1 Eby'omu Busingye 16

Obugyenyi bw'okugarura eshanduukye

1 # 1 Bus 15:1. Batyo baataasya enshanduukye ya Ruhanga, baagita omu ihema eri Daudi agiteereireho; baatamba ebitambo by'okwotsya n'empongano z'okusiima ahabw'obusingye omu maisho ga Ruhanga. 2Daudi ku yaaherize kutamba ebyo bitambo by'okwotsya n'empngano z'okusiima ahabw'obusingye, yaashabira abantu omugisha omu iziina rya MUKAMA, 3yaagaburira Abaisraeli boona, abashaija n'abakazi, buri muntu omugaati gumwe, entongo y'enyama kandi n'omwate gw'emizaabibu eyomire. 4Kandi yaataho Abaleevi bamwe kukora omurimo gw'obuheereza omu maisho g'eshanduukye ya MUKAMA, okuguma nibaijutsya, okusiima n'okuhimbisa MUKAMA, Ruhanga wa Israeli. 5#1 Bus 6:39. Omukuru waabo yaaba Asafu, yaakuratwa Zekaria, Yeyeli, Shemiramoosi, Yehieli, Matisiya, Eliabu, Benaaya, Obededomu na Yeyeli, abaatairweho kuteera enanga n'endingiri; Asafu we yaaba ow'okuteera ebitaasa, 6Benaaya na Yahazieli abanyamurwa baaba ab'okuguma nibateerera amkondere omu maisho g'eshanduukye y'endagaano ya Ruhanga.

Zaaburi y'okusiima Ruhanga

7Eryo izooba nibwo Daudi yaatandika kutaho Asafu na beene ishe kuba ab'okusingiza MUKAMA.

8 # Zab 105:1-15. Musiime MUKAMA, murangaane eiziina rye,

Mumanyise ebi yaakozire omu mahanga!#Zab 145:11, 12; Isa 12:4.

9Mumweshongorere, mweshongore eby'okumuhimbisa,

Mugambire abantu eby'emirimo ye yoona ey'okutangaaza!

10Mwesiime ahabw'eiziina rye eririkwera;

Emitima y'abarikusherura MUKAMA eshemererwe!

11 # Zab 24:6; 27:8. Musherure MUKAMA n'amaani ge,

Mwetengye okuguma omu maisho ge obutoosha.

12 # Zab 77:11; 143:5. Mwijukye emirimo ye ey'okutangaaza

N'ebitakareebwaga ebi yaakozire, n'emanja ezi yaacwire,

13Imwe ab'oruzaaro rw'omwiru we Abrahamu,

Abaana ba Yakobo abu yaatooraine.

14 # Isa 26:9. Niwe MUKAMA Ruhanga waitu,

Emicwere ye eri omu nsi yoona;

15Aijuka endagaano ye ebiro byona,

Ekigambo eki yaaragiire ab'obusingye rukumi,

16 # Kut 17:2; 22:16; 26:3; Luk 1:73. Niyo ndagaano ei yaaragaine na Abrahamu,

Ei yaarahiire naaraganisa Isaaka,

17 # Kut 35:11, 12. Akagihamiza Yakobo kuba ekiragiro,

Na Israeli okuba endagaano etarihwaho,

18 # Kut 13:15; 15:18-21. Naagira ati: Niiwe ndiha ensi ya Kanaani,

Kuba omugabo gw'obuhunguzi bwanyu.

19 # Bir 7:7; 26:5; Heb 11:9. Obu baabaire bakiri bakye,

Eego bakye munonga kandi abashuhuuki omu nsi egyo,

20Nibazengyerera omu mahanga agatari gamwe,

Okuruga omu bugabe bumwe okuza omu bundi,

21 # Kut 12:17; 20:3. Taraikiriize muntu weena kubakora kubi,

Akateisa abagabe ahabwabo,

22 # Kut 20:7. Naagira ati: Mutakora aha bu naashukireho amajuta,

N'obu kwakuba okukora kubi baanabi bangye.

23 # Zab 96:1-13. Imwe abari omu nsi mwena, mweshongorere MUKAMA,

Mworekye okujuna kwe buri kasheeshe.

24Mumanyise ekitiinisa kye omu mahanga,

Emirimo ye ey'okutangaaza omu mahanga goona.

25 # Zab 95:3; 145:3. Ahakuba MUKAMA ni mukuru, ashamereire kuhimbisibwa munonga,

Kandi n'okutiinwa okukira baaruhanga boona.

