Matewuzhi 5

Olaleya wa vamwaangoni

(Luka 6.20-23)

1Yesu agoonile wiinjiva wa athu, ahigwelaga vamwaangoni, agakaraatile, anamasuuza aaye yahimwaaddamelaga. 2Oliye ahambeelaga waasuuziha, eeraga:

3<<Ooreelihiwa baale yinna muneba wowiiyeviha,

vowi Omwene wa Odhulu bweewa.

4Ooreelihiwa baale enaandda,

vowi binatodoliwe.

5Ooreelihiwa baale eli owiiyeviha,

vowi binaakele elabo ya vati

wona yookalana yeewa.

6Ooreelihiwa baale yinna dala ni nthona

dha efunelo ya Mulugu,

vowi binaarubale.

7Ooreelihiwa baale enaweeddiwela thagaraga akwiiwa,

vowi Mulugu onoodha aweeddiwele thagaraga.

8Ooreelihiwa baale eli oweela mirima,

vowi binamoone Mulugu.

9Ooreelihiwa baale eneerana murenddele,

vowi bineethaniwe ahima a Mulugu.

10Ooreelihiwa baale enaharahariwa

mwaha woohara efunelo ya Mulugu,

vowi Omwene wa Odhulu bweewa.

11<<Munakala ooreelihiwa mwaaruwaniwaga, mwaaharahariwaga ni owogeliwa dhootakala dhoohiyana-hiyana mwaha wa miyo. 12Muhagalale, muthabe mwaha wi yootthettheeliwana yeenyu si yuulubale odhulu teto mwa mukalelo mmohive yahaaharahara anamavuhulela yadhiile nyo muhunakalewo.

Anamasuuza a Yesu mwiinyu ni waara wa elabo

13<<Nyo muli mwiinyu wa elabo; ki mwiinyu wakumuwa, onaawelihedhiwe addi wi odhivege? Weera ndo kilivo emohi yowiirana, onoothathileliwa ode, onyingaleliwaga ni athu.

14<<Nyo muli waara wa elabo. Kadhinaandeya ologoha nluwa nimagiwe vamwaangoni, 15naari kinahiddiha panti, ekuneelana mpika, eehi. Enahela mburo wa vadhulu wi waamoneyelege athu aatene eli muwari mwa nyuba eyo. 16Mwa mukalelo mmohive muhiddihe waara weenyu vaari va athu aatene wi yoone meerelo eenyu apama, emuthithimihege Babiinyu oli odhulu.

Malamulo a Mozezi

17<<Kamuubuwelege wi gidheele omariha Malamulo a Mozezi naari masuuziho a anamavuhulela awale. Kagidheele dhedho, eehi, gidheele waakwaneliha masuuziho eewa. 18Ebaribareene miyo ginowuwaaddelani wi odhulu ni elabo ya vati dhakalawoove, naari nlemba ning'onong'ono, naari etoonyihedho emohi ya nlemba kinavenyihiwavo vaMalamuloni. Dhinakala ndo ofiyedha dhaatedhene dhaakwanele. 19Vowi ole onavenyihevo nlamulo nimohi, naari nikale ning'onong'ono nowi avi, aasuuzihaga akwaaye wiirana ndo, muthu oyene oneeriwege mung'onong'ono okwaranya mu Omwene wa Odhulu. Mbwenye ole oneewelela malamulo, aasuuzihaga akwaaye wiirana ndo onakala mpogo mu Omwene wa Odhulu. 20Ginowuwaaddelani wi ororomeleya weenyu mwa efunelo ya Mulugu waahikwaranya wa anamasuuziha a Malamulo ni aFarizi, kalivo mmohi onaadhe avolowe mu Omwene wa Odhulu.

Yesu onosuuziha oteyihana

21<<Nyo mwihiiwa dhawogiwe wa awale-wale dhowi: <Kumpe muthu>,#5.21 Okuma 20.13; Deteronomiyo 5.17. vano <onampa muthu onothongiwa>. 22Mbwenye miyo ginowuwaaddelani wi muthu oli aatene onatakaleliwa ni ddibile, onofwaneelela othongiwa. Naari onamuruwana ddibile#5.22 Enofwanyeya madhu owi: Naari onamuruwana ddibile vihili mwaha mu dhoolebiwa ni madada dhimohi dhixa. Mbwenye anamasuuza ajinji enoobuwela wi vihili mwaha madhu ala kiyalebiwe ni murumiwi Matewuzhi. onofwaneelela othongiwa mmuthegoni; ole onamwiirela ddibile <taduwa>, onofwaneelela odhowa omunddoni woohuthima.

23<<Mowindo, waadhaagana mvahi waawo veebuwani, wuubuwelela wi ddibilo ohukanna mwaha ni we, 24ohiye mvahi waawo veebuwani vevo, vowambeela odhowe wateyihane ni ddibilo, vano owelelewo wapeleke mvahi waawo.

25<<We waadhowaga omathongiwelo osayele oteyihana mundila mowaaguva ni ole wuusumele wi oliye ahuupeleke wa namathonga, namathonga oopeleke mmadani mwa musupayi, oliye oofugele mukaambura. 26Ebaribareene ginowuwaaddela wi kudha okumamo ohulivile korowa yoogomihedha.

