2 Abagabe 19

Okushaba kwa Hezekia

1 # 2 Bus 32:20-22; Isa 37:1-38. Omugabe Hezekia ku yaabihuriire, yaataagura ebijwaro bye, yaajwara ekiguniya, yaaza omu nju ya MUKAMA. 2Yaatuma Eliakimu omukuru w'ekikaari na Shebuna omuhandiiki n'abanyamurwa abakuru ahari nabi Isaaya mwene Amozi bajwaire ebiguniya. 3Baamugira bati: Oku nikwo Hezekia arikugamba naagira ati: Eri izooba n'eizooba ry'obusaasi n'okuhanwa n'okuteererwa enaku, ahakuba abaana bahikire kuzaarwa, kwona amaani g'okubazaara tigariho. 4#2 Bag 18:35; 19:16; 2 Sam 16:12. Shana MUKAMA Ruhanga waawe ahuriire ebigambo byona ebigambirwe Rabushaake, ou mukama we omugabe wa Asiria atumire kugaya Ruhanga otahwaho, obundi MUKAMA Ruhanga waawe akaamuhana ahabw'ebigambo ebyo ebi ahuriire; na'ahabw'ekyo imutsya eiraka ryawe oshabire abantu abakiriho abaahonokireho. 5Abaheereza b'omugabe Hezekia ku baahikire owa Isaaya, 6#2 Bag 18:17, 22-25, 30-35. Isaaya yaabagira ati: Mugambire mukama waanyu muti: Oku nikwo MUKAMA arikugamba naagira ati: Otatiina ebyo bigambo bi ohuriire, ebi abaheereza b'omugabe wa Asiria banjumire. 7#2 Bag 19:3. Reeba, niinyija kumutamu ogundi mutima, ahurire orukuru, agarukye omu nsi ye; kandi ku araahikyeyo, mmwitse rurara.

8Bwanyima Rabushaake yaagarukayo, yaashanga omugabe wa Asiria naarwanisa Libuna; ahabw'okuba akaba ahuriire ku arugire Lakishi. 9Omugabe ku yaahuriire ebya Tiruhaaka omugabe wa Esiopia nibagira ngu, Reeba aizire kukuteera, yaagaruka yaatuma ahari Hezekia naagira ati: 10#2 Bag 18:5, 30. Mwirooko mugire Hezekia omugabe wa Yuda muti: Otaikiriza Ruhanga waawe ogwo ou orikwesiga kukubeiha naakuraganisa ati: Yerusaalemu teriheebwayo mu mikono y'omugabe wa Asiria. 11Reeba, ohuriire oku abagabe ba Asiria baagizire ensi zoona, bakazicwekyerereza kimwe. Noogira ngu niiwe orikwija kukira? 12#2 Bag 18:33. Amahanga aga, Gozani, Harani, Rzefu, n'ab'omuri Edeni abaabaire batwire Telasaari, agu baatatenkuru baacwekyereize, noogira ngu baaruhanga baago bakagajuna? 13#2 Bag 18:34. Nyoreka omugabe wa Hamasi, n'owa Arupaadi, n'ow'orurembo Sefavaimu, n'owa Hena, n'owa Iiva!

14 # 2 Bus 32:17. Hezekia yaayakiira ebaruha eyaareetwa ezo ntumwa, yaagishoma; bwanyima yainamuka, yaija omu nju ya MUKAMA, yaagishashaanura omu maisho ge. 15#Kur 25:22; 1 Bag 18:39; Neh 9:6; Zab 86:10; Isa 37:16, 20; 44:6; Yer 10:10, 12. Hezekia yaashabira omu maisho ga MUKAMA naagira ati: Ai MUKAMA Ruhanga wa Israeli, otuura aha kitebe ky'obukama ahagati ya baakerubi, Iwe wenka niiwe Ruhanga ow'obugabe bwona obw'omu nsi; niiwe waahangire eiguru n'ensi. 16#2 Bus 6:40; Zab 31:2; 71:2; Dan 9:18. MUKAMA, tega okutu kwawe, ohurire; igura amaisho gaawe, ai MUKAMA, oreebe; ohurire ebigambo ebi Senakeribu atumire kurogota ahari Ruhanga otahwaho. 17N'ekya buzima, MUKAMA, abagabe ba Asiria bakacwekyereza abantu b'ago mahanga n'ensi zaabo, 18#2 Bus 32:19; Zab 115:4. baanaga baaruhanga baabo omu muriro, ahabw'okuba bakaba batari baaruhanga nyamuhanga, kureka bakaba bakozirwe engaro z'abantu omu biti n'omu mabaare; nikyo baabacwekyerereize. 19#Yos 4:24; Zab 83:18. N'ahabw'ekyo hati, ai MUKAMA Ruhanga waitu, ninkweshengyereza otujune, otwihe omu mikono ye, obugabe bwona obw'omu nsi, ai MUKAMA, bumanye ku niiwe wenka oba Ruhanga.

