Maruku 14

Opanganela dha ompa Yesu

(Matewuzhi 26.1-5; Luka 22.1-6; Zhuwawu 11.45-57)

1Egahalile malabo meenddi a Othabela wa Paxkwa#14.1 Othabela wa Paxkwa yaali mathanga oofuneyesesa a aZhudewu. Moone Okuma 12.1-27. Vowi Yesu avenyihiwe nlabo nenddo na Paxkwa, hiyo dhiinova Paxkwa eehu nnathabela ovenyihiwa wa Yesu muukwani. ni a Othabela wa Mikaathe Dhoohuheliwa Emela, apogo a anamakutha ni anamasuuziha a Malamulo yoosayelaga mukalelo woomwihidda Yesu, moohunoneya ni athu wi empe. 2Aliwa yowiiraga: <<Kaniirena dhedho mudhidhi wa Mathanga a Paxkwa ola wi nnaadhe nitatamule wiinyuwela wa athu>>.

Mwihiyana mmohi onomukuthulela makura Yesu oBetaniya

(Matewuzhi 26.6-13; Zhuwawu 12.1-8)

3Nlabo nimohi Yesu aaligi oBetaniya mu nyuba ya Simawu, aali muliba maredda.#14.3 Maredda mu ewogelo ya eGerego kinaagana mareddave mbwenye teto dhiredda dhoohiyana-hiyana dha nikupa na muthu. Mudhidhi wooja ahifiyaga mwihiyana mmohi adhiilegena garaafwa na alabasuturu,#14.3 Alabasuturu naali nibwe noozhazhaala na mooneyelo oweela nasasanyiwana mino, milinga ni magaraafwa a makura oonukwela. mwaaligi makura oonukwela a mutheengo wookwima eneeriwa naarudu. Ahipwesaga garaafwa ndde, makuraya omukuthulela Yesu mmuruni.

4Athu yaaligi vevale yahitakaleliwaga yoowogaga mmohi ni mukwaaye, yiiraga: <<Onoongele ddi makura ala? 5Makura ala aheere waaguliha, korowa dha parata dhowaakwana mazana maraaru (300),#14.5 Korowadha dhowaakwana omulivela muthu alaba yaaka. korowadha eere waagawela athu oorabula!>> Yahambeelaga omwaaba mwihiyana ole.

6Yesu ahaasumululaga, wiira: <<Kamwihiyeni! Munamukathamihela ddi? Egiireliiye sapama. 7Athu oorabula enaakalege ni nyo malabo maatene, mwafuna muneerege waakamihedha, mbwenye miyo kaginaakalege vamohi ni nyo mudhidhi waatene. 8Oliye wiirile dhaandiliiye wiirana okuthulela makura mwiili waaga, mowinda ohusasanyedha ologohiwa waaga. 9Ebaribareene ginowuwaaddelani wi oli waatewene mwiilaboni onaalaleyiwege Muselu Wapama ola, athu eneerege omuwoga mwihiyana ola, emuubuwelelaga mwaha wa dhedho dhigiireliiye>>.

Zhuda onowiiwanana ni apogo a aZhudewu dha ompeleka Yesu

(Matewuzhi 26.14-16; Luka 22.3-6)

10Nuwindo, Zhudasi a oEsikariyothi, mmohi mwa anamasuuza aaye kumi ni abiili, ahidhowaga ogumana ni apogo a anamakutha wi ampeleke Yesu wa aliwa. 11Aliwa veewiligiiwa dhedho yahidhiveliwaga, yahimuroromelihaga omvaha korowa. Zhuda wambeela osayela mpatha wowi ampeleke Yesu.

Yooja ya Nabwiya

(Matewuzhi 26.17-30; Luka 22.7-23; Zhuwawu 13.18-30)

12Nlabo nowambeela na Othabela wa Mikaathe Dhoohuheliwa Emela, vapiwa nibila, anamasuuza aaye yahimukohaga, wiira: <<Munafuna nasasanyedhele waani wi mujewo Mathanga a Paxkwa?>>

13Yesu ahaarumaga abiili mwa anamasuuza aaye, wawaaddela, wiira: <<Dhowani muluwani, muneere ogumanana mulobwana agathukule muno wa mahinje, mmuharege. 14Nyuba eneeriiye avolowe mwamwaaddele mwiinya a vaade vo, mwiire: <Namasuuziha onokoha wi: suubi a aleddo wi gijemo Mathanga a Paxkwa ni anamasuuza aaga oli waani?> 15Oliye onowuwoonihani suubi mulubale a mudhulu winna dhego dhaatedhene dhoofuneya. Musasanyedhelemo dhoojadha>>.

