Maruku 10

Yesu onowoga dha omwalana

(Matewuzhi 19.1-12)

1Yesu ahimaruwaga oKafaranawu, odhowaga murudda wa oZhudeya, olabuwela kobela emohi ya mwihinje Zhordawu. Anamwinji yahitugumanaga omwaapeelela, oliye wambeela waasuuziha wona moolemeelela.

2AFarizi amohiwa yahifiyaga vevale omukoha, wiira: <<Malamulo enorumeedhiha wi muthu amwalanege ni mwihiyanaaye?>> Voomukoha ndo yafunaga emweehe emfwanyena mwaha.

3Mbwenye Yesu ahawaakulaga, wiira: <<Mozezi oolamuleleni ddi?>>

4Aliwa yahaakulaga, wiira: <<Mozezi ahirumeedha wi muthu amulebelege mwihiyanaaye kaarata yoomwalana, eera ndo amwiigare>>.#10.4 Deteronomiyo 24.1. 5Yesu ahawaakulaga, wiira: <<Mozezi oolebeleni nlamulo ndda mwaha wa ovaadda mirima dheenyu. 6Mwaha wowi vowambeela Mulugu vapaddusiliiye dhego dhaatedhene, ahaapaddusa athu abiili, mulobwana ni mwihiyana.#10.6 Moone Wambeela 1.27. 7Mwahaya buuyene mulobwana oneerege omwihiya babe ni amaaye, ataganyihedhane ni mwihiyanaaye, 8abiili ala enakala mwiili mmohive.#10.8 Moone Wambeela 2.24. Vowi kinakala athu abiili, enakala mwiili mmohive. 9Mowindo ele Mulugu egumanihiliiye, muthu kamwalanihe>>.

10Egafiyile vaade, anamasuuza yahimukohaga Yesu dha madhu ale. 11Oliye ahawaaddelaga, wiira: <<Oyene onamwalana ni mwihiyanaaye, amutela mmohi onooraruwana, onamuthegela mwihiyanaaye. 12Emodha-modhave teto mwihiyana amwalana ni mamune ateliwa ni mmohi, onooraruwana>>.

Yesu onowaareeliha ahima

(Matewuzhi 19.13-15; Luka 18.15-17)

13Vevale athu amohi yowaadhaagana aniiwa wa Yesu wi aahele madada aareelihe, mbwenye anamasuuza yowaahiihaga. 14Yesu agoonile ahitakaleliwaga, wiira: <<Ahiyeni ahima edhe wa miyo, kamwaahiihe, vowi Omwene wa Mulugu bwa athu enaligana ni aliwa. 15Ebaribareene ginowuwaaddelani wi ole ohunaakele Omwene wa Mulugu wona mwaana, kadha avolowamo>>. 16Nuwindo, ahaakubaarelaga ahima ale, waahela madada, wareeliha.

Muthu ooreela

(Matewuzhi 19.16-30; Luka 18.18-30)

17Vevale Yesu agavenyile wi adhowege, muthu mmohi ahimuthamagelaga, odha okokora vameentoni vaaye omukoha, wiira: <<Namasuuziha apama, gineere ddi wi gaakele egumi yoohumala?>>

18Yesu ahimwaakulaga, wiira: <<Onagiirela ddi apama? Kalivo oli apama, apama di Mulugu baahi. 19Ohaanona malamulo: <Kumpe muthu, kuraruwe, kawiiye, kumwiinkedhe mukwaawo, kumunyengethe mukwaawo, waariihege ababo ni amaayo> >>.#10.19 Moone Okuma 20.12-16; Deteronomiyo 5.16-20.

20Muthu ole ahiiraga: <<Namasuuziha, dhaatedhene dhedho gambeele ohara ngali muzombwe>>.

21Yesu ahimwing'anaga omudhivela, omwaaddela, wiira: <<Ehuuhaleela yego emohi: Dhowa wagulihe dhaatedhene dhinniiwena. Korowadha waavahe athu oorabula, dhooreela onoodha ofwanye odhulu. Weera ndo, ogiharege>>.

22Muthu ole ageewile madhu ale kove yaaye yahivololaga, ovenyavo agali owukuuweene, vowi ahikanna dhooreela dhijinji.

23Yesu ahawaang'anaga anamasuuza aaye yamwaapeelelege, wiira: <<Dhili dhoorusa vajinji wi athu ooreela evolowe muuMweneni wa Mulugu!>> 24Anamasuuza yahitikinaga vajinji madhu a Yesu. Mbwenye oliye ahiwelelaga owoga, wiira: <<Ebaribareene, nyo ahima aaga, dhili dhoorusa vajinji wi athu ooreela evolowe muuMweneni wa Mulugu! 25Eli yookweya kamelo ovira mookupula mwa singano, ohiyana wi athu ooreela evolowe muuMweneni wa Mulugu>>.

26Vevale anamasuuza ale yahitthabwaga otikina, wambeela okohanaga, yiiraga: <<Akala dhili ndo, ki onaande ovolowa baani?>>

27Yesu ahaasugwaga, wiira: <<Ndo soohaandeya wa athu, mbwenye kahuwo ni Mulugu. Dhego dhaatedhene dhinaandeya ni Mulugu>>.

28Vevale Peduru ahambeelaga owoga ni oliye, eeraga: <<Hiyo nihihiya dhaatedhene wuuharagani>>. 29Yesu ahaakulaga, wiira: <<Ebaribareene ginowuwaaddelani wi ole onahiya nyuba yaaye, addibile, arogoriye, naari onaahiya amaaye, ababe, anaaye, midda dhaaye mwaha wa miyo ni mwaha wa Muselu Wapama, 30oyene vati vano onoodha aakele dila zana okwaranya dhihiyiliiye, nyuba, addibila, arogora, amaaye, ahima, midda ni wiiddiwa. Vano osogolowa onoodha aakele egumi yoohumala. 31Vowi athu ajinji eli owambeela enoodha ekale oogomihedha, ale eli oogomihedha binaakale owambeela>>.

