Maruku 12

Musibe wa anamalima abure

(Matewuzhi 21.33-46; Luka 20.9-19)

1Dhigavirile nde Yesu ahambeelaga owoga ni aliwa mwa musibe, eeraga: <<Mulobwana mmohi alimile mudda wa uuva. Ahaapeeleliha cinga, osasanyamo moovoddela uuva, omaga sanja yowiing'anela, nuwindo mudda ole ahibolihiha#12.1 Abolihiha mudda ndala wakala wowiiwananela wi aveleelege epaddi vang'ono ya dhilo ahadda mmuddani mule. wa anamalima amohi, ovenyavo odhowa elabo emohiwa. 2Ogafiyile mudhidhi woohadda, muliba mudda ahimurumaga mwiimeleli aaye wa anamalima ale wi aakele dhoovaha dha uuva dha mmiddani mule. 3Mbwenye anamalima ale yahimwihiddaga omuddwadha, omuweliha ehimvahile yego. 4Muthu ole ahimurumaga mwiimeleli mmohiwa, mbwenye anamalima ale yahimuddwadhaga muru, omuruwana. 5Muliba mudda ahimurumihaga teto mmohiwa, aliwa ompa. Ahaarumaga amohiwa ajinji, mbwenye anamalima ale yahaaddwadhaga amohi, amohiwa yahaapaga.

6<<Ahalilege mmohi baahi, omurumawo mwaana onamudhiveliiye, wiira: <Ola oli mwaanaga, enomuriiha>.

7<<Anamalima ale yahaaddelanaga mmohi ni mukwaaye, yiiraga: <Ola di namahalana mudda, nimpe, nihalena mureeleloya>. 8Vano yahimwihiddaga mwaana a mwiinya ompa, ovokedha muruthuya ode wa cinga na mudda ole.

9<<Vano miyo ginowuukohani: Ki muliba mudda ole adhaaga onawiirena avi anamalima ale? Oliye onoodha aape, eera ndo aabolihe amohi muddaya. 10Nyo kamuneelengege Maleba Ootaleleya? Yiire:

<Nibwe nenddo nakooddile anamamaga nyuba,

ndda nihisadduwa okala nibwe noohiddeela nyuba.

11 Nabwiya deerilena dhedhi, dhili dhootikiniha

vameentoni veehu> >>. # 12.11 Masaalimu 118.22-23.

12Apogo a anamakutha ni anamasuuziha malamulo egeewelelemo wi musibe ole Yesu aasibaga aliwa, yoosayelaga omwihidda. Mbwenye yawoovaga athu, yahimwihiyaga, aliwa ovenyavo.

Opeleka musoko wa Sezari

(Matewuzhi 22.15-22; Luka 20.20-26)

13Vooharela athu amohiwa a nikuru na aFarizi ni amohi a nikuru na Heroddi yahirumiwaga wi yamuwage muwano Yesu. 14Egafiyile, yahiiraga: <<Namasuuziha, nihinona wi nyo munowogave ebaribari teto kamunamoova muthu, kamuneelenga wi ola baani, mbwenye munosuuziha dila ya Mulugu ni ebaribari. Dhinorumeedheya naari kadhinarumeedheya opeleka musoko wa Sezari? Nipelekege naari kanipelekege?>> 15Mbwenye vowi Yesu ahinonaga moobuwelo eewa oonyengetha, ahiiraga: <<Munageehela ddi? Kadhanaani korowa emohi ya parata#12.15 Naari wi: denariyo. Denariyo yaali korowa yawale ya parata ya oRoma mutheengo waliveliwa namalaba alaba nlabo nimohi. goone>>. 16Aliwa yahimwinkaga korowa ya parata, oliye ahaakohaga, wiira: <<Kove elivo sawani? Ki ndina nilebiwevo thawani?>> Aliwa yahaakulaga, wiira: <<Dha Sezari>>.

17Vano Yesu ahawaaddelaga, wiira: <<Mumvahege Sezari eli ya Sezari, mumvahege Mulugu eli ya Mulugu>>.

Aatene egeewile madhu ale, yahitikinaga.

Ovenyihiwa muukwani

(Matewuzhi 22.23-33; Luka 20.27-40)

18Nuwindo, aSaduseyi amohiwa yahidhaaga omwaaddamela Yesu, ala baayene eneera kawuli ovenyihiwa muukwani, yahimukohaga, wiira: 19<<Namasuuziha, Mozezi ahileba nlamulo nowi, mulobwana akwa amwihiya mwihiyanaaye ahinna ahima, ddibile amutelege maamukweleya wi ambalele ahima ddibile ole yeelengiwege ahima a mwanookwa. 20Dhahiireya ndala yahikalawo addibila atanu ni abiili. Owambeela ahimutela mwihiyana, oliye okwa, ahimbalilena mwaana. 21A nabiili omutela maamukweleya teto okwa ahimbalile mwaana. A neethaaru dhahiireya mukalelo mmohive oyene, 22Kaalivo mwa atanu ni abiili ale ambalile mwaana teto omagomihedhowa mwihiyana ole okwa. 23Ki nlabo na omavenyihiwelo muukwani, athu yadha evenyihiwaga muukwani mwihiyana ole onadha eeriwege mwadha wani, vowi addibila aatene atanu ni abiili ale yahimutela?>>