16Anamasuuza yahimaruwaga, odhowa oluwani yahifwanyaga dhego dhaatedhene wona Yesu mwawaaddeleliiye, yahisasanyedhaga Mathanga a Paxkwa.

17Ociguwoni Yesu ahidhowaga wewule ni anamasuuza aaye kumi ni abiili ale. 18Egakaraatile ejaga Yesu ahiiraga: <<Ebaribareene ginowuwaaddelani wi mmohi mwa nyo onaja ni miyo onogiguliha wa amwiiddani aaga>>.

19Aliwa yahambeelaga okubanya, ewogaga mmohi ni mmohi, yiiraga: <<Adhe akale miyo?>>

20Mbwenye Yesu ahawaaddelaga, wiira: <<Di mmohi mwa kumi ni abiili, ole onareha mukaathe muziwo mmohive ni miyo. 21Ebaribareene Mwaana a Muthu onookwa wona mulebeliwiiwa dha oliye. Mbwenye oddilu oli ni muthu oyene onampeleke Mwaana a Muthu!#14.21 Mwaana a Muthu Yesu eyaagagana oliyenene. Yaali yapama muthu oyo aheere ahibaliwa!>>

22Aliwa ejagave ndale, Yesu ahithukulaga mukaathe, otamaalela wa Mulugu, ogwaddanya, wawinka anamasuuza aaye, wiira: <<Akelani, muje, ola bu mwiili waaga>>.

23Vooharela ahimuthukulaga nakoma,#14.23 Naari wi: kopo. Moone teto verisikulu 36. omutamaalela wa Mulugu, waavaha anamasuuza aatene, omung'wa.

24Vevale Yesu ahiiraga: <<Ola bu mwazi waaga, mwazi wa nipangano no waandana [nixa], onakuthuleliwa wa athu ajinji. 25Ebaribareene ginowuwaaddelani wi kagidha gimung'wa vinyu dila emohi ofiyedha odha Omwene wa Mulugu, ginadhiimi gimung'we vinyu muxa mwemo>>.

26Vano egeebile njibo noomutamaala Mulugu, yahimaruwaga, odhowaga oMwaangoni wa Olivera.

Yesu onomwaaddela Peduru wi oneere omukoodda

(Matewuzhi 26.31-35; Luka 22.31-34; Zhuwawu 13.36-38)

27Yesu ahawaaddelaga aatene, wiira: <<Nyo muneere ogithawa, vowi Maleba Ootaleleya yiire:

<Ginoodha gimporose makambuzi,

vano mabilaya ebalaleye>. # 14.27 Zakariya 13.7.

28Mbwenye gavenyihiwa muukwani, ginoodhowa osogolo weenyu oGalileya>>.

29Peduru ahimwaaddelaga, wiira: <<Naari aatene yuuleveni, miyo kaginoolevani>>.

30Vevale Yesu, ahiiraga: <<Ebaribareene ginowuwaaddela wi mahiyu a peeno mutubi ahinandde <Kokoliko> dila biili, oneere ogikoodda dila thaaru wiiraga kuginonile>>.

31Peduru ahiilibihedhaga, wiira: <<Naari dhakala dhoofuneya wi gikwe, ginookwa vamohi ni nyo, Nabwiya aaga, kagidha gukooddani>>. Teto aatene yahiwogaga emohive.

Nlobelo na Yesu oZheesimani

(Matewuzhi 26.36-46; Luka 22.39-46)

32Yesu ahidhowaga ni anamasuuza aaye mburo weethaniwa Zheesimani, ahawaaddelaga, wiira: <<Mukaraati veva, miyo ginadhowa galobele>>. 33Ahimuthukulaga Peduru, Tiyago ni Zhuwawu. Yesu ahambeelaga ovoreyiwa ni wukuuwa. 34Vano ahawaaddelaga ale araaru, wiira: <<Murima waaga onokubanya goyi yookwana. Mukale veva mwiyiing'anelege>>.

