Maruku 8

Yesu onowiinjiviha mikaathe ni somba olenddo wa nabiili

(Matewuzhi 15.29-39)

1Malabo alene, anamwinji yahitugumanaga dila emohiwa, kayannaga yego yooja. Nuwindo, Yesu ahawiithanaga anamasuuza aaye, wiira:

2<<Ginowaweeddiwela thagaraga athu ala; vowi enowaakwaniha malabo maraaru egali ni miyo, ehinna yego yooja>>. 3Gaaruma wi edhowege ehijile, enohileya mundila, vowi amohiwa ekumile woolapa. 4Anamasuuza aaye yahimukohaga, wiira: <<Nnafwanye wuuvi veeddeddereniva, yooja yowaakwana anamwinji ala?>> 5Yesu ahaakohaga, wiira: <<Mwinna mikaathe mingaasi?>> Aliwa yahimwaakulaga, wiira: <<Ninna mikaathe mitanu namiinddi>>. 6Ahaalamulaga wi anamwinji ekaraati vati. Yesu othukula mikaathe nde mitanu namiinddi, omutamaalela Mulugu, ogwaddanya wawinka anamasuuza aaye wi yaagawele anamwinji. 7Teto yahikannaga somba vang'ono, Yesu ahimutamaalelaga Mulugu mwaha wa somba nde, vano wawinka anamasuuza aaye wi yaagawele anamwinji. 8Omagomelowa, yahiddoddelaga dhoonyenyeyadha, odhaaliha middanga mitanu namiinddi. 9(Yaaligivo athu macikwi mannayi (4.000).) Ahaapaganyaga aliwa. 10Dhigeereye nda, mowaaguva Yesu ahigwelaga mmwanddeyani ni anamasuuza aaye, odhowaga elabo ya oDalamanuta.

AFarizi enoloba etoonyihedho

(Matewuzhi 16.1-4)

11AFarizi yahifiyaga vevale wambeela omuwaga muwano Yesu. Aliwa yoomweehaga emulobaga wi awoonihe etoonyihedho yootikiniha yookumela odhulu. 12Mbwenye Yesu ahivekumelaga vajinji, wiira: <<Mwaha bwaddi anamabaliwelamo ala enaloba etoonyihedho emohi? Ebaribareene ginowuwaaddelani wi kamunavahiwa etoonyihedho emohi>>. 13Vevale ahaahiyaga, owelela omwanddeyani omaruwa odhowaga okobela wa nyaza.

Pole-pole ni emela ya asogoleli a aZhudewu

(Matewuzhi 16.5-12)

14Anamasuuza yahiddiwaalaga othukula mikaathe, yannaga mukaathe mmohi baahi mmwanddeyani. 15Yesu ahaawaraalihaga, wiira: <<Pole-pole, mwiyiing'anele ni emela#8.15 Emela yaali etoonyihedho yalabihiwana ni ovaha mukalelo wabure. ya aFarizi ni ya Heroddi>>. 16Aliwa yahambeelaga owoga mmohi ni mukwaaye, yiiraga: <<Oliye onawoga nda mwaha wowi kaninna mukaathe>>. 17Yesu ahinonaga dhapadduwaga ni aliwa wawiirela: <<Mwaha bwaddi munavaanyihaniinyu, boohukalawo mukaathe? Nivano kamuneewelelamoove? Sowi miru dheenyu sowummave? 18Nyo muhukalana meento mbwenye kamunoona; muhukalana mabaru mbwenye kamuneewa! Muhuddiwaala 19vagwaddiliimi mikaathe mitanu wa athu macikwi matanu (5.000), mwadhaalihile middanga mingaasi dhoohaladha?>> Aliwa yahaakulaga, wiira: <<Middanga kumi ni miinddi>>. 20<<Vagwaddiliimi mikaathe mitanu namiinddi wa athu macikwi mannayi (4.000), mwadhaalihilege middanga mingaasi dhoohaladha?>> Aliwa yahimwaakulaga, wiira: <<Middanga mitanu namiinddi>>. 21Yesu, wiira: <<Nyoovo kamuneewelelamoove?>>