Yesu onokooddiha oraruwa

27<<Nyo mwihiiwa dhiwogiwe dhowi: <Kuraruwe>.#5.27 Okuma 20.14; Deteronomiyo 5.18. 28Mbwenye miyo ginowuwaaddelani wi muthu oli aatene onamusugwa mwihiyana ni moobuwelelo oomfuna, ohuraruwa mmurimani mwaaye. 29Vano akala niinto naawo na omoononi wooja ninowuuthegiha, okumihemo, othathilele woolapela. Vowi eli yapama oyeleela yaano emohi ya mwiili waawo, ohiya mwiili waawo waatene ovokedhiwe omunddoni woohuthima. 30Emodha-modhave, akala ndada naawo na moono wooja ninowuuthegiha ogwadde, othathilele woolapela ni we. Eli yapama oyeleela yaano emohi ya mwiili waawo, ohiya mwiili waawo waatene ovokedhiwe omunddoni woohuthima.

Yesu onokooddiha omwalana

(Matewuzhi 19.9; Maruku 10.11-12; Luka 16.18)

31<<Dhihiwogiwa teto, wiira: <Mulobwana amwiigara mwihiyanaaye, enoofuneya amvahe kaarata ya omwalana>.#5.31 Deteronomiyo 24.1. 32Mbwenye miyo ginowuwaaddelani wi aatene enamwalana ni mwihiyanaaye mwahaya ohuli wa mararuwo, onomwiiriha wi araruwege. Vano mulobwana onamutela mwihiyana owiigariwa oyo teto onooraruwana.

Pole-pole ni olibela

33<<Teto nyo mwihiiwa dhaaddeliwe apogo eenyu awale dhowi: <Ohulibelege ebeweene,#5.33 Levitiku 19.12; Numero 30.2. mbwenye enoofuneya wiirena dhalibeliiwe vameentoni va Nabwiya>. 34Mbwenye miyo ginowuwaaddelani wi mwihiye olibela waatewene. Hiyani olibela ni ndina na odhulu mwaha wi bu mpanddo wa Mulugu. 35Naari olibela mu ndina na elabo ya vati, vowi fi voonyingala va manyalo aaye, naari ni ndina na oZheruzalemi mwaha thi nluwa na Mwene mulubale. 36Vano ohiye olibela mu ndina na muru waawo mwaha kunaanda osaddula nthithi nimohi nikala nooriba, naari nikala noweela. 37Mbwenye sapama mwiirege: <Ee>, akala <ee>. Mwiirege: <Naari>, akala <naari>. Dhakwaranya vevo dhinadha mwa mabasa a Nambure.#5.37 Nambure Naari wi: Sathana, musogoleli mulubale a mineba dhootakala.

Yesu onosuuziha olevelelana

(Luka 6.29-30)

38<<Nyo mwihiiwa dhiwogiwe, wiira: <Oliva niinto nniinto, niino nniino>.#5.38 Okuma 21.24; Levitiku 24.20; Deteronomiyo 19.21. 39Mbwenye miyo ginowuwaaddelani wi muhulibanena enowiirelani dhabure. Muthu ooddwadha mbarutuni omvahe ooddwadhe epaddi emohi. 40Muthu oosumela wa anamathonga wi owaake maleya, omvahe teto ni kazaakweene. 41Muthu oowaddihedha weedda ni sapo kilomeeturu emohi, weeddeve teto makilomeeturu meenddi. 42Muthu onooloba yego, omvahe. Muthu onafuna wuubolihedha yego omvahe, ohumwiing'anihe ekothikothi.

Waadhivela amwiiddani

(Luka 6.27-28, 32-36)

43<<Nyo mwihiiwa dhiwogiwe, wiira: <Omudhivelege mukwaawo>,#5.43 Levitiku 19.18. <omwiidde mwiiddani aawo>. 44Mbwenye miyo ginowuwaaddelani wi mwaadhivelege amwiiddani eenyu, mwaalobelelege ale enooharaharani. 45Mweera ndo, munakala ahima a Babiinyu a odhulu. Mwaha oliye onowaafaalihedha nduwa athu abure ni apama teto onowaarubwihedha muzongwe ooharihamo efunelo ya Mulugu ni ale enakoodda oharihamo. 46Mwaha wowi mwaadhivelaga ale enoodhivelani baahi, munaavahiwe yootthettheeliwa baani ni Mulugu? Anamakoha-musoko#5.46 Anamakoha-musoko Ala aEzarayeli aatene yawoona wona <<anamathega.>> Yooniwa wi babure vameentoni va athu mwaha wi yamulabela guveruno a oRoma. Aali mwiiddani a aEzarayeli. enowiirana dhimodha-modhave. 47Teto, mwaalojelaga amudhi eenyuve baahi, mwiirilevo ddi yookwaranya amohi? Dhedho kahuwo dhineerana ale ehinamuroromela Mulugu? 48Mowindo, nyo kalani owaakwanela wona Babiinyu a odhulu oli owaakwanela>>.#5.48 Levitiku 19.2; Deteronomiyo 18.13.

Currently Selected:

Matewuzhi 5: tke

Highlight

Compare

Copy