35Ahisusedhaga osogolo vang'ono okokora, olobelaga wi dhakala dhoorumeedheya Mulugu amurabelihe mudhidhi ole wa goyi. 36Oliye ahilobaga, wiira: <<Babani, Babani oodhivela! Wa nyo dhego dhaatedhene dhinowaandeya. Miyo ginowuulobani mugirabelihe nakoma ola a goyi.#14.36 Nakoma ola a goyi naali nifwanafwaniho nnawoga dha Yesu wi eere orumeedha naari okoodda goyi eyene yamujejiha. Vano dhihiireye wona munafuneliimi, mbwenye dhiireye wona munafuneliinyu>>.

37Nuwindo, ahiwelelaga waaligi anamasuuza ale araaru aafwanyilege egonaga. Vano ahiwogaga ni Peduru, wiira: <<We Simawu, onoogona? Kawaandile ovilela wora emohi? 38Mwiyiing'anele, mulobelege wi muhumorele moweehiwani. Epaddi emohi muneba oli wooliba, mbwenye mwiili ohulodhowa>>.

39Dhigeereyile ndo, Yesu ahiwelelaga olobela, alobaga emohive. 40Awelagawo dila ya nabiili, aafwanyilege teto egonaga vowi meento eewa yahinyemeliwaga ni kove. Aliwa kayanonaga yoofuna omwaaddela.

41Vano awelagawo dila ya neethaaru ahiiraga: <<Munoogona, mvumaga? Baahi! Mudhidhi ohufiya, Mwaana a Muthu onopelekiwa mmadani mwa anamathega. 42Mvenye! Nidhowege! Mmoone onafuna ogipeleka, ole onowaaddamela>>.

Omagiwa wa Yesu

(Matewuzhi 26.47-56; Luka 22.47-53; Zhuwawu 18.1-11)

43Mudhidhi oyene Yesu awogagave ndo ahifiyaga Zhudasi mmohi a anamasuuza kumi ni abiili ale, aaveleelaga alobwana ajinji egathukule masupaadda ni golomonddo. Aliwa yarumiwege ni apogo a anamakutha, anamasuuziha malamulo ni apogo a aZhudewu.

44Muliba ompeleka ole yahiiwananelaga etoonyihedho, wiira: <<Oyene gineeriimi gimulojele ni bezhu di oyene mmwihidde, mmudhowegena, mmwiing'anelege pama>>. 45Zhuda vafiyiligiiye ahimwaaddamelaga Yesu, wiira: <<Namasuuziha!>>, ombezhari. 46Vano athu ale yaaligi ni Zhuda yahifiyaga, omwihidda Yesu, ommaga. 47Mbwenye mmohi mwa anamasuuza aaligi vevale ahixomolaga supaadda, omporosana mwiimeleli a musogoleli a anamakutha, ompadha nibaru na omoononi wooja.

48Yesu ahiwogaga ni aliwa, wiira: <<Mwaha bwaddi mudheeliinyu ogihidda ni masupaadda ni golomonddo wona gili mbava?>> 49Miyo gakala ni nyo malabo maatene gisuuzihaga mu nyuba ya Mulugu, nyo kamugihiddile. Mbwenye nda dhineereyele Maleba yaakwanelihiwe. 50Nuwindo, anamasuuza aatene yahimwihiyaga, othawa.

51Vahikalaga muzombwe mmohi amuharaga Yesu. Oliye eekuneelege ni guwo, kaawarilege yego emohi. Athu ale efunaga omwihidda, 52oliye ahihiyaga guwo ele, othawa madave.

Yesu va Nikuru nuulubale na apogo a aZhudewu

(Matewuzhi 26.57-68; Luka 22.63-71)

53Yesu ahithukuleliwaga wa musogoleli a anamakutha, yahitugumanaga vevale apogo a anamakutha aatene ni apogo a aZhudewu, vamohi ni anamasuuziha malamulo. 54Peduru oomuharaga moolapelana ofiya vathaddo va nyuba ya musogoleli a anamakutha. Vevale vahikalaga anamaang'anela yakaraatilege veeko yoothaga. Peduru ahikaraatigi vevo ni anamaang'anela a nyuba ya musogoleli a anamakutha.

