1 Samueli 17

Daudi okwita Goliasi

1Omu bunaku obwo Abafilistia bakateerana engabo zaabo kurwana; baateeranira Sooko eya Yuda, baateera orusiisira Efesi-damimu, ahagati ya Sooko na Azeka. 2Saulo n'Abaisraeli nabo baateerana, baateera orusiisira omu ruhanga rwa Ela, baatenga orugamba kurwana n'Abafilistia. 3Abafilistia baayemerera aha kibungo seeri, n'Abaisraeli baayemerera seenu aha kindi; oruhanga rubari ahagati. 4#2 Sam 21:19; Yos 11:22. Bwanyima omu rusiisira rw'Abafilistia haarugamu emanzi rugambwa, orikwetwa Goliasi owa Gaasi; oburaingwa bwe bukaba buri mikono mukaaga n'ekita; 5akaba ajwaire enkofiira y'omuringa aha mutwe, n'eky'okujwara ky'ekyoma, oburemeezi bwakyo shekeli z'omuringa enkumi itaano; 6aha maguru ajwaireho ebyoma by'okukingira emirundi, aine akacumu k'omuringa ahagati y'amabega ge; 7#2 Sam 21:19; 1 Bus 11:23. orubango rw'eicumu rye ruri nk'empimbi ei barukiraho emyenda; okuremeera kw'ekyogi kyaryo ziri shekeli z'ekyoma magana mukaaga, kandi omukwatsi w'engabo ye amwebembeire. 8Yaija yaayemerera, yaagambira amahe ga Israeli n'eiraka rihango, ati: Mbwenu mweruhiize ki kwija kutenga orugamba? Tindi Omufilistia? Naimwe timuri engabo za Saulo? Mwetooranire omushaija, ashuume tubugaabugane. 9Ku arandwanise, yaanyita, nitwija kuba abairu baanyu; kwonka ku ndamusingure, naamwita, naimwe nimwija kuba abairu baitu, nimutukorera. 10#Kub 23:7, 8. Omufilistia yaagaruka yaagira ati: Nimpiga amahe ga Israeli eri izooba; nimumpe omushaija, turwane. 11Saulo n'Abaisraeli boona ku baahuriire ebigambo by'ogwo Mufilistia, baahahaara, baatiina munonga.

12 # Rus 4:22; 1 Sam 16:1, 10, 11. Kandi Daudi akaba ari omwana w'Omunyefuraata owa Betelehemu-Yuda, orikwetwa Yese; omushaija ogwo akaba aine abatabani munaana; omu biro bya Saulo akaba ari omugurusi, yaahikire omu ngingo zaabukuru. 13Abatabani abakuru bashatu bakaba bahurwire na Saulo; amaziina g'abo batabani bonshatu gakaba gari aga; ow'omujigaijo Eliabu, ow'omushubiro Abinadabu, n'owa kashatu Shaama. 14Daudi akaba ari muto waabo boona, kandi bakuru be abo bonshatu nibo baabaire bahurwire na Saulo. 15Kwonka Daudi akaba aza owa Saulo, kandi agaruka Betelehemu kuriisa entaama za ishe. 16Kandi ogwo Mufilistia akaba aija buri kasheeshe na buri mwabazyo, abeeringiita omumaisho, okumara ebiro makumi ana.

17Eizooba rimwe Yese akagira Daudi omutabani ati: Irooko ogyemurire bakuru baawe eefa y'engano zikarangire n'egi migaati ikumi, obibatwarire juba omu rusiisira; 18#Kut 37:14. kandi ezi ncumate ikumi za ciizi ozitwarire omukuru w'engabo rukumi ezi barimu; oreebe bakuru baawe oku bari, haza ondeetere amakuru agarikubarugaho.

