Maruku 13

Etoonyihedho ya makuthulo a dhaatedhene

(Matewuzhi 24.1-35; Luka 21.5-37)

1Vevale Yesu akumaga mu nyuba ya Mulugu, namasuuza aaye mmohi ahimwaaddelaga, wiira: <<Namasuuziha, moone mamagiwelo ni oriya wa mabwe a nyuba ya Mulugu!>>

2Yesu ahimwaaddelaga, wiira: <<We onootikina nyuba dhuulubale nda? Kunaakale nibwe vadhulu va nibwe nikwaaye nihinaadhe nihibwanyuliwe>>.

3Yesu agakaraatile vaMwaangoni wa Olivera wang'anana ni nyuba ya Mulugu, Peduru, Tiyago, Zhuwawu ni Andire yahidhowaga omukoha ombale, wiira: 4<<Kanaaddeleni dhego dhedho dhineereyege alini? Kanaaddeleni etoonyihedho enooniha wi dhego ndi dhineere wiireya siivi?>> 5Vano Yesu ahambeelaga wawaaddela, eeraga: <<Pole-pole ahikalevo oneere ooholoseni. 6Vowi enoodha efiye athu ajinji mundina naaga, yiirege: <Miyo gili oliyeene>. Eneere waaholosa athu ajinji. 7Muhukuuwe mweewaga miselu dha koddo naari dhooruma dha koddo, mwaha wi dhego ndo soofuneya wi dhiireye, mbwenye makuthulo kinafiye. 8Mwaha wi nlogo nneerege owana koddo ni nlogo nimohi, omwene oneerege owana ni omwene omohi. Mburo dhoohiyana-hiyana onoodha okalewo othikeya wa elabo ni dala. Dhoopadduwa nda dhinaakale dhooligana ni dhoovoreya dha mwihiyana mudhidhi wa obala.

9<<Pole-pole, muxage! Muneerege omagiwa muthukuleliwege mmithegoni mwa miladdu, muwaxuliwege mu nyuba dha matugumano. Teto muthukuleliwege vameentoni va makuminadori ni va mamwene, mwaha wa ndina naaga, vowi munogiirela onamoona teto mwiirelaga onamoona wa Muselu Wapama. 10Ndo dhineereye mwaha wi soofuneya vowambeela olaleyiwe Muselu Wapama wa malogo maatene. 11Nyo mwamagiwa, muthukuleliwa mmuthegoni mwa miladdu, kamukathamiheyege mudhidhi ohunaakwane mwiiraga: <Nnaawoge ddi?> Mudhidhi olene muwogege eyene muneerigiinyu mvahiwege, vowi kahuwo nyo munawogege, mbwenye Muneba Woweela bunawogege.

12<<Addibila eneerege waapeleka addibiliiwa wi epiwege, abaabi eneerege waapeleka aniiwa, ahima eneerege wawiinyuwela abaabiwa yaapeelelaga wi epiwe. 13Nyo muneerege wiiddiwa ni athu aatene mwaha wa ndina naaga, mbwenye ole onaavilele ofiyedha omakuthulo onoodha avulumusiwe.

14<<Mwadha moona yoonyakavala yoobwanyula egali vamburoni vahafwaneeleliiwa,#13.14 Daniyeli 9.27; 11.31; 12.11. (ole oneelenga eewelelemo). Ole onaakale oZhudeya athawele omwaangoni. 15Ole onaakale vadhulu va nyuba, athawe mowaaguva, kavolowe mba wi athukule dhego. 16Ole onaakale omudda athawe mowaaguva, kawelele vaade wi athukule kasaako yaaye. 17Ooddilu ba ahiyana enaakalena wari mudhidhi oyene teto enawaamwihege ahima. 18Lobelani wi dhego dhi dhinaadhe dhiireye mudhidhi wooddiddila. 19Mwaha wi mudhidhi oyene okubanya ni masooso enaakalewo kinakalegewo wambeela Mulugu vipaddusiliiye elabo ofiyedha peeno. Teto kadhidha dhiireya dila emohi. 20Nabwiya aheere ahaavugula malabo ayo, kalivo muthu naari mmohi aavulumusiwe. Mbwenye malaboya waavugulele mwaha wa athu yaasakuliliiye. 21Vevo muthu mmohi owaaddelani, eeraga: <Moone! Kirixtu#13.21 Kirixtu mu ewogelo ya eGerego enatapulela Muthikitheliwi, Misiya, naari wi oosakuliwa a Mulugu, oyene onaavulumuse athu. ole aroromelihiwe oli va!> naari eeraga: <Ole oli wule!> kamurumeedhe. 22Ginawogela ela vowi eneere okumelela athu ajinji ooratha eneerege nili <Kirixtu ole aroromelihiwe,> ni anamavuhulela ajinji ooratha, eneeregena dhitoonyihedho ni dhootikiniha ni mukalelo wowi dhaandeyaga yanyengethege ni oosakuliweene a Mulugu. 23Mbwenye nyo muxage miyo ginowuwaaddelani dhaatedhene dhihinapadduwe.

Odha wa Mwaana a Muthu

24<<Egavirile malabo ayene a masooso, osogolowa,

<nduwa nnoodha nribe, mweeri kunaamoneyege,

25 ttendderi dhinoodha dhimorewo odhulu.

Kopolo dha odhulu dhinoodha dhithikeye>. # 13.24-25 Ezaya 13.10; 34.4.

26<<Vevo athu aatene enoodha emoone Mwaana a Muthu adhaaga mmiraboni ni owodha wuulubale ni nthithimiho.#13.26 Moone Daniyeli 7.13; Ovuhulela 1.7. 27Oliye oneere waaruma angero aaye wi yaatugumanye oosakuliwa a Mulugu a elabo yaatene, dhipaddi nnayi dha mmagomelo mwa elabo ya vati ni ya odhulu.

28<<Musuuze dhinasuuziha namutaambwi,#13.28 Naari wi: namutaambu. moonaga mijindda dhiwa dhambeelaga ofeewa mataakuru epwedheyaga, nyo munonona wi elimwe ehaaddamela. 29Mwa mukalelo mmohive nyo mwadha moona dhego dhedhi dhipadduwaga, munone wi Mwaana a Muthu ohaaddamela oli vamulagovene. 30Ebaribareene ginowuwaaddelani wi nlogo nenddi kannamale nda dhaatedhene dhihinapadduwe. 31Elabo ya vati ni odhulu dhinoodha dhimale, mbwenye madhu aaga kidha emala.

Nlabo noomariha kaninoneyile

(Matewuzhi 24.36-51)

32<<Mbwenye dha nlabo nddo ni mudhidhiya kalivo ononile, naari angero a odhulu, naari Mwaana, ononile di Babe baahi. 33Mowindo muxage! Mukalege owiisasanyedheleene mwaha wi kamunonile mudhidhiya onafiya alini. 34Dhili wona muthu onavenya mwiilaboni mwaaye, ahiya vaade vaaye mmadani mwa amwiimeleli kadda muthu ni mabasa aaye, amuruma namaang'anela wi akale meento. 35Ninyeene teto eng'anelani, mwaha wi kamunonile mudhidhi onadha afiye muliba nyuba; onowaanda ofiya ciguwo, vaari ni vaari va mahiyu, omaselo naari ogasile. 36Oliye adhaaga moorurumusa, ahuufwanyeni mugonaga. 37Dhinowaaddeliimini ndi ginowaaddelani mwaatene, mukale meento!>>

Currently Selected:

Maruku 13: tke

Highlight

Copy

Compare