Wambeela 49
49
Yakobo onowareeliha anaaye
1Yakobo ahawiithanaga anaaye, wiira: <<Mugaaddamele wi guwaaddeleni eyene enafuna wuwiireyelani musogolo.>>
2<<Mugirije, mwiiwe, nyoovo amwaana Yakobo,
mumvuruwane pama babiinyu Ezarayeli.
3Rubeni, we oli mwaanaga owambeela,
we oli kopolo dhaaga,
yoovaha yowambeela ya ezombwe yaaga,
wambeela wa nthithimiho ni mwa kopolo.
4Mbwenye kudha okala owambeela mwa addibilo,
vowi oli ookapudha wona nipweru.
Ohugona ni mwadha ababo,
ohutala olili waaga.
5Simiyoni ni Leevi vooniliiwa,
waandana weewa yoosasanya dha owali ni mwaalago dheewa.
6Murima waaga kuli ni moobuwelelo eewa,
ginokoodda mutugumano dheewa
vowi mwa otakaleliwa weewa ehaapa athu,
teto mwa ovudhuwa weewa yahiragaliha ng'ombe.
7Wuulumeleleye owali weewa wootakala,
ni owali weewa woopahuwa mirima.
Ginoodha gaabalalesele mwiilaboni ya Yakobo,
ekalena elabo yeewa mu Ezarayeli.#49.5-7 Ndala woopiha Simiyoni ni Leevi wawoonihiliiwa athu a oXikemu onokooddiwa ni baabi eewa. Moone Wambeela 34.25.
8Zhuda, weevo onoodha othithimihiwe ni addibilo,
enoodha ekokorege vameentoni vaawo.
Onoodha waahidde amwiiddani aawo mukohi.
9Weevo oli poddogoma mung'onong'ono, mwaanaga Zhuda,
onawela omasayelo agamwihiddile mwaneenyama,
onokokora vati eedhogolaga wona poddogoma mulubale.
Onaamulige oliye baani?
10Zhuda kadha aakiwa omwene waaye
naari mukogodho waaye onalamuligiiyena,
ofiyedha odha omwene oyene oli waaye-waaye,
oyene malogo eneriisu emwiiwelelege.#49.10 Ofiyedha odha…emwiiwelelege Naari wi: ofiyedha adheeliwana musoko, malogo emwiiwelelaga, naari wi: ofiyedha adheeliwena yaaye, malogo emwiiwelelaga. Mamwene Davidi ni Salomawu ni anamabaliwelamo eewa yadheele mu nihimo na Zhuda. Yesu teto aali a nihimo na Zhuda.
11Oliye onommagelela mwaana a buuru
vamuthankoni,
onommagelela vamuthankoni
wa mvidera wapama.
Mwa oreela waaye
oneere ofula dhoowara dhaaye ni vinyu,
vinyu oneere akale wona mahinje.
12Meento aaye boozherimela okwaranya vinyu,
meeno aaye boweela okwaranya mukaka.
13Zebuloni onoodha amage seresere ya nyaza,
akalena mburo mwanddeya vineerigiiwa dhiimelegevo.
Munddile waaye onoodha ofiye oSidoni.
14Esakari oli wona buuru akopolo
ogonile kukuru ya sapo dhaaye.
15Vooniliiye wi ovuma fuujavo,
elabo yaaye sapama,
onoodha akale muliba othukula sapo,
arumeedhe odhaari.
16Dani#49.16 Dani mu ewogelo ya eHeberi nneeweya wona: Othonga. oneerege waathonga athu aaye,
wona eneereliiwa mahimo mamohi a aEzarayeli.
17Dani oneere akale wona nyowa yoowiipita murampani,
wona evili seresere ya dila,
eyene enaluma ddoddobwa ya kavalo,
emutongwihedha vati muliba omweeddihaya.
18Mbwenye miyo ginajejihedha ovulumusa weenyu, Nabwiya!
19Gadi#49.19 Gadi mu ewogelo ya eHeberi nneeweya wona: Okudduwela, vano teto aliba wiiya. onoodha akudduweliwege ni aliba wiiya,
mbwenye oliye onoodha aakudduwelege aliwa.
20Elabo ya Azeri enovaha yooja yapama,
yowaajiha mamwene.
21Nafitali oli wona naase otapuliwe,
oyene onaabala anaaye ooriyesesa.
22Zhuuze oli wona muthanko woovaha,
seresere ya ceela,
mijindda dhiwa dhinarabela siri.#49.22 Wona muthanko woovaha…siri Naari wi: Wona mpidda seresere ya ceela, wona mwaana a buuru vamwaangoni. Ela enatapulela wi Zhuuze eere okalana anamabaliwelamo ajinji. Muwari mwa aliwa yaali Zhozuwe, musogoleli a nihimo na Ezarayeli vasogolo viwa Mozezi, anamathonga Dibora, Gidiyawu, ni namavuhulela Samuweli.
23Amwiiddani aaye enoomukudduwela mwa owali,
emwiigaraga ni matthere eewa.
24Mbwenye Mulugu oowodha a Yakobo onoodha amukamihedhe.
Oyene oli Makambuzi a mabila, Mwaango wa Ezarayeli
onowongoolela orwa waaye,
aaguvihaga moono dhaaye.#49.24 Mbwenye Mulugu…moono dhaaye Naari wi: Mbwenye mwaalago dheewa dhinogoromba, moono dheewa ni madada eewa enogurumela, mwaha wa Mulugu oowodha a Yakobo, mwaha wa Makambuzi a mabila ni Mwaango wa Ezarayeli.
25Mulugu a ababa ookamihedhe,
Mulugu oowodha-wodha ooreelihe,
ooreelihe ni muzongwe a odhulu,
ooreelihe ni aneedduuddu a vati,
ooreelihe ni ahima ajinji ni dhifuwo dhijinji.
26Mareeliho ginoovahiimi eli ookwaranya
mareeliho gawaakeliliimi wa ababa.
Ofiyedha omakuthulo wa mwaango dhoohumala,
mareeliho maatene alena ekale wa Zhuuze,
emuthithimihege olena osakuliwe mwa addibile.#49.2-26 Mareeliho ala enawogiwa ba ahima ni mahimo yaabaliwege mwa aliwa.
27Benzhami oli wona miiji wooguwa,
bebeheene onatakuna yoosaya yaaye,
ociguwoni wiwa ogawaga yoohalaya>>.
28Ala mahimo kumi na meenddi aEzarayeli. Babiiwa ahiwogaga madhu alena aavahaga mmohi ni mmohi wa anaaye mareeliho omfwaneelela.
Okwa wa Yakobo
29Vevale Yakobo ahaalamulaga anaaye, wiira: <<Miyo ginookwa, gakale vamohi ni athu aaga. Mwagilogohe niburo nilogohiwe makolo aaga, nikungu nili mmiddani mwa Eforoni, muHeti, 30nenddo nili oMakepela, vakukuuve va Mamere, elabo ya oKanani. Abarahamu dagulile mudda oyo ni Eforoni muHeti wi okale weehu, nilogohanegewo. 31Wewo fwalogohiwe Abarahamu ni mwihiyanaaye Saara, Ezaaki ni mwihiyanaaye Rabeka, vano fuwewo gimulogohiliimiwo Liya. 32Mudda olene vamohi ni nikungu nendde naguliwe ni aHeti>>.
33Ahaalamulelaga anaaye agakonaantile voolilini, Yakobo ahigonaga, okwa, odhowa okala ni athu aaye.
Currently Selected:
Wambeela 49: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
