2 Abagabe 13
13
Eby'omu busingye bwa Yehoahazi
1Omu mwaka gwa makumi abiri n'eshatu ogw'omu busingye bwa Yoasi mwene Ahazia omugabe wa Yuda, Yehoahazi mwene Yehu akatandika kutegyekyera Israeli omuri Samaria, yaamara aha ngoma emyaka ikumi na mushanju. 2#1 Bag 14:16. Yaakora ebirikwangwa MUKAMA, yaakurata Yeroboamu mwene Nebati omu bibi bye ebi yaasiisiise Israeli, tiyaabireka. 3#Bar 2:14; 2 Bag 8:12. MUKAMA yaagirira Israeli ekiniga, yaaguma naabahayo omu mikono ya Hazaeli omugabe wa Siria, n'omu mikono ya Benihadadi omutabani. 4#Kur 3:7, 9; 32:11; 2 Bag 14:26; Zab 78:34. Bwanyima Yehoahazi yaayeshengyereza MUKAMA, MUKAMA yaamuhurira; ahakuba akareeba okwitwa kubi kw'Abaisraeli, oku omugabe wa Siria yaabaire naabaita kubi. (5#Bar 3:9; Neh 9:27. N'ahabw'ekyo MUKAMA yaaha Abaisraeli omujuni, baaruga omu mikono y'Abaisria; batyo Abaisraeli baatuura omu maka gaabo nk'omu biro bya ira. 6#1 Bag 16:33. Kwonka tibaaruga mu bibi by'enju ya Yeroboamu, ebi yaasiisiise Israeli; baaguma nibabigyenderamu; kandi na Ashera nazo zaaguma omuri Samaria.) 7#Amo 1:3. Ahabw'okuba Yehoahazi taratsigaize bantu, kureka ab'aha mbaraasi makumi ataano, n'ebigaari, n'engabo ezirikugyendesa ebigyere kakumi ahakuba omugabe wa Siria akabacwekyereza, yaabagira nk'omucuucu gw'aha mbuga. 8Mbwenu endiijo mirimo ya Yehoahazi n'ebi yaakozire byona n'eby'amaani ge tibihandiikirwe omu kitabo ky'eby'omu busingye bw'abagabe ba Israeli? 9Atyo Yehoahazi yaagwejegyera, yaashanga baishenkuru, baamuziika omuri Samaria; Yehoashi omutabani yaategyeka omu mwanya gwe. 10Omu mwaka gwa makumi ashatu na mushanju ogw'omu busingye bwa Yoasi omugabe wa Yuda, Yehoashi mwene Yehoahazi akatandika kutegyekyera Israeli omuri Samaria, yamara aha ngoma emyaka ikumi na mukaaga. 11Nawe yaakora ebirikwangwa MUKAMA, tiyaareka bibi bya Yeroboamu mwene Nebati ebi yaasiisiise Abaisraeli, kureka yaaguma naabigyenderamu. 12#2 Bag 14:8-14. Mbwenu endiijo mirirmo ya Yehoashi, n'ebi yaakozire byona, n'eby'amaani ge, agu yaarwaniise naarwana na Amazia omugabe wa Yuda, tibihandiikirwe omu kitabo ky'eby'omu busingye bw'abagabe ba Israeli? 13Atyo Yehoashi yaagwejegyera, yaashanga baishenkuru, Yeroboamu yaaza aha kitebe kye ky'obugabe, bwanyima Yehoashi yaaziikwa Samaria hamwe n'abagabe ba Israeli.
Okufa kwa Elisa
14 #
2 Bag 2:12. Yehoashi omugabe wa Israeli, ku yaabaire akiri aha ngoma, Elisa yaakwatwa endwara eyaamwitsire; omugabe yaashuuma kumwinamira, yaamuririra, naagira ati: Ai bambe Taata! Taata! Ebigaari bya Israeli n'ab'aha mbaraasi baayo! 15Elisa yaamugira ati: Kwata obuta n'emyambi. Atyo yaabikwata. 16Yaagaruka yaamugira ati: Nanuura obuta! Yaabunanuura; Elisa yaata engaro aha z'omugabe. 17Bwanyima yaagira ati: Igura edirisa erikureeba oburugwa-izooba. Onu yaagiigura. Elisa yaamugira ati: Rasha. Onu yaarasha. Yaagaruka yaagira ati: Ogwo n'omwambi gwa MUKAMA gw'obusinguzi ogw'okusingura Siria! Ahakuba noija kuranira omuri Afeki n'Abasiria, okuhitsya obu oraabaite okabamaraho. 18Bwanyima yaagira omugabe wa Israeli ati: Kwata emyambi. Onu yaagikwata. Yaagaruka yaamugira ati: Giteere ahansi. Yaagiteera ahansi kashatu, yaarereera. 19Ogwo mushaija wa Ruhanga yaamugwerwa kubi, yaamugira ati: Waaba oshemereire kugiteera ahansi emirundi etaano nari mukaaga; haza obwo obona kusingura Abaisiria, obamariraho kimwe; kwonka hati noija kubasingura emirundi eshatu yonka.
20 #
2 Bag 1:1; 3:7; 24:2. Atyo Elisa yaafa, baamuziika. Kandi omu biro ebyo emitwe y'Abamoabu ekaba eteera ensi aha kutandika kw'omwaka. 21Eizooba rimwe ku baabaire nibaziika omuntu, baareeba omutwe gw'abanyagi, baamutambika omu kituuro kya Elisa; omutumbi ku gwahikire guti ha magufa ga Elisa, ogwo muntu yaahimbuuka, yaimuka, yaayemerera.
Okufa kwa Hazaeli omugabe wa Siria
22 #
2 Bag 8:12. Omu busingye bwona obwa Yehoahazi, Hazaeli omugabe wa Siria akaita kubi Abaisraeli; 23#Kur 2:24, 25; 32:13; 2 Bag 14:27. Kwonka MUKAMA akaba abagirira embabazi n'esaasi, abataho omutima ahabw'endagaano ei yaaragaine na Abarahamu, Isaaka na Yakobo, kandi akaba atacwekyereza, n'obu kwakuba kubabingira kimwe omu maisho ge omu biro ebyo.
24Hazaeli omugabe wa Siria ku yaafiire, Beni-hadadi omutabani yaategyeka omu mwanya gwe. 25#2 Bag 10:32; 14:25. Bwanyima Yehoashi mwene Yehoahazi yaiha ahari Benihadadi mwene Hazaeli endembo ezi Hazaeli yaabaire anyagire ahari ishe omu bweme. Yehoashi yaamusingura kashatu, yaagarura endembo za Israeli.
Currently Selected:
2 Abagabe 13: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
