ARoma 5

Murenddele ni ohagalala.

1Vowi odheela mwa nroromelo nnowiiriwa owogoowa ni Mulugu, nihikanna murenddele ni Mulugu odheela mwa Yesu Kirixtu Nabwiya eehu. 2Oliye dinifugulele dila wi voororomela naakele mahala Mulugu enanivahiiye, mukaraatiliihu dhiinova. Mowindo nnogayela moojejiha nthithimiho na Mulugu. 3Vano kahuwo eyeneve, eehi, nnohagalala mugoyini mweehu, vowi nnonona wi goyi enosuuziha ovilela, 4ovilelawo onodhiiha otthettheeliwa teto otthettheeliwa wula onodhiiha ojejihedha. 5Ojejihedha wula kunanikaliha manyazo, vowi Mulugu ohudhaaliha mmirimani mweehu ni odhivela waaye odheela Muneba Woweela onivahiliiye.

6Mwa mudhidhi olene hiyo vaaliihu oolodhowa Kirixtu ohaakwela athu oohumuriiha Mulugu. 7Soorusa vajinji orumeedha wi muthu amukwele owogoowa, kaahi akale ooliba murima apeleke egumi yaaye wi amvulumuse muthu apama. 8Mbwenye Mulugu ohooniha odhivela waaye ni hiyo mwa mukalelo ola: Kirixtu ohunikwela naari nigalive anamathega.

9Akala mwaha wa mwazi wa okwa waaye nihiiriwa owogoowa ni Mulugu, mowindo siibaribareene wi omamalelo wa elabo, Kirixtu onoodha anivulumuse mwa owali wa Mulugu. 10Naari naalive amwiiddani a Mulugu, nihaandanihiwa ni oliye odheela mwa okwa wa Mwaanaye. Mowindo dhiinova wona nihaandanihiwa ni Mulugu, ebaribari yeehu enoweenjedhedheya vajinji wi nneere ovulumusiwa odheela mwa egumi ya Mwaanaye. 11Kahuwo dhedhove teto nnogaya mwa Mulugu odheela mwa Nabwiya eehu Yesu Kirixtu, oyene onaandanihile dhiinova ni Mulugu.

Adamu ni Kirixtu

12Yoothega yahivolowa mwiilaboni ni muthu mmohi, yoothega eyo yahidhiiha okwa. Mwa mukalelo mmohive okwa ohaamwadheyela athu aatene, vowi aatene yahithega.

13Vano yoothega yahikalawo veelaboni ya vati Mulugu ahinaveleele Malamulo a Mozezi, vano vihili malamulo yoothega kineelengiwa. 14Wambeela mudhidhi wa Adamu ofiyedha Mozezi, okwa wahikanna owodha wa athu aatene, naari dhoothega dheewa dhaalive dhoohiyana ni ele ya Adamu. Oliye amutajihedha ole aadhe. 15Mbwenye mvahi onaakeliihu mwa mahala a Mulugu kunaliganihiwa ni yoothega. Odheela mwa yoothega ya mulobwana mmohi, athu ajinji ehikwa. Odheela wa mvahi wowogoowa onadha wa mulobwana mmohi, Yesu Kirixtu, athu ajinji ehaakela mootekuma mahala a Mulugu. 16Adamu ahikoniwa agathegile dila emohi, mbwenye mvahi wa Mulugu oli woohiyana. Mvahi wa Mulugu onowaavulumusa athu naari egathegile dila dhijinjidhene. 17Mwaha wa othega wa muthu mmohi, odheela mwa oliye, okwa woolamula. Tthabwa-tthabwa odheela wa muthu mmohi, Yesu Kirixtu, ale enaakela wa Mulugu mahala ootekuma ni mvahi wa dhowogoowa, aliwa eneerege olamula okala ni okala.

18Mowindo, wona mwa yoothega emohi ajinji yahikoniwa teto mwa yowiira emohi yowogoowa athu ajinji enowiiriwa owogoowa, vano enokalana egumi. 19Vowi mwaha wohiiwelela wa mulobwana mmohi athu ajinji yahisadduwa okala anamathega, emodha-modhave mwaha wowiiwelela wa mulobwana mmohi, ajinji eneere wiiriwa owogoowa.

20Mulugu aveleele Malamulo wi athu enone wiinjiva wa dhoothega dheewa. Dhoothega veenjedhedheyiiwa, mahala a Mulugu yahenjedhedheya mookwaranya dhoothega nde. 21Nda dhihipadduwa wi wona yoothega enalamula odheela okwa, emodha-modhave mahala a Mulugu enolamula odheela wogoowa wi onivahe egumi yoohumala odheela mwa Yesu Kirixtu, Nabwiya eehu.

Currently Selected:

ARoma 5: tke

Highlight

Copy