19Omu bunaku obwo Saulo n'abo bashaija n'Abaisraeli boona bakaba bari omu ruhita rwa Ela nibarwana n'Abafilistia. 20Daudi yaaguruka kare omu kasheeshe, entaama yaazitsigira omurinzi, yaakwata ebyo bintu, yaagyenda nk'oku Yese amuragiire; yaahikira ahu baabaire beemereize ebigaari, yaashanga engabo nizihiga, nizishohora kurwana. 21Abaisraeli n'Abafilistia baatenga orugamba, engabo zaasyamirana n'ezindi. 22Daudi yaakwatsa omurinzi w'eby'orugamba embintu bye, yairuka, yaayeroha omu ngabo, yaahika bakuru be, yaabaramutsya. 23Ku yaabaire naakigaaniira nabo, egyo manzi rugambwa, Omufilistia wa Gaasi orikwetwa Goliasi, yaasyoka omu ngabo z'Abafilistia, yaatandika kuhiga nk'oku abaire naahiga; Daudi yaabihurira. 24Abaisraeli boona, ku baareebire ogwo mushaija, baamuhunga; baatiina munonga. 25#Yos 15:16. Abaisraeli baagira bati: Ebyo ogwo mushaija waasyokayo mwamureeba? Buzimazima yaija kuhiga Israeli; omuntu oraamwite, omugabe naija kumutungisa munonga, amuhingire muhara we, kandi ahe omuryango gwa ishe obusingye omuri Israeli. 26#Yer 10:10. Bwanyima Daudi yaabuuza abashaija abaabaire bamwemereire aha rubaju ati: Oraite ogwo Mufilistia, yaiha aha Baisraeli ekijumo, naija kukorerwa ki? Beitu shi, oriya Mufilistia otashazirwe niwe oha kwehanga kuhiga amahe ga Ruhanga ohuriire? 27Abantu baamugarukamu nk'ebi ab'okubanza baagamba, bati: Oraamwite nikwo araakorewe atyo.

28 # Kut 37:4; Enf 18:19; 27:4. Kandi Eliabu mukuru wa Daudi yaahurira naagamba n'abo bashaija; yaamugirira ekiniga, yaamubuuza ati: Waashuumibwa ki kunu? Obutaama buri waabutsigira oha omu ihamba? Nimmanya amaryo gaawe n'obutigi bw'omu mutima gwawe; waareetwa okureeba orugamba. 29#Enf 15:1. Daudi yaamugarukamu ati: Mbwenu naashobya ki? Noogira ngu tiinyine kyandeeta? 30Yaamuteera amabega, yaahindukira ondiijo, nawe yaamubuuza nk'ebyo; abantu baamugarukamu nk'okubanza.

31Abantu ku baahuriire ebi Daudi yaagamba, baagaruka baabigambira omu maisho ga Saulo; Saulo yaamutuma. 32#Bir 20:3. Daudi yaagira Saulo ati: Hatagira owaahahaaza omutima ahabw'ogwo Mufilistia; omwiru waawe yaaza kurwana nawe. 33#Kub 13:31. Saulo yaagira Daudi ati: Torikubaasa kuturukirira ogwo Mufilistia kurwana nawe, ahabw'okuba okiri muto, kandi we n'omushaija omanyiire engamba okwiha omu buto. 34Daudi yaagarukamu Saulo ati: Nyowe, omwiru waawe, nkaba ndiisa entaama za tata; ku haabaire haija entare nari edubu, yaakwata omwana gw'entaama omu busyo, 35nkaba ngikurata, ngiteera, ngugiiha omu kanwa; ekinyijaijana, ngikwata akareju, ngiteera, ngiita. 36Omwiru waawe akaita entare n'edubu; n'Omufilistia ogwo otashazirwe naija kuba nk'emwe aharizo, ahabw'okuba ahigire amahe ga Ruhanga ohuriire. 37#2 Kor 1:10; 2 Tim 4:17, 18. Daudi yaagaruka yaagira ati: MUKAMA owaanyihire omu byara by'entare n'omu byara by'edubu, naija kunjuna n'omu mikono y'ogwo Mufilistia. Saulo yaagira Daudi ati: Irooko, MUKAMA agume naiwe.

38Bwanyima Saulo yaihayo ebijwaro bye eby'okurwanisa, yaabijweka Daudi; yaamuta enkofiira y'omuringa aha mutwe, yaamujweka ekooti y'ekyoma; 39Daudi yaahagatirira rurara ahari ebyo bijwaro. Yaateeraho kugyenda, byayanga; ahakuba akaba atabimanyiire. Daudi yaagira Saulo ati: Tindikubaasa kugyenda njwaire ebi; ahakuba timbimanyiire. Atyo Daudi yaabijuura. 40Yaakwata enkoni ye omu ngaro, yaayetooranira amabaare ataano omu kagyera, yaagata omu kashaho k'omunda ak'omu furebe y'omuriisa ei yaabaire aine; kandi akaba aine enjungu ye omu ngaro; yairira haihi Omufilistia.

