Matewuzhi 6

Dhooveleela wa athu oorabula

1<<Muwaraale, kamwiiregena meerelo eenyu apama vameentoni va athu wi aliwa yuutthettheelegeni, mweera ndo kamudha mwaakela yootthettheeliwana ya odheela wa Babiinyu oli odhulu.

2<<Mwa ela, mwaavahaga aliba ohaleeliwa, kamoobege palaza vaari veenyu wona muneerela anamanyengetha mu nyuba dha matugumano#6.2 Nyuba dha matugumano Nda mu ewogelo ya eGerego dheeriwa sinagoga. Mabasa eewa kayaali oolobelamoove, naari osuuzamo Malamulo, mbwenye teto yowaathongamo athu yahaaharihamo Malamulo a aZhudewu. Moone teto verisikulu 5. ni mmarampani wi etthettheeliwege ni athu. Ebaribareene ginowuwaaddelani wi aliwa ehaakela yootthettheeliwana yeewa. 3Vano we waafunaga omvaha oohaleeliwa, ndada naawo na moono woong'oto nihinone dhineera ndada naawo na moono wooja, 4wi mvahi waawo okale wa wipiini. Vano Ababo, enoona dha wipiini, enowuutthettheela.

Mukalelo woolobela

(Luka 11.1-4)

5<<Mwaalobelaga muhukalege wona anamanyengetha, enadhiveliwa olobela owiimeleene mu nyuba dha matugumano ni mmakulugano wi yooniwege ni athu. Ebaribareene ginowuwaaddelani wi aliwa ehaakela yootthettheeliwana yeewa. 6Mbwenye we waalobelaga ovolowege osuubini waawo, ofugege musiwo, olobele wa Ababo eli wipiini; vano Ababo enoona dha wipiini eneere wuutthettheela. 7Waalobelaga kuvirusedhege madhu mamohive wona athu oode, vowi enoobuwela wi voowoga vajinji fineeriisu yiiwiwe. 8Nyo kamwiiregena wona aliwa. Mulugu Babiinyu ohunona dhinoohaleelani muhunamulobe. 9Voolobela mwiirege ayi:

<Babiihu a odhulu,

ndina neenyu noweela nthithimihiwege.

10Omwene weenyu odhe.

Ofuna weenyu wiireyege vati vano

wona muneereyeliiwa odhulu.

11Munivahe peeno yooja yeehu

yowaakwana malabo maatene.

12Munilevelelege dhoothega dheehu,

wona hiyo nnaalevelela athu enanthegela.

13Vano kamurumeedhele wi nimorele moweehiwani,

mbwenye munivulumuse mwa dhabure.>#6.13 Naari wi: Nambure.

[Vowi weenyu bu Omwene, owodha,

ni nthithimiho na okala ni okala. Ameni.#6.13 Ameni enatapulela Dhikale ndo, naari wi Siibaribareene.]

14<<Vowi mwaalevelelaga athu dhoothega dheewa teto Babiinyu a odhulu onowuulevelelani. 15Akala kamunaalevelela athu dhoothega dheewa, Babiinyu kadha oolevelelani dhoothega dheenyu.

Mukalelo woothuga

16<<Mwaathugaga, kamwiyooneyihege okubanya wona anamanyengetha, enasaddula wiintoni weewa ni makuzi, enafuna athu yawoonege wi enothuga. Ebaribareene ginowaaddelani wi aliwa ehaakela yootthettheeliwana yeewa. 17We waafunaga othuga, osusule wiintoni, odholihe makura mmuruni mwaawo 18wi athu ehinone wi onoothuga, mbwenye enone Ababo eli wipiini baahi, vano Ababo enoona dha wipiini eneere wuutthettheela.

Dhooreela odhulu

(Luka 12.33-34)

19<<Mwihiyuugelele dhooreela dha elabo ya vati, vevo oswa ni mukwiti vinanoongiiwa, owiiya vinatataruliiwa yiiya. 20Mbwenye mwiyuugelelege dhooreela odhulu wewo oswa naari mukwiti ohunanoongiiwa, naari owiiya ohunatataruliiwa yiiya. 21Vowi vevo vinaakale dhooreela dhaawo teto murima waawo onakale vevo.

22<<Meento bili panti ya mwiili. Meento aawo yakala apama, mwiili waawo waatene onakala wowaara. 23Akala meento aawo babure, mwiili waawo waatene onakala muyiihini. Akala panti eli mwa nyo enosadduwa yiihi, yiihiya enotthabwa.

24<<Kalivo onaanda wawiimelela anabwiya abiili, sowi oneerege omwiidda mmohi, amudhivelege mmohiwa, naari oneerege wiiveleela wa mmohi, mmohiwa amunyemulege. Kadhinaandeya omwiimelela Mulugu, wiimelela teto dhooreela.#6.24 Dhooreela mu ewogelo ya eGerego enatapulela mamom.

25<<Mwaha wa ela ginowuwaaddelani wi kamusanyeyelege dhinoohaleelani mwiiraga: <Nnaaje ddi?> naari <Nnaang'we ddi?> Vowi egumi yeenyu soofuneya okwaranya yooja, vano mwiili weenyu boofuneya okwaranya yoowara. 26Musugwe, balame dha odhulu kadhinadhala, kadhinahadda, kadhinalogolela mmatatani mbwenye Babiinyu a odhulu onojiha. Ki nyo kamuli oofuneya okwaranya balame?>> 27Kalivo muthu onaanda waakwaniha odheela mookathamiheya weenjedhedha nlabo nimohi na egumi yaaye.

28<<Ki vano mwaha bwaddi musanyeyelaga yoowara? Moone monnuwelo a todo dha mukokolani: Kadhinalaba naari kadhinaluwa guwo. 29Mbwenye miyo ginowuwaaddelani wi naari mwene Salomawu munthithimihoni naaye naatenene kaafiyedhe owara oligana ni todo nda. 30Vano akala Mulugu onowariha manasi a mukokolani, eliwo peenove, omenseloni wiwa evokedhiwa vamunddoni, ebaribareene Mulugu onowuuwarihani, naari nyo mugalive ooyeva nroromelo. 31Mowindo, kamusanyeyege mwiiraga: <Nnaaje ddi? Nnaang'we ddi?> naari <Nnaware ddi?> 32Vowi athu ehinamuroromela Mulugu binasayela dhego dhaatedhene dhedhi; vowi Babiinyu a odhulu ohunona dhinarabuleliinyu mwa dhaatedhene dhedho. 33Musayele vowambeela Omwene waaye ni wogoowa waaye, vano dhaatedhene dhedho muneere weenjedhedhiwa. 34Mowindo muhusanyeyelege nlabo na menselo, nlabo na menselo nnakala ni dhoorusa dheewa-dheewa. Kadda nlabo nihikanna dhoorusa dhiwa dhowaakwana.

Currently Selected:

Matewuzhi 6: tke

Highlight

Copy

Compare