Maruku 6

Yesu onokooddiwa oNazarethi

(Matewuzhi 13.53-58; Luka 4.16-30)

1Yesu vavenyiligiiye vevale, ahiwelelaga owaniwa, anamasuuza aaye yahimuharaga oNazarethi, oluwani waaye. 2Oliye wambeela osuuziha mu nyuba ya matugumano nlabo na sabuddu. Athu ajinji yegi otikina egeewile dhoosuuziha nde, yookohanaga mmohi ni mukwaaye, yiiraga: <<Olaya osuuzile waani dhego dhaatedhene nda? Tthottho dha musawo baani ovahiwe oliye? Oneerana addi dhootikiniha nda? 3Ola kahuwo namasema? Maaye kahuwo Mariya? Addibile kahuwo Tiyago, Zhuuze, Zhuda ni Simawu? Anamwali eli ni hiyo kahuwo teto arogoriye?>> Aliwa yahimwiidda.

4Yesu, ahawiirelaga: <<Namavuhulela onoriihiwa dhipaddi dhaatedhene, ohiya nluwa naaye ni amudhi aaye naari a vaade vaaye>>. 5Mowindala kaandile wiirana matikiniho oNazarethi, ohuli waayiliha athu amohi vowaatadeelela madada. 6Vano Yesu ahitikinaga ni mwaha wa ohukalana nroromelo weewa. Yesu aheddeedda mirudda dhowaaddamela asuuzihaga nlogo.

Mabasa a anamasuuza kumi ni abiili

(Matewuzhi 10.1, 5-15; Luka 9.1-6)

7Oliye ahawiithanaga anamasuuza aaye kumi ni abiili, waaruma abiili-abiili; waavaha kopolo dhowiigarana mineba dhootakala. 8Oliye ahaalagaga wi ehithukule yego ya voolenddoni, ohuli mukogodho baahi; ehithukule mukaathe, naari thumba na voolenddoni, naari korowa musintuni mweewa, 9eware sapatho, ehithukule maleya meenddi. 10Ahawiirelaga: <<Vaade munaafiyedhiinyu mukalege vevo, ofiyedha mudhidhi onavenyiinyu mmuruddani mule. 11Nyoovo mwafiya mmuruddani mwahaakeliwa pama teto yahiiwelela madhu eenyu, mvenyewo wewo, mutate nthubi na mmanyaloni mweenyu. Ela enaakale etoonyihedho ya mwaha wokooddiwa>>.

12Vevale aliwa yahimaruwaga, wambeela olaleya wi aatene etthwaruwe mwa dhoothega dheewa. 13Yowiigara mineba dhootakala dhijinji, yowaakuthulela makura aredda ajinji, yaayilihaga.

Okwa wa Zhuwawu Namabathiza

(Matewuzhi 14.1-12)

14Mwene Heroddi owiiwa dhedho dhawogiwa, dhowi ndina na Yesu nihinoneya dhipaddi dhaatedhene. Athu amohi yowiiraga: <<Zhuwawu Namabathiza divenyile muukwani mwahaya buuyene oliye okaleliiyena kopolo dhowiirana matikiniho>>.

15Amohi yeeraga: <<Oliye di Eliyazi>>.

Amohiwa yeeraga: <<Oliye di namavuhulela wona namavuhulela awale>>.

16Heroddi ageewile athu dhawogiiwa, ahuubuwelelaga dhamwiireliiye Zhuwawu, wiira: <<Zhuwawu ole gilamuleliimi opadhiwa muru waaye, ohuvenya muukwani!>>

