Matewuzhi 8

Oyilihiwa wa muthu a maredda

(Maruku 1.40-45; Luka 5.12-16)

1Yesu akitaga omwaangoni anamwinji yegi omuhara. 2Mulobwana mmohi a maredda#8.2 Maredda mu ewogelo ya eGerego kinaagana mareddave mbwenye teto dhiredda dhoohiyana-hiyana dha nikupa na muthu. ahimwaaddamelaga, okokora, omweebedha, wiira: <<Nabwiya, mwafuna munowaanda ogeeliha>>.#8.2 Ogeeliha Naari wi: mugiyilihe.

3Vevale Yesu ahitadeelaga ndada, omukahinya, wiira: <<Gihifuna, kala oweela!>> Mowaaguva aheelihiwaga mwa maredda ale. 4Vano Yesu ahimwiirelaga: <<Kumwaaddele muthu, mbwenye odhowe wa namakutha owoone akala ohuyila teto waveleele mvahi walamule Mozezi wi okale onamoona wa athu>>.#8.4 Levitiku 14.1-32.

Oyilihiwa wa mwiimeleli a sinturiyawu

(Luka 7.1-10)

5Yesu agavolowile oKafaranawu sinturiyawu#8.5 Asinturiyawu yaali asogoleli a anyakoddo zana (100) a aRoma. mmohi ahimwaaddamelaga, omulobaga mwa ntidi, eeraga: 6<<Nabwiya, mwiimeleli aaga vaade onoobulela, kanaanda weedda, onovoreyiwa vajinji>>.

7Yesu ahimwaaddelaga, wiira: <<Ginadhowa wewo, gamuyilihe>>.

8Mbwenye sinturiyawu ahimwaakulaga, wiira: <<Nabwiya, miyo kagili oofwaneelela wi guwaakeleni mba mwaaga. Mbwenye muwoge ndhu neenyu nimohi baahi, mwiimeleli aaga onooyila. 9Mwaha wi gihikalana apogo enawiiweleliimi. Teto gihikalana anyakoddo ginaathongiimi. Gawoga wa mmohi, geera: <Dhowa>, oliye onodhowa, wa mmohiwa gawoga, geera: <Odhe>, oliye onoodha. Teto gamwaaddela mwiimeleli aaga, geera: <Wiirena ela>, oliye onowiirana>>.

10Yesu ageewile dhedhi ahitikinaga, owoga wa athu yamuharaga, wiira: <<Ebaribareene ginowuwaaddelani wi okala ni okala kaginaabihege omoona mwEzarayeli akalana nroromelo nooligana wona na muthu ola. 11Ginowuwaaddelani wi athu ajinji eneerege odha omadheelo wa nduwa ni a omadhowelo wa nduwa ekalena mburo vameeza ni Abarahamu, Ezaaki ni Yakobo mu Omwene wa Odhulu. 12Mbwenye ale yafwaneelele Omweneya enoodha evokedhiwe ode, wa yiihi. Wewo oneere okale wuundda ni otakuna meeno>>.

13Vano Yesu ahiwogaga ni sinturiyawu ole, wiira: <<Odhowege, dhiireye mooligana ni ororomela waawo>>. Nuwindo, mudhidhi mmohive olene mwiimeleli aaye ahiyilaga.

Yesu onowaayiliha athu ajinji

(Maruku 1.29-38; Luka 4.38-41)

14Yesu agafiyile vaade va Peduru amfwanyilege mbogohi a Peduru agakonaantile, abulelaga mwaha wa nipaddawe. 15Yesu ahimukahinyaga ndada, nipaddawe omwihiya. Vevale mma ole ahivenyaga wambeela waakamihedhaga aliwa.

16Egudduguddu-guddu, amohi yahimudheelagana Yesu athu ajinji yahiddiwe ni mineba dhootakala. Vano owiigaraga mineba dhootakala ni madhu baahi, aayilihaga aredda aatene. 17Ahiiragana nda wi dhaakwanele nde dhawogile namavuhulela Ezaya wi:

<<Oliyeene ohuthukula dhoolodhowa dheehu,

ohunaakela teto dhiredda dheehu>>. # 8.17 Ezaya 53.4.

