ARoma 4

Nroromelo na Abarahamu

1Vano niwoge avi dha nikolo neehu Abarahamu? Oliye afwanyilemo ddi? 2Mulugu ahamwiire Abarahamu owogoowa mwaha wa dhowiira dhaaye, eere okalana mwaha wowiithukulela, mbwenye kanna mwaha wowiithukulelana vameentoni va Mulugu. 3Ki Maleba yiire avi? Yiire: <<Abarahamu ahimuroromela Mulugu, voomuroromela, Mulugu ahimwiira owogoowa>>.#4.3 Wambeela 15.6.

4Vano muthu alaba mabasa, yooliveliwa yaaye kahuwo mvahi, si yoofwaneelela yaaye. 5Vano ole ohunaroromela meerelo aaye mbwenye amuroromelaga ole onawiiriha anambure wi ekale owogoowa, nroromelo na muthu oyo, Mulugu onowiira wogoowa. 6Davidi ahiwoga dhimohive, awogaga dha ohagalala wa muthu Mulugu onamwiiriiye owogoowa ahisugwaga meerelo. Davidi ahiira:

7<<Ooreelihiwa baale

dhabure dheewa dhileveleliwe,

ayene dhoothega dheewa dhithimihiwe.

8Dooreelihiwa muthu oyene Nabwiya

ohunamweelengeliiye dhoothega dhaaye>>.

9Ki ohagalala wula onaakale wa athu owiineliwave baahi, naari teto ni alukweene? Vowi nihiwoga wi Abarahamu, odheela nroromelo naaye, Mulugu ahimwiira owogoowa. 10Ela epadduwile alini? Abarahamu ageeneliwe naari ahineeneliwe? Ebaribareene epadduwile ahineeneliwe. 11Wiineliwa waaye waali wona etoonyihedho yooniha wi Mulugu ahimwiira owogoowa mwaha wa nroromelo nanniyena ahineeneliwe. Mowindo Abarahamu di baabi a athu aatene enamuroromela Mulugu wi yiiriwege owogoowa naari egalive aluku.#4.11 Moone Wambeela 17.10-11. 12Teto di baabi a owiineliwa ehili oogwaddiwave mmwiilini baahi, mbwenye teto eneedda mundila mwa nroromelo needda babiihu Abarahamu ahineeneliwe.

Nroromelo na Abarahamu ni yoororomeliha ya Mulugu

13Abarahamu ni anamabaliwelamo aaye yahaakela wa Mulugu nroromeliho nowi elabo ya vati enoodha ekale yeewa, ehili mwaha woohariha Malamulo, mbwenye mwaha wowogoowa wookumela munroromeloni. 14Akala ale enaroromela Malamulo enoodha yaakele dhedho Mulugu dhiroromelihiiye, nroromelo kannapura yego teto yoororomeliha eyo enothimihiwa. 15Mwaha wi Malamulo enotatamula owali. Vano vihili Malamulo, kavili ohiiwelela.

16Mwahaya buuyene wi yoororomeliha ya Mulugu enavahiwiiwa mwa nroromelo wi yoororomeliha eyo ekale mvahi wa mahala wi ekale yowaalibihana anamabaliwelamo aatene a Abarahamu, alene enahara Malamulo a Mozezi teto ale yinna nroromelo nanna Abarahamu. Oliye di baabi a hiyo aatene. 17Dhili wona muwogele Mulugu ni Abarahamu mMalebani Ootaleleya, eera: <<Guhuuthoma wi okale baabi a malogo majinji>>.#4.17 Wambeela 17.5. Oliye dineeriwa babiihu ni Mulugu oyene Abarahamu amuroromeliiye, onawelihedha egumi wa anookwa teto onakalihawo dhego dhihiliwo.

18Naari wahaaliwoove mwaha woojejihedha, Abarahamu ahiroromela yoororomeliha ele. Mowindo ahisadduwa okala baabi a malogo majinji, mooligana mwamwaaddelele Mulugu, eera: <<Anamabaliwelamo aawo enaakale ajinji wona ttendderi>>.#4.18 Wambeela 15.5. 19Oliye aganna vakukuuve yaaka zana, ahitthabwa wuuluvala, kaakwaniha obala. Teto Saara ahuuluvala, kaabale. Abarahamu ahinona dhaatedhene dhedho, mbwenye nroromelo naaye kanavolole. 20Naari ndo kaanganyedhe, naari kaahiyile ororomela yoororomeliha ya Mulugu, mbwenye oomuthithimiha Mulugu, okala ooliba munroromeloni naaye. 21Oliye ahikanna ebaribari wi Mulugu onowaanda wiirana dhedho dhiroromelihiiye. 22Mwaha wa eyo: <<Mulugu ahimwiira Abarahamu owogoowa>>.#4.22 Wambeela 15.6.

23Madhu ala enawoga wi: <<Nabwiya ahimwiira owogoowa>>, kayalebeliwe opama wa Abarahamu yeeka, eehi, 24teto elebeliwe wa hiyo. Mulugu teto ononiira owogoowa hiyo nnamuroromela ole amvenyihile muukwani Yesu, Nabwiya eehu. 25Yesu oyo ahipelekiwa wi apiwe olivela dhooviriganiha dheehu teto ahivenyihiwa muukwani wi niiriwege owogoowa ni Mulugu.

Currently Selected:

ARoma 4: tke

Highlight

Copy