ARoma 10

Ovulumusiwa wa aZhudewu

1Addibilaga, arogoraga, enarabuleliimi ni murima waaga waatene teto enamulobiimi Mulugu sowi aEzarayeli evulumusiwe. 2Ginowiirela onamoona wi ba nthakwithakwi voomuhara Mulugu, mbwenye kineewelelamo mukalelo wa ebaribari woomuharana. 3AZhudewu voohunona wogoowa onadha wa Mulugu, esayelaga wogoowa weewa-weewa, kayaroromele wogoowa onadha wa Mulugu. 4Vowi Kirixtu mwa oliye yeeka ohaakwaneliha Malamulo a Mozezi wi kadda muthu onamuroromela onowiiriwa owogoowa ni Mulugu.

Ovulumusa wowaakalela aatene

5Owoga dha wogoowa onadha vowiiwelela Malamulo, Mozezi ahileba, wiira: <<Muthu oneerana dhedho, onoodha akale ni egumi odheela wa dhedho>>.#10.5 Levitiku 18.5. 6Mbwenye wogoowa onadheela voororomela wiire: <<Ohukohe mmurimani mwaawo, wiira: <Onaagwele odhulu baani?> >>#10.6 Deteronomiyo 30.12-14. (Ela sowi amudhena Kirixtu muddibani.) 7<<Naari ohukohe, wiira: <Onaakitele omuliddini ohinna omagomelo baani?> >>#10.7 Deteronomiyo 30.12-14. (Ela sowi amvenyihe Kirixtu muukwani.)#10.7 Mulugu onawoga nda wi athu ehikohege dhookoha nda mwaha wi ohumurumiha oororomelihiwa Kirixtu. Vano Yesu Kirixtu oyo ohudhana wogoowa aZhudewu wasayeliiwa. 8Maleba Ootaleleya yiire avi? Yiire: <<Madhu a Mulugu eli vakukuuve ni we, eli muwano mwaawo teto mmurimani mwaawo>>.#10.8 Deteronomiyo 30.12-14. Ala bi madhu a nroromelo enaalaleyiihu. 9Akala onosoriha ni vamulomoni vaawo wi Yesu di Nabwiya teto akala onororomela mmurimani mwaawo wi Mulugu ahimvenyiha muukwani, onoodha ovulumusiwe. 10Vowi ni murima muthu onororomela eera ndo onowaakela wogoowa, ni mulomo asoriha wi Yesu di Nabwiya aaye, ohuvulumusiwa. 11Vowi Maleba yiire: <<Aatene enamuroromela oliye, kidha ekalana manyazo>>.#10.11 Ezaya 28.16. 12Kavili ohiyana vaari va aZhudewu ni aGerego, vowi Nabwiya mmohive oyene dili Nabwiya a athu aatene, onowaareeliha moofeewa madada aatene enamweebedha. 13Dhili wona madhu a Mulugu munawogeliiwa, yiiraga: <<Kadda muthu onamweebedha Nabwiya onoodha avulumusiwe>>.#10.13 Zhoweli 2.32.

14Ki athu enamweebedha Mulugu addi akala kinamuroromela? Naari enamuroromele addi akala kineewe dha oliye? Eneewe dha oliye addi akala kavili oolaleya? 15Athu enaalaleye addi akala kavili owaaruma? Madhu a Mulugu yiire: <<Soohagalasa wawoona yaafiyaga oolaleya Muselu Wapama>>.#10.15 Ezaya 52.7; Nahumi 1.15.

16Mbwenye kahuwo aatene yeewelele Muselu Wapama. Dhili wona Ezaya munawogeliiye, eeraga: <<Nabwiya, aroromele dhalaleyiihu baani?>>#10.16 Ezaya 53.1. 17Mowindo, ororomela onadheela mwaha wowiiwa mutheenga, wiiwa onadheela mwa madhu enawoga dha Kirixtu.

18Mbwenye ginokoha wi: <<Sowi aEzarayeli kayeewile?>> Ee, yahiiwa. Dhili wona madhu a Mulugu munawogeliiwa, yiiraga: <<Ndhu neewa nahivuwa elabo yaatene ya vati, madhu eewa yahifiya omagomelo wa elabo>>.#10.18 Masaalimu 19.4. 19Ginokohave wi: <<Sowi aEzarayeli kayeewile?>> Vowambeela, Mozezi ahiwoga madhu a Mulugu, wiira: <<Ginoodha guukalihenaani nrima odheela athu ehili nlogo, guukalihenaani owali odheela nlogo na athu oohunonelamo>>.#10.19 Deteronomiyo 32.21. 20Teto, ni murima wooliba, Ezaya ahiwoga madhu a Mulugu wa ale yahaali aEzarayeli, wiira: <<Yahigifwanya athu ayene yahagisayela. Gahiyooneyiha wa athu ayene yahagikohedhela>>.#10.20 Ezaya 65.1. 21Mbwenye dha aEzarayeli, ahiira: <<Nlabo naatenene gahitapula madada aaga wi gaakele nlogo noohugiiwelela, nogiinyuwela>>.#10.21 Ezaya 65.2.

Currently Selected:

ARoma 10: tke

Highlight

Copy