Maruku 7

Yesu onosumulula magano a makolo a aZhudewu

(Matewuzhi 15.1-20)

1AFarizi #7.1 AFarizi Aliwa yaali a nikuru na anamalobela aZhudewu ala yeera wi yahara Nipangano Nawale ni malamulo mamohi ni dhilemeelelo dha aZhudewu mooharihamo. ni anamasuuziha amohi a malamulo, yadhiilege oZheruzalemi, yahitugumanaga vaaligi Yesu, 2yahoonaga wi anamasuuza aaye amohi yajaga ni madada <<ootakaleene>> wona mwa magano eewa, ela sowi yajaga ehaabihile ohaba mmadani. 3(Vowi aFarizi ni aZhudewu amohiwa aatene kinaja ehihabile mmadani eharihagamo magano a makolo eewa. 4Yawela omusika ni mburo dhimohi, aliwa kinaja yego ehihabile mmadani. Teto dhihikalawo dhilemeelelo dhimohi aliwa dhinaharihiiwa wona nda ohuwa kopo, mulinga, dhibale dha mugogo,#7.4 Naari wi: mukuwa. ni olilidhene#7.4 Naari wi: kuluxawu dhing'onong'ono dhookaraatela yaajaga. dhakaraateliisu yaajaga.) 5Anamasuuziha a malamulo ni aFarizi yahimukohaga Yesu, wiira:

<<Mwaha bwaddi anamasuuza aawo enaja ni madada <ootakaleene>, kinaharihamo magano a makolo eewa?>> 6Mbwenye Yesu ahawaakulaga, wiira: <<Ezaya awoga ebaribari vavuwihiliiye mutheenga wa Mulugu mwaha wa nyo anamanyengetha, valebiliiye, eeraga:

<Nlogo ndda nnageebedha ni milomo,

mbwenye mirima dheewa dhili woolapela ni miyo.

7 Nnageebedha ebeweene,

vowi masuuziho enasuuzihiisu eli malamulo

oosasanyiwa ni athu, ehili oosasanyiwa ni miyo>. # 7.7 Ezaya 29.13.

8Munaahiya malamulo a Mulugu okwibi, weeddelaga dhilemeelelo dha athu>>.

9Aheenjedhedhagave, wiira: <<Nyo muli ooxaga wi mwihiye malamulo a Mulugu mwahele masuuziho eenyu-eenyu. 10Mooliganiha, Mozezi wiire: <Waariihege ababo ni amaayo>#7.10 <<Waariihege…amaayo>> Moone Okuma 20.12; Deteronomiyo 5.16. vano teto: <Ole onaaruwana ababe naari amaaye athongiwe avahiwe goyi ya opiwa>.#7.10 <<Onaaruwana…opiwa>> Moone Okuma 21.17; Levitiku 20.9. 11Mbwenye nyo muneera: <Muthu awaaddela ababe naari amaaye eera, dhaatedhene dhoofwaneelela olabiha wi dhuukamihedheni dhili Korubani>, (ela sowi mvahi wa Nabwiya), 12vano munowiivenyihavo wiiragana yego si yego wi mmukamihedhena babiinyu naari mmeenyu. 13Mukalelo ola munohiya malamulo a Mulugu ni dhilemeelelo dhedho dhinalaleyiinyu. Vowi munowiirana dhedhi teto munowiirana dhego dhijinji dhowinda>>.

14Yesu ahawiithanaga olenddo mmohiwa anamwinji wi emwaaddamele, wiira: <<Mvuruwane mwaatene dhinafuniimi owoga, vano mwiiwelelemo: 15Kavili dhego ode wa muthu dhavolowa mwa oliye dhinamutakaliha. Mbwenye dhinakuma mwa muthu sinamutakaliha>>.#7.15 Enofwanyeya verisikulu 16 eneera: Ole onaanda wiiwa, eewe elebiwe mu dhoolebiwa ni madada dhimohi dhixa. Mbwenye anamasuuza ajinji enoobuwela wi madhu ala kiyalebiwe ni Maruku.