55Apogo a anamakutha ni Nikuru nuulubale na apogo a aZhudewu yoosayelaga onamoona wi Yesu apiwe, mbwenye kayamfwanyilegena mwaha. 56Athu ajinji yoomurathelaga Yesu, naari ndo onamoona weewa kawaakwanaga.

57Amohi yahivenyaga owogaga dhoomurathela, yiiraga: 58<<Hiyo nihimwiiwa eeraga: <Miyo ginobwanyula nyuba ya Mulugu ela yoomagiwa ni madada a athu, va malabo maraaru ginomaga emohi ehinaamagiwe ni madada a athu> >>. 59Naari ndo onamoona weewa kawaakwanaga.

60Musogoleli a anamakutha ahivenyaga vameentoni va athu aatene omukoha Yesu, wiira: <<We kunaakula yego? Kunafuna wiyaakihedha dhinawogiisu dha we?>> 61Yesu kaakulilege yego. Musogoleli a anamakutha ahimukohaga, wiira: <<We oli Kirixtu,#14.61 Kirixtu mu ewogelo ya eGerego enatapulela Muthikitheliwi, Misiya, naari wi oosakuliwa a Mulugu, oyene onaavulumuse athu. Mwaana a Mulugu Ooreelihiwa?>>

62Yesu ahimwaakulaga, wiira: <<Miyo gili. Teto munoodha mmoone Mwaana a Muthu agakaraatile omoononi wooja wa Oowodha-wodha akitaga odhulu mmiraboni>>.

63Vano musogoleli a anamakutha ahitalaga dhoowara dhaaye, wiira: 64<<Muhumwiiwa amunyemulaga Mulugu. Ki nnaasayelege onamoona wa ddi?>> Aatene yahithongaga wi ofwaneelele apiwe.

65Amohiwa yahambeelaga omutapera mare, yoomukuneelaga wiintoni waaye ni guwo, omuddwadhaga, yiiraga: <<Ovuhulele! Wuuddwadhile baani?>> Anamaang'anela yahimwaakelelaga omuddwadhaga.

Peduru onokoodda wi ohumunona Yesu

(Matewuzhi 26.69-75; Luka 22.54-62; Zhuwawu 18.15-18; 18.25-27)

66Peduru agali muddibani vathaddo, ahifiyaga mmohi mwa amwiimeleli a namwali a musogoleli a anamakutha. 67Vamooniligiiye Peduru oothaga, ahimwaang'anaga pama, wiira: <<We teto waali ni Yesu oNazarethi>>.

68Mbwenye oliye ahikooddaga, wiira: <<Miyo kagimunonile, kaginonile enawogiiwe>>. Ahivenyagavo odhowela vamavolowelo va cinga. Ogavirele mudhidhi vang'ono mutubi ahunddaga: <<Kokoliko>>.

69Mwiimeleli ole agamoonile wewule, ahiwelelaga owoga ni ale yamwaaddamelege, wiira: <<Mulobwana ola di mmohi mwa aliwa>>. 70Olenddo wa nabiili Peduru teto ahikooddaga wi kaamunonile Yesu.

Vigavirile mudhidhi vang'ono athu yaaligi vevale yahambeelaga omwaaddela Peduru, yiiraga: <<Ebaribareene we oli mmohi wa aliwa vowi we teto oli muGalileya!>>

71Vano Peduru oomukooddaga ni olibela, eeraga: <<Miyo kagimunonile muthu oyene onamuwogiinyu!>>

72Mudhidhi olene mutubi ahunddaga: <<Kokoliko>> dila ya nabiili, Peduru ahuubuwelelaga dhamwaaddelege Yesu wi: <<Mutubi ahinaandde dila biili, oneere ogikoodda dila thaaru wiiraga kuginonile>>. Vano Peduru ahivenyagavo, wambeela wuundda.

Currently Selected:

Maruku 14: tke

Highlight

Copy

Compare