24Yesu ahawaakulaga, wiira: <<Munaviriganihela mwaha woohunonelamo Maleba Ootaleleya, naari owodha wa Mulugu! 25Vowi nlabo noovenyihiwa muukwani nafiya, kalivo onaatelege naari oteliwa. Aatene munaakale wona angero a odhulu. 26Mbwenye dhoovenyihiwa muukwani, nyo kamweelengile muniivuru na Mozezi madhu enawoga dha nikupu nahiddaga munddo? Vevale Mulugu ahimwaaddelaga Mozezi, wiira: <Miyo gili Mulugu a Abarahamu, Mulugu a Ezaaki ni Mulugu a Yakobo?>#12.26 Moone Okuma 3.6. 27Mulugu kahuwo Mulugu a athu ookwa, di Mulugu a athu ookalawo. Ebaribareene nyo muhuholowa!>>

Nlamulo noofuneya

(Matewuzhi 22.34-40; Luka 10.27)

28Namasuuziha mmohi a Malamulo ahimwaaddamelaga Yesu, omvuruwanaga dhavaanyihanigiiwa. Ageewile wi Yesu ohawaakulaga pama aSaduseyi ale, ahidhaaga waaddamela vaaligi Yesu, omukoha, wiira: <<Mwa Malamulo maatene nuulubale thiivi?>>

29Yesu ahimwaakulaga, wiira: <<Nlamulo nuulubale thi nddi, <Mwiiwe nyo aEzarayeli! Nabwiya Mulugu eehu, di Nabwiya mmohive. 30Omudhivelege Nabwiya Mulugu aawo ni murima waawo waatene ni egumi yaawo yaatene, wiiwelelamo waawo waatewene ni kopolo dhaawo dhaatedhene>.#12.30 Deteronomiyo 6.4-5. 31Nlamulo na nabiili thi nddi: <Omudhivelege mwaaddamani aawo wona muneedhiveliiwe.>#12.31 Levitiku 19.18. Kaniliwo nlamulo nimohi noofuneya okwaranya alena>>.

32Namasuuziha a malamulo ole ahiiraga: <<Nabwiya muhaakula pama muwogiliinyumo wi Mulugu di mmohi, kaliwo mmohiwa ahili oliye yeeka. 33Teto muhuwoga pama mwiiriliinyu nimudhivelege Mulugu ni murima weehu waatene, wiiwelelamo waawo waatewene ni kopolo dheehu dhaatedhene teto naadhivelege amwaaddamani eehu wona muneedhiveliihu, mwaha wowi dhaatedhene nda, dhinofuneya okwaranya opeleka mukutho wa aneenyama oopahiwa, naari mikutho dhimohi dhoohiyana-hiyana>>.#12.33 Moone Ozeya 6.6.

34Yesu veewiligiiye waakula ni ononelamo wa namasuuziha ole, ahimwaaddelaga, wiira: <<We kulapele ni Omwene wa Mulugu>>. Agawogile ndo, kaalivo mmohi axixile omukoha yego.

Kirixtu di Nabwiya a Davidi

(Matewuzhi 22.41-46; Luka 20.41-44)

35Yesu aasuuzihaga athu mu nyuba ya Mulugu ahaakohaga, wiira: <<Mwaha bwaddi anamasuuziha a malamulo enawoga, yiiraga: <Kirixtu#12.35 Kirixtu mu ewogelo ya eGerego enatapulela Muthikitheliwi, Misiya, naari wi oosakuliwa a Mulugu, oyene onaavulumuse athu. di Mwaana a Davidi>? 36Mwiinyeene Davidi odheela mwa Muneba Woweela, ahiiraga:

<Nabwiya Mulugu ohuwoga wa Nabwiya aaga, wiira:

Okaraati omoononi waaga wooja ofiyedha

gaahele amwiiddani aawo vati va manyalo aawo>. #12.36 Masaalimu 110.1.

37Akala mwiinyeene Davidi onamwiira <Nabwiya>, onaakale addi mwaanaye?>>

Anamwinji yoomwiiwaga ni odhiveliwa.

38Aasuuzihaga, ahiiraga: <<Pole-pole ni anamasuuziha a Malamulo. Enodhiveliwa owara mikanjo dhoolapa efunaga olojeliwa ni nriiho mburo dhowooneya. 39Aliwa enodhiveliwa okaraatela dhittengu dhowambeela mu nyuba dha matugumano, enothamagela okaraatela dhittengu dhowambeela, mburo dha nriiho, mmathangani. 40Aliwa enowaawaddihedha amaamukwele wi eveleelege dhookalana dheewa, enowiirana malobelo oolapa moonyengetha. Athu ala enoodha elagiwe mookwaranya>>.

Yooveleela ya maamukwele oorabula

(Luka 21.1-4)

41Nlabo nimohi Yesu ahikaraatigi waaddamela vaaligi kaxa ya dhooveleela mu nyuba ya Mulugu, owaasugwaga athu mamorihedhelomo korowa dheewa dha gwingwi. Ooreela ajinji yoohelagamo korowa dhijinji.

42Ahidhaaga vevale maamukwele mmohi oorabula omorihedhamo korowa biili dhing'onong'ono dha gwingwi dhinaligana ni sentaavu. 43Yesu ahawiithanaga anamasuuza aaye, wawaaddelaga, wiira: <<Ebaribareene ginowuwaaddelani wi mwihiyana oorabula ola, ohuhela mukaxani mu waakwaranya aatene! 44Ginawoga ela vowi aatene ehelilemo moothapa, mbwenye oliye moorabula mwaaye ohupeleka dhaatedhene dhanniiyena, dhafuniiye wiikamihedhana>>.

Currently Selected:

Maruku 12: tke

Highlight

Copy

Compare