Popular Bible Verses from Matewuzhi 6

Share

Musayele vowambeela Omwene waaye ni wogoowa waaye, vano dhaatedhene dhedho muneere weenjedhedhiwa.

Mowindo muhusanyeyelege nlabo na menselo, nlabo na menselo nnakala ni dhoorusa dheewa-dheewa. Kadda nlabo nihikanna dhoorusa dhiwa dhowaakwana.

<<Mwaha wa ela ginowuwaaddelani wi kamusanyeyelege dhinoohaleelani mwiiraga: <Nnaaje ddi?> naari <Nnaang'we ddi?> Vowi egumi yeenyu soofuneya okwaranya yooja, vano mwiili weenyu boofuneya okwaranya yoowara.

Mbwenye we waalobelaga ovolowege osuubini waawo, ofugege musiwo, olobele wa Ababo eli wipiini; vano Ababo enoona dha wipiini eneere wuutthettheela.

Voolobela mwiirege ayi: <Babiihu a odhulu, ndina neenyu noweela nthithimihiwege. Omwene weenyu odhe. Ofuna weenyu wiireyege vati vano wona muneereyeliiwa odhulu.

Munivahe peeno yooja yeehu yowaakwana malabo maatene.

Munilevelelege dhoothega dheehu, wona hiyo nnaalevelela athu enanthegela.

Vano kamurumeedhele wi nimorele moweehiwani, mbwenye munivulumuse mwa dhabure.> [Vowi weenyu bu Omwene, owodha, ni nthithimiho na okala ni okala. Ameni.]

<<Vowi mwaalevelelaga athu dhoothega dheewa teto Babiinyu a odhulu onowuulevelelani.

Musugwe, balame dha odhulu kadhinadhala, kadhinahadda, kadhinalogolela mmatatani mbwenye Babiinyu a odhulu onojiha. Ki nyo kamuli oofuneya okwaranya balame?>>

<<Mwihiyuugelele dhooreela dha elabo ya vati, vevo oswa ni mukwiti vinanoongiiwa, owiiya vinatataruliiwa yiiya. Mbwenye mwiyuugelelege dhooreela odhulu wewo oswa naari mukwiti ohunanoongiiwa, naari owiiya ohunatataruliiwa yiiya. Vowi vevo vinaakale dhooreela dhaawo teto murima waawo onakale vevo.

<<Kalivo onaanda wawiimelela anabwiya abiili, sowi oneerege omwiidda mmohi, amudhivelege mmohiwa, naari oneerege wiiveleela wa mmohi, mmohiwa amunyemulege. Kadhinaandeya omwiimelela Mulugu, wiimelela teto dhooreela.

Vano akala Mulugu onowariha manasi a mukokolani, eliwo peenove, omenseloni wiwa evokedhiwa vamunddoni, ebaribareene Mulugu onowuuwarihani, naari nyo mugalive ooyeva nroromelo.

Vano we waafunaga omvaha oohaleeliwa, ndada naawo na moono woong'oto nihinone dhineera ndada naawo na moono wooja, wi mvahi waawo okale wa wipiini. Vano Ababo, enoona dha wipiini, enowuutthettheela.

<<Muwaraale, kamwiiregena meerelo eenyu apama vameentoni va athu wi aliwa yuutthettheelegeni, mweera ndo kamudha mwaakela yootthettheeliwana ya odheela wa Babiinyu oli odhulu.

<<Mwaathugaga, kamwiyooneyihege okubanya wona anamanyengetha, enasaddula wiintoni weewa ni makuzi, enafuna athu yawoonege wi enothuga. Ebaribareene ginowaaddelani wi aliwa ehaakela yootthettheeliwana yeewa. We waafunaga othuga, osusule wiintoni, odholihe makura mmuruni mwaawo wi athu ehinone wi onoothuga, mbwenye enone Ababo eli wipiini baahi, vano Ababo enoona dha wipiini eneere wuutthettheela.