Yesu onowoga dila ya neethaaru dha okwa waaye ni ovenyihiwa

(Matewuzhi 20.17-19; Luka 18.31-34)

32Egali voolenddoni woodhowa oZheruzalemi, Yesu aaligi osogolo wa anamasuuza aaye. Anamasuuza ale yegi otikina vajinji, vevale athu amohi yaaharaga yowoovaga. Yesu ahawiithanelaga ombale anamasuuza ale kumi ni abiili, wambeela wawaaddela dhedho dhaamwiireyele. 33Ahiiraga: <<Mwiiwe, nili voolenddoni woodhowa oZheruzalemi. Wewo, miyo, Mwaana a Muthu, gineere opelekiwa mmadani mwa apogo a anamakutha ni anamasuuziha a Malamulo. Aliwa eneere olamula wi gipiwe. Yeera ndo enogipeleka wa athu oode. 34Ayene eneere egibeddege, egitaperege mare, egiwaxulege, vano egipe. Mbwenye vavira malabo maraaru, miyo ginovenyihiwa muukwani>>.

Dhooloba dha Tiyago ni Zhuwawu

(Matewuzhi 20.20-28)

35Tiyago ni Zhuwawu, ahima a Zebedeyo, yahimwaaddelaga Yesu, wiira: <<Namasuuziha, nnafuna nuulobeni yego wi muniirele>>. 36Yesu ahaakohaga, wiira: <<Munafuna guwiireleni ddi?>> 37Aliwa yahiiraga: <<Nnafuna wi vevo vineeriinyu mukale munthithimihoni mweenyu, munikaraatihe mmohi omoononi weenyu wooja, mmohiwa omoononi woong'oto>>. 38Mbwenye Yesu ahiiraga: <<Kamunonile enalobiinyu. Dhinowaandeya nyo omung'wela nakoma#10.38 Naari wi: kopo. Moone teto maverisikulu 39-40. a goyi onaamung'weliimi? Naari munowaanda waakela obathizo woorabuliha onabathiziwiimina?>>

39Aliwa yahaakulaga, wiira: <<Ee, nnowaanda>>.

Vevo Yesu ahiiraga: <<Dhihikala pama, nakoma oyene gineeriimi gimung'wege munowaanda omung'wa, obathizo gineeriimi gibathiziwena, munobathiziwana. 40Dhinowaandeya nyo omung'wela nakoma a goyi onaamung'weliimi; mbwenye okaraati omoononi waaga wooja naari woong'oto, kahuwo miyo onarumeedhiha, dhili ni ale yaasasanyedheliiye>>.

41Vevale amohiwa ale kumi veewiligiisu madhu ale yahitakaleliwaga ni Tiyago ni Zhuwawu. 42Mbwenye Yesu ahawiithanaga anamasuuza aaye ale wawaaddela, wiira: <<Nyoovo muhunona ale eneeriwa oolamula a mulogo enowaajela aliwa, vano apogo eewa binaalamula aliwa. 43Mbwenye vaari veenyu dhihiireyege ndo. Onafuna okala mpogo, akalege mwiimeleli eenyu. 44Teto onafuna okala musogoleli vaari veenyu, akalege mudhaari a nyoovo mwaatene. 45Mwiiregena wona dhiirile miyo, Mwaana a Muthu, kagidheele wi giimeleliwege, mbwenye wi gawiimelelege athu ni oveleela egumi yaaga wi gawoobole athu ajinji>>.

Yesu onomuyiliha muliba ohoona

(Matewuzhi 20.29-34; Luka 18.35-43)

46Yesu ni anamasuuza aaye ni anamwinji yahifiyaga nluwa na oZheriko. Ekumaga nluwa ndde, yahimfwanyaga muthu oohoona ooloba-loba agakaraatile seresere ya rampa. Muthu ole ndina naaye aali Baratimeyu, mwaana a Timoni. 47Vano oliye ageewile wi Yesu a oNazarethi dinavira, ahambeelaga okuwa, eeraga: <<Yesu, Mwaana a Davidi,#10.47 Mwaana a Davidi Ndda naali ndina nimohi na Misiya nanoniwiiyena ni aZhudewu. Moone teto verisikulu 48. mugeeddiwele thagaraga!>> 48Anamwinji yomwihiihaga wi amaale. Mbwenye oliye oolibihedhagave okuwa, eeraga: <<Yesu, Mwaana a Davidi, mugeeddiwele thagaraga!>> 49Yesu ahiimelaga wawaaddela athu, wiira: <<Kamwiithaneni>>. Athu ale yahimwiithanaga oohoona ole, omwaaddela, wiira: <<Wiilibihedhe! Ovenye! Onowuwiithana!>> 50Vevale Baratimeyu ahithathilaga yowiikuneelana yaaye, othamagelaga wa Yesu. 51Yesu ahimukohaga, wiira: <<Onafuna guwiirele ddi?>> Ohoona ole ahaakulaga, wiira: <<Namasuuziha, ginafuna goonege!>> 52Yesu ahimwaaddelaga, wiira: <<Maruwa odhowege; nroromelo naawo nuhuuvulumusa>>. Mudhidhi olene, ahambeelaga woona, omuharaga Yesu mulenddoni mwaaye.

Currently Selected:

Maruku 10: tke

Highlight

Copy

Compare