Wambeela 50
50
1Vevale Zhuuze ahaathamagelaga ababe waakubaarela, anddaga, waabezhari. 2Ndala ahaarumaga anamugu yalaba wi edholihe murombwe muruthu wa ababe wi onaavudde. Anamugu yahiiragana ndo. 3Wona mookovelela wa aEgubuddu, yahimuthikithelaga murombwe malabo owaakwana makumi mannayi. Athu a wEgubuddu yahimunddela Yakobo malabo makumi matanu nameenddi (70).
4Egamalile malabo owuundda Zhuuze ahiwogaga ni anamalaga a Farawo, wiira: <<Ginowuulobani, yakala yoorumeedheya, mwamwaaddele Farawo wi: 5Ababa ehinakwe, yahigilibeleliha wi gaalogohe onsiyeni nenddo aliwa natibiliisu oKanani. Mmulobe mwene wi agihiye gidhowe, gaalogohe ababa, geera ndo ginowelawo>>.
6Farawo ahaakulaga, wiira: <<Dhowa waalogohe ababo, wona yoolibelelihiisu>>.
7Vevale Zhuuze ahidhowaga waalogoha ababe. Yahimveleelaga anamalaga aatene a mwene, apogo a vaade va Farawo ni apogo aatene a wEgubuddu. 8Yahidhowaga athu aatene a vaade va Zhuuze, addibile ni ahima amohi a Yakobo. Yahalilege oGoxeni yaaligi ahima, mabila ni ng'ombe baahi. 9Yahimveleelaga anyakoddo ni magareeta ni akavalo eewa. Ebaribareene waaligi mulogo mulubale. 10Vafiyiligiiwa okobela wa Zhordawu, nibuwa na Atadi, yahiiragana malobelo malubale owiikubanyedha. Vevale yahimuunddelaga Yakobo malabo matanu nameenddi.
11AKanani yamagile elabo elene vooniligiiwa makalelo ale owuundda a niburo nowi Atadi, yahiiraga: <<Manddelo a aEgubuddu boonyemela!>> Va mwaha ola mwaana-nluwa ndde nneethaniwa Abeli-Mizarayimi, nili kobela ya Zhordawu.#50.11 Abeli-Mizarayimi mu ewogelo ya eHeberi ndina ndda nnatapulela wuundda wa aEgubuddu.
12Ndala ahima a Yakobo yahiiragana wona mwaalamuleliiye: 13Yahimudhowagana elabo ya oKanani, omulogoha onikunguni nendde na mudda wa oMakepela, dhipaddi dha oMamere. Naali niburo Abarahamu naguliliiye ni Eforoni muHeti wi ekale masiye eewa. 14Agamalile omulogoha babe, Zhuuze ahiwelelaga wEgubuddu ni addibile, ni aatene alene yamveleelege adhowaga ologoha muruthu.
Zhuuze onowaalibiha mirima addibile
15Agakwile babiiwa, addibile Zhuuze yahambeelaga owoga mmohi ni mukwaaye, yiiraga: <<Mwaaga wi Zhuuze kinamvoreya elene yamwiireliihu? Onowundda kunyawunya ni hiyo>>. 16Vowindala yahirumihaga muselu wa Zhuuze, wiira: <<Ababa ehinakwe yahiniruma 17nuwaaddeleni, wiira: <Ginowuulobani wi mwaalevelele addibilinyu yootakala yeeriligiisuna yahuuthegelani>. Ninowuulobani wi mukurumuwele yoothega yeehu. Nili anamalaba a Mulugu a babiinyu>>. Vaakeligiiye muselu olena Zhuuze ahunddaga. 18Vevale yahidhowaga addibile ale, okokora, wiira: <<Hiyo nili va, nili adhaari eenyu>>.
19Zhuuze ahaakulaga, wiira: <<Kamoove naariwene. Miyo gili vamburoni va Mulugu?#50.18-19 Addibile yoobuwela wi Zhuuze eere wuundda kunyawunya wa aliwa mudhidhi olene. Zhuuze eewelelemo wi goyi ya yoothega eli wa Mulugu. Hiyo kannarumeedhihiwa wawiirela yootakala ale enaniirela yootakala. Poroveribiyo 20.22 enanisuuziha wi goyi enadha wa Mulugu. Kahuwo wi hiyo nawiirele. Matewuzhi 6.12 onanisuuziha wi soofuneya wi naalevelelege athu enaniirela yootakala. Moone teto Matewuzhi 5.39, 44; ATesalonika Owambeela 5.15. 20Nyo mwafuna ogiirela yootakala, mbwenye Mulugu afunile wiira yapama wi aavulumuse athu ajinjeene wona vinooneliihu peeno. 21Ndala kamoove. Miyo gineerege wuukameelani ni aniinyu>>. Mowindala Zhuuze onowaalibiha mirima addibile, awogaga ni waabebeedha.
Okwa wa Zhuuze
22Zhuuze amagile wEgubuddu wewule ni addibile. Anna yaaka zana ni yaaka kumi (110). 23Ahoona odhuulu wa ahima a Efarayimu, ahawaakela teto mwa nlogo naaye ahima a Makiri, mwaanaye Manasesi. 24Nlabo nimohi Zhuuze ahiwogaga ni addibile, wiira: <<Miyo ginookwa. Mbwenye Mulugu oneere wuukamihedhani ebaribareene, oovenyihemoni mwiilaboni mu wi mudhowe elabo eyene yalibeleliiye waavaha makolo eehu, Abarahamu, Ezaaki ni Yakobo>>. 25Ndala Zhuuze ahaalibelihaga aEzarayeli, wiira: <<Ebaribareene Mulugu ookamihedhani, mwaadhowaga, muthukule makuva aaga>>.#50.24-25 Dhigavirile yaaka mazana mannayi Mulugu ahaavenyihawo aEzarayeli wEgubuddu. Amulabihile Mozezi wi asogolele okuma weewa. Thalako ya yootikiniha ela eli muniivuru nooharela nneethaniwa Okuma.
26Zhuuze akwile aganna yaaka zana ni yaaka kumi (110). Mwiili waaye yahidholihaga murombwe, oheliwa mbawuloni.
Currently Selected:
Wambeela 50: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
