Maruku 9

1Vano Yesu ahawaaddelaga, wiira: <<Ebaribareene ginowuwaaddelani wi amohi mwa nyoovo muli veva kamunakwa muhoonile Omwene wa Mulugu, odhaaga ni owodha>>.

Ohiyaniheya wa Yesu

(Matewuzhi 17.1-13; Luka 9.28-36)

2Egavirile malabo matanu ni nimohi Yesu ahimuthukulaga Peduru, Tiyago ni Zhuwawu, waadhowana vadhulu va mwaango wootaama, okalawo weekiiwa. Vevale Yesu ahihiyaniheyaga vameentoni veewa. 3Dhoowara dhaaye dhahisadduwaga okala dhoweela mbuu, ozherimelaga. Kalivo namafula a mwiilaboni aande weeliha wowi ndala. 4Yahikumelelaga vameentoni vaaye Eliyazi vamohi ni Mozezi, ala yoowogaga ni Yesu. 5Vevale Peduru ahiwogaga ni Yesu, wiira: <<Namasuuziha, eli pama nikale wewuno. Nimage misasa miraaru: mmohi weenyu, mmohi wa Mozezi, mmohi wa Eliyazi>>. 6(Peduru kaanonilege yawogigiiye, vowi aatene yahidhaaleliwaga woova.) 7Vooharela wahidhaaga murabo waakuneela aatene, vano mwemo mwahikumaga ndhu, niiraga: <<Ola di mwaana aaga oodhivela. Mmwiiwelelege!>> 8Mowaaguva, egasugwile wu ni wu, kayamoonilege muthu mmohiwa, ahili Yesu. 9Nuwindo, ekitaga omwaangoni, Yesu ahawaaddelaga wi ehimwaaddele muthu dhego dhooniliiwa, ofiyedha Mwaana a Muthu avenyihiwe muukwani. 10Aliwa yoologolelave mmirimani nde dheereyilege, mbwenye yookohanaga vakaleligiiwa araaru enatapulela ddi <<ovenyihiwa muukwani>>.

11Aliwa yahimukohaga, wiira: <<Mwaha bwaddi anamasuuziha a malamulo enawogeliisu wi Eliyazi dinaakale muraaji odha?>>#9.11 Enawoga dha odha wa Muthikitheliwi. 12Vano Yesu ahawaakulaga, wiira: <<Ebaribareene Eliyazi dinaakale muraaji odha wi awelihedhe dhego dhaatedhene. Vowi dhihilebiwa Mwaana a Muthu enofuneya arabule vajinji teto anyemuliwe. 13Miyo ginowuwaaddelani wi Eliyazi ohudha, vano athu yahimwiirela dhaatedhene dhafuniiwa wona mulebeliwiiwa dha oliye>>.

Yesu onomuyiliha muzombwe oohiddiwa ni muneba wootakala

(Matewuzhi 17.14-23; Luka 9.37-45)

14Egafiyile waaddamela mburo waaligi anamasuuza amohi, yahawoonaga anamwinji egawaapeele. Teto yahawoonaga anamasuuziha a malamulo evaanyihanaga ni aliwa. 15Vevale anamwinji ale egamoonile Yesu, yahirurumuwaga, omuthamagela omulojela. 16Vevale oliye ahaakohaga, wiira: <<Nyo munavaanyihelana ddi?>> 17Mulobwana mmohi aaligi vaari va anamwinji ale ahaakulaga, wiira: <<Namasuuziha, gihimudhana mwaanaga wa nyo, oliye ohiddiwe ni muneba wootakala ohunamwihiya wi awogege. 18Muneba wootakala ola wamwihidda, onomutongwihedha vati, okumaga nipweru muwano mwaaye, waatakunaga meeno, mwiili waaye onowumma. Gahaaloba anamasuuza eenyu wi yiigare muneba wootakala ole, mbwenye aliwa kayaandile>>. 19Yesu ahaakulaga, wiira: <<Athu ooyeva nroromelo! Ofiyedha alini ginaakaliimi ni nyoovo? Ofiyedha alini givilelaga ni nyoovo? Mmudhena wuno muzombweya>>. 20Aliwa yahimudhowagana. Muneba wootakala ogamoonile Yesu, wahimuthikaga muzombwe ole ni owali, omutongwihedha vati opigiriyaga, okumaga nipweru muwano mwaaye. 21Yesu ahimukohaga baabi a muzombwe ole, wiira: <<Omalile mudhidhi mingaasi agali ndala?>> Oliye ahaakulaga, wiira: <<Wambeela wiihimani>>. 22<<Moolenddo majinjeene woomutongwihedha veeko, woomutongwihedha mmahinjeni wi ompe. Akala nabwiya dhinowaandeya omuyiliha, needdiweleni thagaraga, munikamihedhe>>. 23Yesu ahawiirelaga: <<Nyoovo muneerela ddi akala nabwiya munowaanda? Dhaatedhene dhinowaandeya wa ale enaroromela>>. 24Vano mowaaguva baabi a muzombwe ahikuwaga, eeraga: <<Miyo ginororomela! Gikamihedheni wi gigonjihe ohuroromela waaga!>> 25Yesu agoonile wi anamwinji yootugumanaga vaaligiiye, ahihiihaga muneba wootakala ole, wiira: <<Miyo ginowuulamula, we muneba wohiiwiha, woohuwogiha, ovenyemo mwa muzombwe ola, kuwelele ovolowa mwa oliye!>> 26Vano muneba wootakala ole, okuwaga, wahimuthikaga muzombwe ole ni owali okuma mwa oliye, omwihiya akalagahi wiire okwa. Athu ajinji yeeraga: <<Muzombwe ole ohukwa>>. 27Mbwenye Yesu ahimwihiddeelaga ndada omukamihedha ovenya muzombwe ole, wiimela. 28Nuwindo, Yesu agafiyile vaade, anamasuuza aaye yahimukohaga ombale, wiira: <<Mwaha bwaddi hiyo yahaandeliihu wiigara muneba wootakala ole?>> 29Vano Yesu ahawaakulaga, wiira: <<Mukalelo wa muneba ole oneegariwa ni malobelo baahi>>.#9.29 Enofwanyeya madhu owi: Mukalelo wa muneba ola oneegariwa ni malobelo vamohi ni othuga elebiwe mu dhoolebiwa ni madada dhimohi dhixa. Mbwenye anamasuuza ajinji enoobuwela wi vamohi ni othuga madhu ala kiyalebiwe ni Maruku.