17Vowi Heroddi dalamule wi Zhuwawu amagiwe, afugeliwe mukaambura, mwaha wa Heroddiya amuteliliiye, agali mwadha ddibile Filipi. 18Vowi Zhuwawu kaamaala owoga, eeraga: <<Kadhinarumeedhihiwa omutela mwadha ddibilo>>. 19Heroddiya oomuharahara Zhuwawu mwaha wa dhego dhedho vano oomusayelela mukalelo wi ampe. Mbwenye kaafwanya, vowi 20Heroddi oomoova Zhuwawu, oomwaakihedha, ahinonaga wi oliye aali owogoowa ni oweela murima. Vano Heroddi oodhiveliwa vajinji wawiiwa madhu ala naari emulatagave murima. 21Vano nahifiyaga nlabo Heroddiya nooniligiiye totela yowaakwana wi amurabulihe Zhuwawu, naaligi nlabo najiwaga mathanga, oothabela obaliwa wa Heroddi. Yaaligi vevale anamalaga aaye, asogoleli a anyakoddo ni athu oofuneyesesa a oGalileya. 22Mwaana a Heroddiya agavolowile vabwaloni vajiwaga mathanga ahiinaga, Heroddi ni owiithaniwa aatene yahidhiveliwaga vajinji. Vevale mwene ahiiraga: <<Ogilobe yego enafuniiwe, gineere guuvahe>>. 23Ahimuroromelihaga, wiira: <<Miyo gineere wuuvaha enafuniiwe, naari okale wuugawela omwene waaga vaari ni vaari, ginowuuvaha>>.

24Namwali ole ahikumelaga vaade, odhowa waakoha amaaye, wiira: <<Miyo ginaalobe ddi?>>

Heroddiya ahimwaakulaga, wiira: <<Olobe muru wa Zhuwawu Namabathiza>>.

25Mowaaguva, namwali ole ahiwelelaga vameentoni va mwene, ahilobaga, wiira: <<Ginafuna mugivahe muru wa Zhuwawu Namabathiza muhele mmuziwoni mu, dhiinoveva>>.

26Mwene ahikubanyaga vajinji mbwenye kaarunihilege yooloba ya namwali ole mwaha wa nroromeliho neeriligiiyena teto mwaha wa anameethaniwa yaaligi vevale. 27Nuwindo, mwa mudhidhi olene mwene ahimulamulaga munyakoddo#6.27 EGerego: namapa. mmohi wi amudheelena muru wa Zhuwawu. Oliye ahidhowaga okaambura, ompadha muru, 28oliye ahiiragana dharumiwigiiye, odhana muruya mmuziwoni, omvaha namwali ole, oliye wawinka amaaye. 29Anamasuuza a Zhuwawu egeewile dhedho dheereyilege, yahidhowaga othukula mwiiliya odhowa ologoha munsiyeni.#6.29 Masiye a mudhidhi olene yakala wona nikungu.

Yesu onowiinjiviha mikaathe ni somba

(Matewuzhi 14.13-21; Luka 9.10-17; Zhuwawu 6.1-15)

30Arumiwi yahiwelagawo wuulenddoni wa mabasa eewa, otugumana ni Yesu, yahimwaaddelaga dhaatedhene dheeriligiiwa ni osuuziha.

31Vahikalaga athu ajinji, yoodhaaga amohi edhowaga ofiyedha wi Yesu ni arumiwi aaye ehikanne mudhidhi wooja. Yesu ahawiirelaga: <<Mudhe ni miyo. Ndoweni weekiihu nafwanye mburo wofwaasa wi navume vang'ono>>.

32Aliwa yahivenyaga weekiiwa ni mwanddeya, odhowaga mburo wofwaasa. 33Athu ajinji yahawoonaga emaruwaga, vano yahaadidelaga wi baaliwene. Athu aatene a mmiruddani yahithamagelaga wewule, okala araaji ofiya, aliwa yahinafiye.

34Yesu akitaga mmwanddeyani mule, ahawoonaga anamwinji, ahaweeddiwelaga thagaraga vajinji, vowi yaaligi wona mabila oohukanna owaajiha. Vevale ahambeelaga waasuuziha dhego dhijinji. 35Wambeelaga oriba anamasuuza a Yesu yahimwaaddamelaga omwaaddela, wiira: <<Mburo ola mwiiddeddereni, ndala onooriba; 36Mwaarume anamwinji ala edhowege wi aliwa yafiye mookala mwiwa, mmuruddani mowaaddamela yagule dhootakuna>>.