Yesu onomuyiliha muthu oohoona a oBetisayida

22Dhigeereye ndo aliwa yahifiyaga oBetisayida, wewo athu yahimudheelagana muthu oohoona, yahimulobaga ni ntidi wi amukahinye muthu oohoona ole. 23Yesu ahimwihiddeelaga ndada muthu oohoona ole omukogodhihela okwibi wa mudhi. Nuwindo, omutapera mare mmeentoni vano omuhela madada, ahimukohaga, wiira: <<Ehikala enooniiwe?>> 24Mulobwana ole omusugwa, omwaakula wiira: <<Ee, ginowawoona athu ale enaligana wona mithanko yeeddaga>>. 25Yesu ahimuhelaga madada dila emohiwa omeentoni waaye. Oliye ofugula dila biili meento, woona waaye owelelamo, vano woonaga pama dhaatedhene. 26Nuwindo, Yesu ahimurumaga odhowa vaade, wiira: <<Ohuhabuwe mudhi ole>>.

Wiisoriha wa Peduru

(Matewuzhi 16.13-20; Luka 9.18-21)

27Mowindo Yesu ni anamasuuza aaye yahidhowaga mirudda dhaali waaddamela maluwa a oSezareya oFilipi. Mundila, Yesu ahaakohaga anamasuuza aaye, wiira: <<Athu enagiira gili aani?>> 28Aliwa yahimwaakulaga, wiira: <<Amohi enowiirani muli Zhuwawu Namabathiza, amohi enowiirani muli Eliyazi teto amohiwa enowiirani muli namavuhulela>>.

29Yesu ahaakohaga, wiira: <<Ki nyoovo, muneera gili aani?>> Vano Peduru ahimwaakulaga, wiira: <<Nyo muli Kirixtu, ole aroromelihiwe>>.#8.29 Kirixtu mu ewogelo ya eGerego enatapulela Muthikitheliwi, Misiya, naari wi oosakuliwa a Mulugu, oyene onaavulumuse athu. 30Vevale Yesu ageewile nda, ahaahiihaga wi ehimwaaddele muthu dhedho Peduru dhawogiliiye.

Yesu onovuwiha olenddo wowambeela okwa waaye ni ovenyihiwa waaye

(Matewuzhi 16.21-28; Luka 9.22-27)

31Nuwindo, Yesu ahambeelaga waasuuziha anamasuuza aaye, eeraga: <<Eli yoofuneya wi Mwaana a Muthu#8.31 Yesu di Mwaana a Mulugu, mbwenye ndina Mwaana a Muthu enooniha wi Yesu teto aali muthu. Muniivuru na Daniyeli 7.13-14 ndda nili ndina nneethaniwana Misiya (Kirixtu). arabulihiwe vajinji, ofiyedha gikooddiwe ni asogoleli, apogo a anamakutha ni anamasuuziha a malamulo, gipiwe, vano vavira malabo maraaru givenyihiwe>>. 32Yesu awogaga dhedhi mowiiweya wa aliwa. Mbwenye Peduru ahimwiithanelaga vowihivale wambeela omusumulula. 33Vano Yesu ahirugunuwaga, waasugwaga anamasuuza aaye, omusumulula Peduru, wiira: <<Okwaranyevo viliimi va, Sathana! We kunapwatha mwa dhego dha Mulugu, mbwenye mwa dhego dha athu>>.

34Nuwindo, Yesu ahawiithanaga anamwinji ni anamasuuza aaye, wawaaddela, wiira: <<Onafuna odha wa miyo, eekoodde oliyeene, akapathe muraddi waaye, agiharege>>. 35Ole onafuna ovulumusa egumi yaaye, oneere oyeleela, mbwenye ole onayeleele egumi yaaye mwaha wa miyo ni mwaha wa Muselu Wapama,#8.35 Muselu Wapama onaagiwana dhoolaleya dhedho Mulugu dhifuguliiyena dila odheela mwa Kirixtu wi athu ekale ooleveleliwa dhoothega dheewa ekalege ni Mulugu. Athu enarumeedha ebaribari ela, Mulugu onowaarumeedha. oneere ovulumusiwa. 36Muthu onafwanyedhamo ddi voofuna opura elabo yaatene ya vati vano, ayeleela egumi yaaye? 37Muthu onalivele ddi wi oobole egumi yaaye? 38Akalavo muthu mwa nlogo nddi ooholowa ni oothega akalelaga manyazo dhego dhinasuuzihiimi, miyo, Mwaana a Muthu, teto ginoodha gimukalele manyazo oliye vinaadhigiimi mu nthithimihoni na Ababa ni angero oweela.

Currently Selected:

Maruku 8: tke

Highlight

Copy

Compare