Yesu onowaweeha oofuna omuhara

(Luka 9.57-62)

18Yesu vawooniligiiye athu ajinji yamwaapeelelege, ahawiirelaga anamasuuza aaye wi elabuwele kobela emohiwa ya nyaza.#8.18 Nyaza enaagiwana Nyaza ya oGalileya. 19Nuwindo, ahimwaaddamelaga namasuuziha a Malamulo, wiira: <<Namasuuziha, gineerege wuuharani waatewene onafuniinyu odhowa>>.

20Mbwenye Yesu ahimwaakulaga, wiira: <<Makala ehikanna makungu eewa, balame dha odhulu dhihikanna dhitunji dheewa, mbwenye miyo, Mwaana a Muthu, kaginna voosameeliha muru>>.

21Namasuuza mmohiwa#8.21 Namasuuza mmohiwa enatapulela wi ola kaali munikuruni mwa ale kumi ni abiili yaasakuliiye. ahimulobaga Yesu, wiira: <<Nabwiya, gihiyeni vowambeela gidhowe gaalogohe ababa>>.

22Mbwenye Yesu ahimwaakulaga, wiira: <<Ogihare. Waahiye anookwa yaalogohege anookwa eewa>>.

Yesu onomaaliha kuluzi ni pevo

(Maruku 4.35-41; Luka 8.22-25)

23Nuwindo, Yesu agagwelile mmwanddeyani anamasuuza aaye yahimveleelaga. 24Mowaaguva nahitatamuwaga nipevo nuulubale munyaza, ofiyedha mwanddeya ohala vang'ono obwina. Vano mudhidhi olene Yesu eeraga ogona. 25Vevale anamasuuza aaye yahidhowaga omvenyiha ekuwaga, yiiraga: <<Nabwiya, nivulumuseni! Nnookwa!>>

26Vano Yesu ahaakohaga, wiira: <<Athu ooyeva nroromelo, mwaha bwaddi munooviinyu vajinji?>> Ageere ndo, Yesu ahivenyaga, osumulula pevo ni kuluzi, dhaatedhene omaala. 27Athu yahitikiniheyaga, wiira: <<Muthu baani olaya, onafiyedha wiiweleliwa pevo ni kuluzeene?>>

Yesu onowaayiliha athu oohiddiwa mineba dhootakala

(Maruku 5.1-20; Luka 8.26-39)

28Yesu agafiyile kobela ya nyaza, murudda oneethaniwa Gadara, yahidhaaga wa oliye alobwana abiili yahiddiwe ni mineba dhootakala. Aliwa yakumilege omasiye,#8.28 Masiye a mudhidhi olene yakala wona nikungu. yahikalagana owali vajinji, kaavo muthu avira dila elene. 29Vevale alobwana ale yookuwaga, yiiraga: <<Munafuna ddi ni hiyo Mwaana a Mulugu? Mudheele onirabuliha mudhidhi ohunaakwane?>>

30Wookala hiwule, vookumbuziwaga nikwedda nuulubale na kumba. 31Vano mineba dhootakala dhahimulobaga Yesu mwa ntidi, wiira: <<Mweera munikumiha, munirume navolowe munikwedda na kumba nde>>.

32Yesu ahaakulaga, wiira: <<Kaweni!>> Mineba nde dhahikumaga mwa alobwana ale, odhowa munikwedda na kumba. Nuwindo, kumba dhaatedhene dhahithamagelaga ojijini, oddadda munyaza, okwa.

33Amakambuzi a kumba yahithawaga, ofiya oluwani, owoga dhaatedhene nde dheereyile teto ni dhedho dhawiireyele alobwana ale yahiddiwe ni mineba dhootakala. 34Nuwindo, athu aatene a nluwa ndde yahidhowaga ogumana ni Yesu, vano egamfwanyile yahimulobaga ni ntidi wi avenyewo omuruddani weewa.

Currently Selected:

Matewuzhi 8: tke

Highlight

Copy

Compare