37Yesu ahawiirelaga: <<Nyoovo mwaavahe dhego dhootakuna>>.

Mbwenye aliwa yahimwiirelaga: <<Ebaribari munafuna nagule dhootakuna wi anamwinji aatene ala etakune, ndo dhinaguliwe korowa dha parata mazana meenddi (200)!>>#6.37 Korowa dha parata Naari wi: denariyo. Denariyo yaali korowa yawale ya parata ya oRoma mutheengo waliveliwa namalaba alaba nlabo nimohi.

38Vevale Yesu ahaakohaga, wiira: <<Nyoovo mwinna mikaathe mingaasi? Dhowani moone>>.

Vooniligiiwa, aliwa yahiwelagawo, wiira: <<Hiyo ninna mikaathe mitanu ni somba biili>>.

39Yesu ageewile dhedho, ahaarumaga anamasuuza aaye wi yawiirele anamwinji ale ekaraati nikuru-nikuru vathongweni. 40Aatene yahikaraatigi nikuru na athu zana (100) ni nikuru na makumi matanu (50). 41Nuwindo, Yesu ahithukulaga mikaathe mitanu ni somba biili, osugwa odhulu, omutamaala Mulugu mwa yooja ele. Vooharela opadhula mikaathe nde waavaha anamasuuza aaye wi yaagawele athu ale. Oliye ahiiragana emohive ni somba nde. 42Aatene yahijaga orubala. 43Omagomihedhowa anamasuuza yahidhaalihaga middanga kumi ni miinddi ni dhoohala dha mikaathe ni dha somba. 44Athu yajilege mikaathe yaaligi vakukuuve macikwi matanu (5.000). 45Nuwindo, mowaaguva Yesu ahawiirelaga anamasuuza aaye wi egwele mmwanddeyani esogolege, edhowe nluwa na Betisayida, kobela emohi ya nyaza. Mowindo oliye ahihalaga wi aapaganye anamwinji ale.

Yesu onoweedda vadhulu va mahinje a munyaza

(Matewuzhi 14.22-27; Zhuwawu 6.16-24)

46Agamalile waapaganya aliwa, Yesu ahigwelaga omwaangoni wi alobele. 47Oribaga, mwanddeya waaligi vaari va nyaza, vano Yesu ahalilege vamuruddani vale yeeka. 48Yesu ahinonaga wi aliwa yahikanna makathamiho a ocapa mwanddeya, mwaha wi pevo yahitthabwaga. Omaselo, Yesu ahidhowaga waaligi aliwa eeddaga vadhulu va mahinje munyaza. Akalagahi onowaakwaranya. 49Vamooniligiisu wi oneedda vadhulu va mahinje, aliwa yoobuwelaga wi muzimu, yookuwaga. 50Aatene yeeraga ogurumela vamooniligiisu. Mbwenye mowaaguva Yesu ahiwogaga ni aliwa, wiira: <<Mulibe mirima, di miyo, kamoove!>> 51Nuwindo, Yesu ahigwelaga mmwanddeyani ni aliwa, vano pevo yahimaalaga. Yootikinaga vajinji. 52Aliwa kayeewelegemo yootikiniha yowiinjivihiwa wa mikaathe. Yahummihaga mirima dheewa.

Yesu agali murudda wa oGenezareti

53Vano egalabuwile nyaza, yahifiyaga murudda wa oGenezareti, omagelela mwanddeya weewa. 54Mowindo egakitile mmwanddeyani, mulogo wahimudidelaga Yesu. 55Ndala, athu a murudda waatene olene yegi othamaga, yowaathukulaga aredda vamateteni yaadhowagana waaligi Yesu. 56Vano Yesu aafunaga odhowa mmiruddani, naari mmaluwani, naari mburo dhimohi, athu yowaathukulaga aredda wadhaagana vathaddo, yoolobaga ni ntidi wi yaahiye vang'ono aredda ekahinye mmagomelo mwa yoowara yaaye. Aatene alene yamukahinyaga oliye, yooyilaga.

Currently Selected:

Maruku 6: tke

Highlight

Copy

Compare