17Yesu agaahiyile anamwinji ahidhowaga vaade, anamasuuza aaye yahimukohaga yootapulela ya musibe ole.#7.17 Musibe dhoweelenga dhinasoriha dha moobuwelelo a mukalelo woofwanafwaniha, dhedho dhinasuuziha gano; dhoofwanafwaniha naari dhooharana vaari va dhego biili. 18Oliye ahawaakulaga, wiira: <<Nyoovo kamuneewelelamo? Kamunonile wi kilivo yego ode wa muthu eni yavolowa mwa oliye, yaandaga omutakaliha, 19vowi kinaya mmurimani, mbwenye enaya munifuni, yeera ndo okumela ode wa mwiili?>> (Voolaleya nda, oliye avuwihaga wi dhooja dhaatedhene kahi dhootakala, athu ejege.)

20Nuwindo, aheenjedhedhaga, wiira: <<Dhinakuma mmurimani mwa muthu sinamutakaliha, 21vowi fu muwari mwa mirima dha athu munakuma dhowuubuwelela dhabure, makalelo a ooraruwa, wiiya ni opa, 22vowi fu muwari mwa murima teto munakuma dhooraruwa, wiimana, dhabure, onyengetha, dhootaduwa, nrima, waaba, wiithukulela, olodhowa. 23Dhabure dhaatedhene dhedhi dhinakuma muwari mwa murima, nda sinamutakaliha muthu>>.

Nroromelo na mwihiyana a oSiru-oFinisiya

(Matewuzhi 15.21-28)

24Yesu ahimaruwaga vevale odhowaga waaddamela nluwa na oTiru. Nuwindo, agafiyile, ahivolowaga mba, vowi kaafunilege wi athu enone wi oliye oli wewule, mbwenye kaandile wiipita. 25Ahikalawo wewule mwihiyana mmohi anna mwaanaye a mwihiyana anna muneba wootakala. Mudhidhi olene ageewile owogiwa dha Yesu, ahidhowaga vaaligi Yesu, okokora vamanyaloni vaaye. 26Mwihiyana ola aali oode, awoga eGerego aali a nlogo nneethaniwa a oSiru-oFinisiya, oomuloba-loba wi eegaremo muneba wootakala mwa mwaanaye ole a mwihiyana. 27Oliye ahimwiirelaga: <<Vowambeela waahiye ahima yaabihe oja, kadhinakala pama okumiha dhooja dha ahima waavokedhaga anaanabwa>>.

28Nuwindo, mwihiyana ahimwaakulaga, wiira: <<Ee, Nabwiya, mbwenye anaanabwa eli vati va meeza enaja dhoonyenyeya dhinamoriha ahima>>.

29Yesu ahimwiirelaga: <<Mwaha wa madhu egaakuliliiwe, odhowe vaade vaawo ni murenddele, vowi muneba wootakala ohuvenyamo mwa mwaanawo a mwihiyana>>. 30Vano agawelele vaade, mwihiyana amfwanyilege mwaanaye a mwihiyana agakonaantile vakamani, vowi muneba wootakala wahikumaga mwa oliye.

Yesu onomuyiliha muthu oohiiwa ni ooguguma

31Vooharela Yesu ahimaruwaga waaddamela nluwa na oTiru, ovira nluwa na oSidoni teto ovira Nyaza ya oGalileya, odhowa elabo ya oDekapolisi. 32Agafiyile wewule, athu amohiwa yahimudheelagana muthu aali oohiiwa ni oohuwoga pama, ooguguma, yahimulobaga wi amutapulele madada. 33Yesu ahimvenyihagavo vaari va anamwinji, omudhowana vowihivale, omukahinya mmabaruni ni dhimbuno, vooharela okahinya nlumi na mulobwana ole ni mare. 34Nuwindo, ahisugwaga odhulu, ovekumela vajinji, vano wiira: <<Efata!>>, enatapulela wi: <<Ofuguwe!>> 35Vano mowaaguva obaruni wa mulobwana ole wahifuguwaga, nlumi naaye nahitapuwaga, oliye wambeela owogaga pama.

36Yesu ahaakooddihaga ale yaaligivo wi ehawaaddele athu amohiwa, naari aakooddihileve aliwa, yootthabwaga olaleya. 37Nlogo naatenene nahikalagana otikina wuulubale, aatene yowiiraga: <<Oliye onowiirana pama dhaatedhene! Onowiirana ofiyedha aliba ohiiwa wiiwaga teto aliba ohuwoga owogaga!>>

Currently Selected:

Maruku 7: tke

Highlight

Copy

Compare