2 Abagabe 12

Eby'omu busingye bwa Yoasi

1Omu mwaka gwa mushanju ogw'omu busingye bwa Yehu, Yoasi akatandika kutegyeka, yaategyekyera omuri Yerusaalemu emyaka makumi ana. Eiziina rya nyina akaba ari Zibia owa Beeri-sheba. 2Yoasi yaakora ebirikusiimwa MUKAMA ebiro byona ebi yaamazire naahaburwa Yehoyaada omunyamurwa. 3#1 Bag 15:14; 22:43; 2 Bag 14:4; 15:35. Kwonka emyanya mikuru ey'okuramizamu teraihirweho, kureka abantu bakagumizamu nibgitambiramu ebitambo, kandi nibootereramu obubaane.

4 # Kur 35:5; 2 Bag 22:4-6; 1 Bus 29:9. Yoasi yaagambira abanyamurwa ati: Empiiha zoona ez'ebintu ebishoroirwe ezireetsirwe omu nju ya MUKAMA, n'empiiha z'abantu boona, nk'oku buri muntu arikucwerwa, kandi n'empiiha ezi omuntu weena arikwesiimira kureeta omu nju ya MUKAMA aihire aha mutima, 5abanyamurwa bazitware, buri omwe aziihe ahari mugyenzi we, bazihunduuze enju, ahi esiisikaire hoona. 6Kwonka okuhitsya omu mwaka gwa makumi ashatu ogw'omu busingye bwa Yoasi, abanyamurwa bakaba bataine ki baahundwize kyona ahari egyo nju. 7Nikyo omugabe Yoasi yaatumiire Yehoyaada omunyamurwa n'abandi banyamurwa, akababuuza ati: Ahabw'enki mutarikuhunduuza enju? Mbwenu murekyere ahao kwiha empiiha ahari bagyenzi baanyu, kureka muziheyo ahabw'okuhunduuza enju. 8Batyo abanyamurwa baikiriza kutagaruka kwiha empiiha aha bantu, n'obu kwakuba okuhunduuza enju.

9 # Mak 12:41; Luk 21:1. Bwanyima Yehoyaada omunyamurwa yaareeta eshanduukye, yaafumura ekifundikizo kyayo, yaagita haihi n'eitambiro aha rubaju rwa buryo omuntu yaaba naataaha omu nju ya MUKAMA; kandi abanyamurwa abaabaire barinda eirembo baaguma nibatamu empiiha zoona ezaabaire nizireetwa omu nju ya MUKAMA. 10Ku baabaire bareeba empiiha zaaba nyingi omuri egyo shanduukye, omuhandiiki w'omugabe n'omunyamurwa omukuru baija, bazibara, bazikoma omu nshaho, zoona ezi bashanga omu nju ya MUKAMA. 11Bwanyima ezo mpiiha ezi babazire baziha abakozi abarikureeberera enju ya MUKAMA; nabo baziha ababaizi n'abombeki abarikukora egyo nju, 12#2 Bag 22:5, 6. n'abarikwombekyesa amabaare, n'abarikugashara; ezindi bazihayo kugura embaaho n'amabaare agabaizire eby'okuhunduuza enju ya MUKAMA, n'ahabw'ebindi byona ebirikwetengwa kuhunduuza egyo nju. 13#1 Bag 7:50; 2 Bus 24:14. Kwonka ezo mpiiha ezi baabaire bareeta omu nju ya MUKAMA tibarazikoreise bikopo by'efeeza, nari makansi z'entambi, nari enyabya, nari amakondere, n'obu byakuba ebindi bintu by'ezaabu nari eby'efeeza, 14kureka zo bakaba baziha abakozi abarikuzikoresa enju ya MUKAMA. 15#2 Bag 22:7. Kandi abo bashaija abu baabaire baha empiiha z'okwihura abakozi, bakaba batababuuza oku zikoresiibwe, ahabw'okuba bakaba bazikoresa n'obwesigwa. 16#Lev 4:24, 29; 5:15, 18; 7:7; Kub 18:19. Empiiha z'empongano z'okwihaho orubanja, n'ez'empongano z'ekibi zikaba zitareetwa mu nju ya MUKAMA; zikaba ziba ez'abanyamurwa.

17 # 1 Bag 19:17; 2 Bag 8:12; 2 Bus 24:23, 24. Omu biro ebyo Hazaeli omugabe wa Siria akainamuka, yaarwanisa Gaasi, yaagikubuura. Bwanyima Hazaeli amaisho ge yaagata ahari Yerusaalemu, kwinamukayo kugiteera. 18#1 Bag 15:18; 2 Bag 14:14. N'ahabw'ekyo Yoasi omugabe wa Yuda yaatwara ebintu byona ebirikwera ebyahairwe baishenkuru, Yehoshafaati na Yehoraamu na Ahazia abagabe ba Yuda, hamwe n'ebintu bye ahabwe ebi yaahaireyo, kandi n'ezaabu yoona eyaashangirwe omu mabiikiro g'enju ya MUKAMA n'ag'enju y'omugabe, yaabitwekyera Hazaeli omugabe wa Siria. Atyo Hazaeli yaaruga ahari Yerusaalemu.

19Mbwenu endiijo mirimo ya Yoasi n'ebi yaakozire byona tibihandiikirwe omu kitabo ky'eby'obusingye bw'abagabe ba Yuda? 20#2 Sam 5:9; 2 Bag 14:5; 2 Bus 24:25-27. Bwanyima abagaragwa be baimuka, baamugiira omu naama, baamwitira omu nju ya Miilo omu muhanda gurikushuuma Siila; 21abo bagaragwa be abaamuteire akafa, ni Yozakaari mwene Shimeasi na Yehozabadi mwene Shomeri. Yaaziikwa omu rurembo rwa Daudi, yaashanga baishenkuru; Amazia omutabani yaategyeka omu mwanya gwe.

Currently Selected:

2 Abagabe 12: RR64

Highlight

Copy

Compare