Yesu onovuwiha dila biili dha okwa waaye ni ovenyihiwa waaye

(Matewuzhi 17.22-23; Luka 9.43b-45)

30Yesu ni anamasuuza aaye yahimaruwaga vevale, aviraga epaddi ya oGalileya. Yesu afunilege wi ahikalevo aanone aliwa waaligiisu, 31vowi aasuuzihaga anamasuuza aaye, owawaaddela, wiira: <<Ohaaddamela mudhidhi wi Mwaana a Muthu apelekiwe mmadani mwa athu. Aliwa eneere ompa, mbwenye oneere ovenyihiwa, yavira malabo maraaru>>.#9.31 Ozeya 6.2. 32Anamasuuza aaye kayeewelelamo dhawogesa Yesu, mbwenye yowoovaga omukoha.

Mpogo baani?

(Matewuzhi 18.1-5; Luka 9.46-48)

33Nuwindo, yahifiyaga nluwa ning'onong'ono na oKafaranawu. Egali vaade, Yesu ahaakohaga, wiira: <<Mwavaanyihana ddi mundila?>> 34Aliwa kayaakulilege yego, vowi voolenddoni viwa yawogaga yowi baani aakale mpogo.#9.34 Mpogo kinaagana wunnuwa wa muthu, mbwenye enaagana dha osogolela mabasa, nlogo, naari elabo. 35Agakaraatile, oliye ahawiithanaga kumi ni abiili ale, wiira: <<Akalavo onafuna okala muraaji, onakala oogomihedha, vano aalabege aatene>>. 36Vevale ahimuthukulaga mwaana mmohi omuhela vaari veewa. Vooharela, ahimukubaarelaga, wiira: 37<<Ole onamwaakela mwaana mu ndina naaga, onagaakela miyeene. Ole onagaakela miyo, kanagaakela miyeeneve, mbwenye ole ogirumile>>.

Ohunavaanyihana ni hiyo, oli mwa hiyo

38Zhuwawu ahimwiirelaga: <<Namasuuziha, nihimoona mulobwana mmohi eegaraga mineba dhootakala mwa ndina neenyu, mbwenye nihimwihiiha mwaha wi kaali nikuru neehu>>. 39Mbwenye Yesu ahawaaddelaga, wiira: <<Kammwihiihege, vowi kalivo oneerana yootikiniha mwa ndina naaga, vooharela awogaga obure wa miyo. 40Ole ahinavaanyihana ni hiyo, oli vamohi ni hiyo. 41Ebaribareene ginowuwaaddelani wi olene onoovahani ekopo ya mahinje mu ndina naaga, mwaha wa nyoovo okala a Kirixtu,#9.41 Kirixtu mu ewogelo ya eGerego enatapulela Muthikitheliwi, Misiya, naari wi oosakuliwa a Mulugu, oyene onaavulumuse athu. ola kadhawene ayeleela yoothuviwa yaaye.

Yesu onowawaaddela woopiha wa dhoothega

42<<Onaamuthegihe mmohi wa ana-ahima ala yinna nroromelo wa miyo, yaali yapama wi muthu ola amageleliwe mukohi nibwe nuulubale na nsilo, avokedhiwe munyaza. 43Akala ndada naawo ninowuuthegiha, ogwaddewo, soofuneyesesa ovolowa mwiigumini yoohumala ni ndada nimohi ohiya okalana madada mameenddeene, vano odhowe omunddoni woohuthima. 44[Mwemo miingu dhihinakwiiwa, munddoya kunathima.] 45Akala nnyalo naawo ninowuuthegiha, ogwaddewo, soofuneyesesa ovolowa mwiigumini yoohumala ni nnyalo nimohi, ohiya ovokedhiwa omunddoni woohuthima ni manyalo mameenddeene. 46[Mwemo miingu dhihinakwiiwa, munddoya kunathima.] 47Akala niinto naawo nimohi ninowuuthegiha, ovenyihemo, soofuneyesesa ovolowa muuMweneni wa Mulugu ni niinto nimohi baahi, ohiya okalana meento mameenddeene, ovokedhiwena omunddoni woohuthima. 48Mwemo miingu kadhinakwa, vano munddoya kunathima.

49<<Aatene enoweleeliwa ni munddo wona mwiinyu. 50Mwiinyu bwapama, mbwenye wakumuwa, onawelele avi odhiva? Egumi yeenyu ekalegehi eheliwe mwiinyu, vano mukalegena murenddele mmohi ni mukwaaye>>.

Currently Selected:

Maruku 9: tke

Highlight

Copy

Compare