2 Abagabe 11

Atalia nyin'omugabe okucwekyereza abaana b'omutabani

1 # 2 Bag 8:26; 2 Bus 22:10-12. Atalia nyina wa Ahazia ku yaareebire omutabani yaafa, yaimuka, yaacwekyereza abanyiginya boona. 2#2 Bag 11:21; 12:1. Kwonka Yehosheba muhara w'omugabe Yehoraamu, munyaanya wa Ahazia, yaatwara Yoasi mutabani wa Ahazia, yaamwiha omuri batabani b'omugabe, abu baabaire nibenda kwita, yaamucwisa n'omurezi we, yaabata omu kishengye ky'okuraaramu. Atyo yaamushereka Atalia, tiyaitwa; 3yaaguma nawe asherekirwe omu nju ya MUKAMA okumara emyaka mukaaga; obwo Atalia naategyeka ensi.

Okwemekwa kwa Yoasi

4 # 2 Bus 23:1-21. Bwanyima omu mwaka gwa mushanju Yehoyaada yaatuma abakuru b'Abakariiti n'ab'abarinzi b'engabo igana-igana, yaaragiira ku bamushanga omu nju ya MUKAMA; yaaragaana nabo endagaano, kandi yaabarahiriza omu nju ya MUKAMA; ku yaaherize, yaabooreka omwana w'omugabe. 5#1 Bus 9:25. Yaabaragiira, naabagira ati: Oku nikwo muraatwaze. Kimwe kya kashatu kyanyu, abaija aha murimo ahari Sabato, barinde enju y'omugabe; 6kimwe kya kashatu ekindi kize aha irembo rya Suuri; kandi ekindi kigume aha irembo enyima y'abarinzi; 7ebyo bicweka byanyu byombi, eby'abaihwa aha murimo, birinde enju ya MUKAMA beehinguririize omugabe. 8Mutyo mugume mukiikiize omugabe embaju zoona, buri muntu akwaitse eby'okurwanisa bye omu ngaro. Omuntu weena oraayende kutaaha omu mishorongo yaanyu, mumwite. Imwe mugume n'omugabe yaaba naashohora, kandi yaaba naataaha. 9Abakuru b'engabo baakorabyona ebi Yehoyaada omunyamurwa yaaragiira, buri omwe yaareeta abashaija be ab'okwija aha murimo ahari Sabato, hamwe n'ab'okwihwa aha murimo ahari Sabato, baija ahari Yehoyaada omunyamurwa. 10#2 Sam 8:7. Omunyamurwa yaaheereza abo bakuru b'engabo amacumu n'engabo ebyabaire biri eby'omugabe Daudi bibiikirwe omu nju ya MUKAMA; 11abarinzi baayemerera, buri muntu akwaitse eby'okurwanisa bye omu ngaro, okuruga aha rubaju rw'enju rw'obukiizi-bwa-buryo, okuhika aha rwa bumosho, beehinguririize eitambiro n'enju. 12#Kur 31:18. Bwanyima Yehoyaada yaashohoza omwana w'omugabe, yaamujweka ekirunga aha mutwe, yaamuha Eby'okuhamya; baamuranga ku yaaba omugabe, baamushukaho amajuta, baateera omu ngaro nibagira bati: Omugabe naakaramaare!

13Atalia ku yaahuriire orwari rw'abarinzi n'abantu, yaataaha omu nju ya MUKAMA ahu abantu bari; 14#2 Bag 23:3. ku yaanagire amaisho, yaareeba omugabe ayemereire aha rubaju rw'enyomyo, nk'oku omugyenzo gwabaire guri, n'abakuru b'engabo n'ab'amakondere bamwemereire aha rubaju, n'abantu boona ab'omuri egyo nsi nibashemererwa, nibateera amakondere. Ahonaaho Atalia yaataagura ebijwaro bye, naagira ati: Okwebumba! Okwebumba! 15Yehoyaada omunyamurwa yaaragiira abakuru b'engabo abaabaire nibategyeka eihe, naagira ati: Mumurabye omu ngabo, mumushohoze; oraamukurate weena, mumwite na rurara. Ahabw'okuba omunyamurwa akagira ngu arekye kwitirwa omu nju ya MUKAMA. 16Batyo baamutaho engaro, baamurabya omu irembo ry'embaraasi, baamuhitsya ahari nyaruju y'omugabe, baaba niho baamwitira.

17 # Yos 24:25; 2 Sam 5:3. Bwayima Yehoyaada yaaragaanisa omugabe n'abantu endagaano na MUKAMA kuba abantu be; kandi yaagaruka yaaragaanisa omugabe n'abantu endiijo ndagaano. 18#Bir 12:3; 2 Bag 10:21, 23, 26. Okuruga aho abantu boona ab'omuri egyo nsi baaza ahari nyaruju ya Baali, baagisheenya; amatambiro ge n'ebishushani bye baabisheenyagurira kimwe, baitira Mataani omunyamurwa wa Baali omu maisho g'ago matambiro. Kandi omunyamurwa yaata abarinzi aha nju ya MUKAMA. 19Bwanyima yaatwara abakuru b'engabo, Abakariti, abarinzi, n'abantu boona ab'omuri egyo nsi, baiha omugabe omu nju ya MUKAMA, baamushuumya, baamurabya omu irembo ry'abarinzi, baamutaasya omuri nyaruju y'omugabe, yaashutama aha kitebe ky'obugabe. 20Batyo abantu boona ab'omuri egyo nsi baashemererwa; kandi Atalia ku yaaherize kwitirwa aha nju y'omugabe na rurara, haabaho okutuuza omu rurembo. 21#2 Bus 24:1-14. Yoasi akatandika kutegyeka ahikize emyaka mushanju.

Currently Selected:

2 Abagabe 11: RR64

Highlight

Copy

Compare