41Omufilistia nawe yaija, yairira haihi Daudi, omukwatsi w'engabo ye amwebembeire. 42#1 Kor 1:27, 28. Omufilistia ku yaizire naamagamaga, yaareeba Daudi, yaamugaya; ahakuba akaba ari omutsigazi muto, orikwera, oine ahamaisho harungi. 43Omufilistia yaagira Daudi ati: Obu orikumpururira n'enkoni, onyetsire embwa? Yaamukyeenesa baaruhanga be. 44#1 Bag 20:10, 11; Yer 9:23. Yaagaruka yaamugira ati: Ija nkubaagire amahungu g'omu mwanya n'enyamaishwa z'omu ihamba. 45#2 Bus 32:8; Zab 124:8; 2 Kor 10:4; Fil 4:13. Daudi yaagira Omufilistia ati: Wampururira na rurara n'eicumu n'akacumu; kwonka nyowe naija omu iziina rya MUKAMA ow'amahe, Ruhanga w'engabo za Israeli, ezi ohigire. 46#1 Bag 18:36; 2 Bag 19:19. Eri izooba MUKAMA naakuhayo omu mikono yangye, ninkuteera, noogwa, ninkucwaho omutwe; kandi eri izooba niinyija kugaburira amahungu g'omu mwanya n'enyamaishwa z'omu ihamba emitumbi y'engabo z'Abafilistia, haza ensi yoona neemanya ku habaho Ruhanga omuri Israeli, 47#Hos 1:7; Zek 4:6. kandi n'omutwe gwona oguri aha nigumanya ku MUKAMA atajunisa rurara na icumu; ahabw'okuba orugamba oru n'orwa MUKAMA, kandi naija kubahayo omu mikono yaitu.

48Omufilistia ku yaarugire ahu yaabaire ari, yaija kubugaabugana na Daudi, Daudi yaija nairuka agyemire ahu baabaire batengire orugamba kubugaabugana n'ogwo Mufilistia. 49Yaata omukono gwe omu furebe, yaihamu eibaare, yaarirekyera, yaariteera Omufilistia omu buso, ryahweramu, yaagwa ajuumaire. 50#Bar 3:31; 15:15. Okwo nikwo Daudi yaasingwize Omufilistia eibaare ry'enjungu, akamuteera, akamwita; kwonka Daudi akaba ataine rurara mu ngaro. 51#1 Sam 21:9. Daudi yairuka, yaaza aha Mufilistia, yaamwemereraho, yaakwata rurara ye, yaagisyora omu kyobati kyayo, yaagimwitsa, yaamucwaho omutwe. Abafilistia ku baareebire emanzi yaabo yaafa, baahunga. 52Abaisraeli n'Abayuda baimuka, baateera akaari, baabinga Abafilistia okuhika Gaasi n'aha marembo ga Ekurooni; emputa z'Abafilistia zaagyenda nizigwa aha muhanda ogurikuruga Sharaimu okuhika Gaasi na Ekurooni. 53Bwanyima Abaisraeli baarekyera aho kubinga Abafilistia, baagaruka, baanyaga orusiisira rwabo. 54Daudi yaatwara omutwe gw'Omufilistia, yaaguhitsya Yerusaalemu; kwonka eby'okurwanisa bye yaabita omu ihema rye.

55 # 1 Sam 16:21, 22. Saulo ku yaareebire Daudi naaza kurwana n'Omufilistia, yaabuuza Abuneeri omukuru w'engabo ze ati: Abuneeri, hari oriya mwojo ni mwene oha? Abuneeri yaamugarukamu ati: Buso bwawe, Nyakusinga, tindikumumanya. 56Omugabe yaagira ati: Irooko obuuririze ishe w'ogu mwojo. 57Kandi Daudi ku yaatabaarukire ati naaruga kwita Omufilistia, Abuneeri yaamutwara omu maisho ga Saulo, aine omutwe gw'Omufilistia omu ngaro. 58#Isa 11:1, 10. Saulo yaamubuuza ati: Ori mwene oha, mutsigazi 'we? Daudi yaagarukamu ati: Ndi mwene Yese omwiru waawe owa Betelehemu.

Currently Selected:

1 Samueli 17: RR64

Highlight

Copy

Compare