7. Reeba, hati oyegamiire Misri, orubango oruri nk'ekibungo kihndekire, ekirikwija kucumita ekiganja ky'omuntu weena orikukihimbagiriraho. Okwo nikwo na Faraho omugabe wa Misri ari ahari boona abarikumwesiga. 22#2 Bag 18:4; 2 Bus 31:1. Kandi ku murangire muti: Nitwesiga MUKAMA Ruhanga waitu, tiwe ogwo ou Hezekia yaihireho emyanya ye mikuru ey'okuramizamu n'amatambiro ge, naagira Abayuda n'aba Yerusaalemu ati: Mushemereire kuramiza omu maisho g'eri itambiro eriri Yerusaalemu? 23Mbwenu ija okwatirizane na mukama wangye omugabe wa Asiria. Nkuhe embaraasi enkumi ibiri; ku oraabone ab'okuzitemba, ongire kwo! 24Noija kubaasa ota kubinga omwe aha bakuru bangye b'engabo ab'amaani makye okukira abandi, ku oraabe oyesigire Misri kuba nibo baakuha ebigaari n'ab'aha mbaraasi? 25Kandi noogira ngu nyizire kuteera omwanya ogu n'okugucwekyereza ntaragiirwe MUKAMA? Omanye ngu MUKAMA niwe angambiire ati: Inamuka, oteere egyo nsi, ogicwekyereze.

26Bwanyima Eliakimu mwene Hilukia na Shebuna na Yoa baagira omutware Rabushaake bati: Twakweshengyereza, gamba n'abairu baawe omu rurimi rw'Abasiria; ahakuba itwe niturumanya; reka kugamba omu rurimi rw'Abayuda, abantu abari ha rugo rw'amabaare babihuriire. 27Kwonka omutware Rabushaake yaabagarukamu ati: Nimugira ngu mukama wangye antumire ahari mukama waanyu naimwe kuba niimwe naagambira ebigambo ebi mwenka? Tantumire kubigambira n'abashaija bariya abashutami aha rugo, abarikwija kurya naimwe amazi gaabo, n'okunywa naimwe enkari yaago?

28Ahonaaho omutware Rabushaake yaayemerera, yaagamba n'eiraka rihango omu rurimi rw'Abayuda, naagira ati: Muhurire obutumwa bw'omugabe rugambwa, omugabe wa Asiria. 29Oku nikwo omugabe arikugamba naagira ati: Mutaikiriza Hezekia kubabeiha; ahabw'okuba tarikwija kubaasa kubajuna abaihe omu mikono yangye. 30Mutaikiriza Hezekia kubeesigisa MUKAMA naabagira ati: Buzimazima MUKAMA naija kutujuna, kandi orurembo oru tirurikwija kuheebwayo mu mikono y'omugabe wa Asiria. 31Mutahurira Hezekia; ahakuba oku nikwo omugabe wa Asiria arikugamba naagira ati: Mugarukane naanye; mwije munshangye aha; obwo buri omwe omuriimwe nibwo araarye ahamuzaabibu gwe, akarya ahamutiini gwe, kandi akanya amaizi g'omu iziba rye, 32okuhitsya obu ndiija, nkabatwra omu nsi erikushushana n'eyaanyu, ensi y'engano na viinyo, ey'emigaati n'emizaabibu, kandi ey'emizeituuni n'obwoki, mukabona kugumaho, mutafe. N'ahabw'ekyo mutahurira Hezekia orikubabeihabeiha naabagira ati: MUKAMA naija kutujuna. 33#2 Bag 19:12; Isa 10:10, 11. Nimugira ngu hariho ruhanga omuri baaruhanga b'abanyamahanga orajunire ensi ye omu mikono y'omugabe wa Asiria? 34#2 Bag 19:13; Isa 10:9. Mbwenu baaruhanga ba Hamasi na Arupaadi barahi? na baaruhanga ba Sefavaimu, ba Hena n'aba Iiva barahi? Barajunire Samaria omu mikono yangye? 35#Dan 3:15. Ni baahi omuri baaruhanga boona ab'ezo nsi abarajunire ensi yaabo omu mikono yangye, mukabona kwesiga ku MUKAMA arikwija kwiha Yerusaalemu omu mijono yangye?

36Abantu baahunama, tibaagira ki baamugarukamu, ahabw'okuba ekiragiro ky'omugabe kikaba nikigira kiti: Mutamugarukamu. 37Bwanyima Eliakimu mwene Hilukia omukuru w'ekikaari, na Shebuna omuhandiiki, na Yoa mwene Asafu omuhandiiki w'ebirikubaho baija ahari Hezekia bataagwire ebijwaro byabo, baamuteekyerereza ebigambo bya Rabushaake.

Currently Selected:

2 Abagabe 18: RR64

Highlight

Copy

Compare