Isaaya okuragura ebiriba aha mugabe wa Asiria

20Bwanyima Isaaya mwene Amozi yaatuma ahari Hezekia naagira ati: Oku nikwo MUKAMA Ruhanga wa Israeli arikugamba naagira ati: Nk'oku onshabire kukuhwera aha bya Senakeribu omugabe wa Asiria, naakwikiriza. 21Eki nikyo kigambo eki MUKAMA amugambirieho naagira ati:

Omwishiki wa Saayuuni otakamanyaga mushaija

Naakugaya, naakushekyerera;

Kandi Yerusaalemu neekuzongoreza omutwe.

22 # 2 Bag 19:4-6; Zab 71:22; Isa 5:24; 60:9; Yer 51:5. N'oha ou ojumire, okarogotaho?

Kandi ou okabukiire, okateera ekitsyori n'oha?

N'Orikwera wa Israeli!

23 # 2 Bag 18:17; Zab 20:7; Isa 10:18. Ojumiise MUKAMA entumwa zaawe,

Noogira oti: Nyinamukire n'ebigaari byangye bingi

Aha mitwe y'enshozi,

Hare munonga ahagati ya Lebanooni.

Niinyija kutema emyereezi yaayo emiraingwa,

N'emiberooshi yaayo emirungi munonga;

Niinyija kuhika omu bweshereko bwayo hare munonga,

Omu kibira kyayo ekikwataine.

24 # Isa 19:6. Nkatimba amaziba g'abanyamahanga,

Naanywa amaizi gaago;

Naaribatiirira emigyera ya Misiri yoona,

Naagyomya.

25 # Isa 10:5; 45:7. Torahuriire ku naamaririire ira kukikora?

Omu biro bya ira nkacuma enaama y'okukora

Ebi ndikuhikiiriza omu biro ebi,

Ngu ocwekyereze endembo ezeehinguririziibwe engo z'amabaare,

Ozihindure amatongo.

26 # Zab 129:6. Nikyo kyareeteire abazitwiremu kucweka entegye,

Bakahahaaza omutima, bakarimbagirirwa,

Bakaba nk'obunyaatsi bw'omu ishwa,

Nk'obunyaatsi buto,

Bakahotoka nk'obunyaatsi obumezire aha mutwe gw'enju,

Nk'engano ezooma zitakakuzire.

27Kwonka nimmanya emishutamire yaawe,

Emihururire yaawe, n'emitabaarukire yaawe,

Kandi n'ekiniga eki wangiriire.

28 # 2 Bag 19:33-36; Yob 41:2; Isa 30:28; Ezk 29:4; 38:4; Amo 4:12. Ahabw'okungirira ekiniga,

Kandi nkahurira eby'amaryo gaawe,

Niinyija kukuta eirobo ryangye omu nyindo,

N'ekyoma kyangye omu kanwa,

Nkugarure omuhanda ogwakureetsire.

29 # 2 Bag 20:8, 9; 1 Sam 2:34; Isa 7:1, 14; Luk 2:12. Kandi aka karyakubeera akamanyiso; omu mwaka ogu nimwija kurya ebyemerize; omu gwa kabiri murye ebemerize eby'emiragarika y'ebyo, bwanyima omu mwaka gwa kashatu muryabiba mugyeshe, mubyare emizaabibu, murye ebijuma byayo. 30#2 Bus 32:22, 23. Abatsigaire aha b'enju ya Yuda abaahonokireho baryagaruka batsimbe emizi okuzimu, n'ahaiguru baane ebyana; 31#Isa 9:7; 10:20. ahakuba omuri Yerusaalemu haryarugamu ekicweka ekiriba kitsigaireho, n'aha rushozi Saayuuni harugyeho omutwe gw'abahonokireho. Obweziriki bwa MUKAMA buryakihikiiriza.

32Nikyo MUKAMA arikugambira aha mugabe wa Asiria naagira ati: Tarihika muri oru rurembo, nari okurwemurikira omumaisho aine engabo ye, n'obu kwakuba okurutuumaho omutuumo gw'eitaka. 33#2 Bag 19:28. Omuhanda ogwamureetsire nigwo gurimugarurayo; kandi taritaaha muri oru rurembo; nikwo MUKAMA arikugira; 34#1 Bag 11:13; 2 Bag 20:6; Isa 31:5. ahakuba ndyarinda oru rurembo, ndujune ahabwangye, n'ahabw'omwiru wangye Daudi.

Okucwekyerera kw'engabo za Senakeribu

35 # Kur 12:23; 2 Sam 24:16. Ekyo kiro maraika wa MUKAMA yaija, yaateera orusiisira rw'Abaasiria, yaitamu engabo z'Abaasiria akasiriira n'obukumi munaana n'enkumi itaano. Abantu ku baimukire omu kasheeshe, baashanga ezo ngabo zoona ziri emitumbi. 36Bwanyima Senakeribu omugabe wa Asiria yaarugayo, yaagaruka Nineeve, yaatuurayo. 37#2 Bag 17:31; Ezk 14:2. Ku yaabaire ari omuri nyaruju ya ruhanga we Nisirooki naamuramya, Adurameleki na Sharezeeri abatabani baija baamwitsa rurara, baacwa, baahungira omu nsi ya Araraati. Esari-hadooni omutabani yaategyeka omu mwanya gwe.

Currently Selected:

2 Abagabe 19: RR64

Highlight

Copy

Compare