Matewuzhi 7

Kammukonege muthu

(Luka 6.37-42)

1<<Kammukonege muthu wi teto Mulugu onaadhe ookoneni. 2Vowi ni mukalelo onaakoniinyu athu, Mulugu onoodha ookoneni ni mpimo oyene munapimiinyuna teto oliye oneere wuupimanaani oyene.

3<<Mwaha bwaddi onoona ekata eli mwiintoni mwa ddibilo, ohoonaga emiri eli mwiintoni mwaawo? 4Naari onaawoge addi ni ddibilo wiiraga: <Ogihiye givenyihemo ekata mwiintoni mwaawo>, oganna emiri mwiintoni mwaawo? 5We namanyengetha! Vowambeela ovenyihemo emiri eli mwiintoni mwaawo, weera ndo oneerege woona pama wi ovenyihemo ekata eli mwiintoni mwa ddibilo.

6<<Muhuvahege dhego dhoreelihiwa anabwa, naari ovokedha kumba, dhego dheenyu dha mutheengo wookwima, vowi kumba dhinonyingalela dhego dheenyu dha mutheengo wookwima, vano anabwa enoorugunuwa yuudaruleni.

Owoma murima wa Mulugu

(Luka 11.9-13)

7<<Lobani muneere ovahiwa; sayelani muneere ofwanya; gogoddani muneere ofuguleliwa. 8Vowi aatene enaloba enowaakela, ole onasayela onofwanya, ole onagogodda onofuguleliwa.

9<<Muthu baani mwa nyo oneera mwaanaye amuloba mukaathe amvaha nibwe? 10Naari oneera amuloba somba amvaha nyowa? 11Nyo mugalive abure muhunona waavaha dhego dhapama aniinyu, ki Babiinyu oli odhulu kanaavahe mootthabwa dhego dhapama wa ale enamuloba? 12Dhaatedhene dhinafuniinyu wi athu yuwiirelegeni, nyo teto mwawiirelege aliwa,#7.12 Dhaatedhene dhinafuniinyu wi athu yuwiirelegeni, nyo teto mwawiirelege aliwa. Madhu ala eneeriwa mukalelo wa oro bu muruya wa nlamulo ni dhosuuziha dha anamavuhulela, weeragana ndo ohaakwaniha dhaatedhene. vowi ela sinatapulela Malamulo ni dhosuuziha dha anamavuhulela.

Musiwo woopurana

(Luka 13.22-30)

13<<Ovolowele musiwo woopurana! Mwaha wi musiwo woorambalala ni dila yookweya dhinadhowiha omarimeelelo, ajinji enohara dila eyene. 14Mbwenye musiwo woopurana ni dila yooyeva, dhinadhowiha wiigumini yoohumala, athu vang'ono binafwanya dila eyo>>.

Muthanko ni dhoovaha dhiwa

(Luka 6.43-45)

15<<Muwaraale ni anamavuhulela ooratha! Mwaha wi enoodha wa nyo ni onyengetha wona mabila oopwaasa, mbwenye mmurimani mweewa egali miiji dhooguwa. 16Athu alena nyo munoodha mwaadidele ni dhoovaha dheewa. Mwaha wi kadhidha dhiireya nroga nivahe uuva. Naari mmurulani mvahe mayeebe. 17Mowindo, muthanko waatene wapama onavaha dhapama, mbwenye muthanko wabure onavaha dhabure. 18Teto kadhidha dhiireya wi muthanko wapama ovahe dhabure, naari muthanko wabure ovahe dhapama. 19Muthanko waatene ohunavaha dhapama onogwaddiwa ovokedhiwe vamunddoni. 20Mowindo, anamavuhulela ooratha ayo munoodha mwaadidele ni dhoovaha dheewa.

21<<Kahuwo aatene eneera: <Nabwiya, Nabwiya>, enaavolowe mu Omwene wa Odhulu, mbwenye ale eneerana ofuna wa Ababa eli odhulu. 22Nlabo#7.22 Nlabo nnaagiwana Nlabo na Othongi Woogomihedha. nddo nadha nifiya athu ajinji enoodha egiirelege: <Nabwiya, Nabwiya! Kahuwo hiyo navuwihesa mutheenga wa Mulugu mwa ndina neenyu? Nikumihaga mineba dhootakala mwa ndina neenyu? Neerana dhootikiniha dhuulubale mwa ndina neenyu?> 23Vevo miyo ginoodha gawiirele voweela: <Kaguunonileni. Mvenyevo va, athu owiirana dhabure!>#7.23 Masaalimu 6.8.

Oowaraala ni oolodhowa

(Luka 6.46-49)

24<<Muthu oli aatene oneewa madhu aaga avirihagamo, onaligana ni muthu oowaraala amagile nyuba yaaye, atibile miliddidha addiihiha, asiddela. 25Orubwa muzongwe, mihinje odhaala, pevo ni kuluzi yuulubale oddwadha nyuba ele, mbwenye kayatongwile, mwaha wi nyuba ele yahimageya pama. 26Mbwenye muthu oli aatene oneewa madhu aaga ala, ahaavirihagamo, onaligana ni muthu oolodhowa, amagile nyuba yaaye ahisiddelile kaatibele mooddiihiha. 27Vevale muzongwe orubwa, mihinje odhaala, pevo ni kuluzi yuulubale oddwadha nyuba ele. Yahitongwa, obwanyuwa yaatene>>.

28Yesu agamalile owoga madhu alena, anamwinji yahitikiniheyaga ni masuuziho aaye. 29Vowi oliye asuuzihaga wona muthu anna owodha, kaasuuzihaga wona anamasuuziha a Malamulo.

Currently Selected:

Matewuzhi 7: tke

Highlight

Copy

Compare