26 # Lev 19:4; Zab 115:15; Isa 42:5; Yer 10:11, 12. Ahakuba baaruhanga boona ab'abantu baba ebishushani,

Kwonka Ruhanga niwe yaahangire eiguru.

27Ekitiinisa n'obukuru bimwebembeire;

Amaani n'okushemererwa biri ahi atuura.

28 # Zab 29:1. Imwe enganda z'amahanga, mugambe,

Mugambe ku MUKAMA aine ekitiinisa n'amaani,

29 # 2 Bus 20:21; Zab 29:2; 96:9. Mugambe ku MUKAMA aine ekitiinisa ekishemereire eiziina rye,

Mureete empongano, mwije omu maisho ge;

Muramye MUKAMA mujwaire ebirikwera;

30Muteteme omu maisho ge, imwe ab'omu nsi mwena;

Eego, endi ehamire, terikubaasa kutengyetsibwa.

31 # Isa 49:13. Eiguru rishemererwe, n'ensi eyesiime;

Bagambire omu mahanga nibagira bati: MUKAMA ari aha ngoma!

32 # Zab 93:1; 97:1; 98:7; 99:1; Isa 52:7; Kush 11:15, 17. Enyanja ehoorere, na byona ebiijwiremu,

Emisiri eyesiime n'ebirimu byona!

33Obwo nibwo emiti yoona ey'omu kibira eryeshongora

Ahabw'okushemererwa omu maisho ga MUKAMA,

Ahabw'okuba naija kucwera ensi orubanja.

34 # Zab 106:1; 107:1; 118:1; 136:1. Musiime MUKAMA, ahabw'okuba ni murungi,

Kandi embabazi ze n'ez'ebiro n'ebiro!

35 # Zab 106:47, 48. Kandi mugire muti: Otujune, ai Ruhanga ow'okujunwa kwaitu,

Otutaaruure, otujune nootwiha omu mahanga,

Tubone kusiima eiziina ryawe eririkwera,

Twesiimire okuhimbisibwa kwawe.

36 # 1 Bag 8:15; Zab 41:13. MUKAMA, Ruhanga wa Israeli, ahimbisibwe

Okwiha ira ryona okuhitsya ebiro byona.

Bwanyima abantu boona baagira bati: Amiina; baahimbisa MUKAMA. 37Atyo Daudi yaatsiga Asafu na beene ishe omu maisho g'eshanduukye y'endagaano ya MUKAMA kuguma nibakora omurimo gw'obuheereza omu maisho gaayo, nk'oku kyabaire nikyetengwa buri izooba; 38#1 Bus 26:4, 8, 10, 15, 16. yaatsigayo na Obededomu na beene ishe makumi mukaaga na munaana; kandi yaataho Obededomu mwnee Yedusuuni na Hoosa kuba abakumiirizi b'eirembo. 39#1 Bag 3:4; 1 Bus 15:11. Kandi yaatsiga Zadoki omunyamurwa na beene ishe abanyamurwa omu maisho g'eihema rya MUKAMA eryabaire riri omu mwanya mukuru gw'okuramizamu, ogwabaire guri gibeoni, 40#Kur 27:1; 29:38-46; Kub 28:3-8. kuguma nibatambirira MUKAMA ebitambo by'okwotsya aha itambiro ryabyo omu kasheeshe n'omu mwabazyo, nk'oku byona byabaire bihandiikirwe omu biragiro bya MUKAMA ebi yaaragiire Abaisraeli. 41#1 Bus 6:33; 25:1, 3, 6; 2 Bus 5:13; 7:3, 6; Ezr 3:11; Yer 33:11. Kandi hamwe n'abo yaataho Hemani na Yedusuuni n'abandi abaatoorainwe, abu amaziina gaabo gaagambirweho, kuba ab'okusiima MUKAMA ahabw'embabazi ze ezigumaho ebiro byona. 42#2 Bus 7:6; 29:27. Kandi Hemani na Yeduduuni abo bakaba bagira amakondere n'ebitaasa eby'okuteera, n'ebindi bintu by'okuteerwa ahabw'ebyeshongoro ebirikwera. Kandi baataho batabani ba Yedusuuni kuba ab'okurinda eirembo.

43Bwanyima abantu boona baayaabuuka, buri muntu yaaza owe, na Daudi yaagaruka owe kushabira eka ye omugisha.

Currently Selected:

1 Eby'omu Busingye 16: RR64

Highlight

Copy

Compare