Wambeela 37
37
Dhooroha dha Zhuuze
1Yakobo ahimaga elabo ya oKanani, wewo ababe yamagiliiwawo wona namadha malabo aaye. 2Ola mwaha wa nlogo na Yakobo: Zhuuze aganna yaaka kumi ni tanu nabiili oojiha mabila a ababe vamohi ni addibile, ahima a Bila ni Zilipa, alene yaali ahiyana a ababe. Muzombwe ola ahidhowaga wawaaddela ababe dhootakala addibile dheeriliiwa.
3Ezarayeli ahimudhivelesa Zhuuze waakwaranya anaaye amohi, vowi ambalile agooluvale. Ahimusonela oliye mukanjo wooriya.#37.3 Mukanjo wooriya ola wooniha wi Zhuuze osogolo eere okala musogoleli a emudhi yaaye. Mwahaya buuyene watatamule wiiddana. 4Addibile vooniligiiwa wi babiiwa onomudhivela Zhuuze waakwaranya ahima amohi, yahimwiidda, naari kayamulojela.
5Nlabo nimohi Zhuuze ahirohaga, odha wawaaddela addibile dhego dharohiligiiye. Wambeela vevale yaheenjedhedha omwiiddani weewa okwaranya omambeelelo. 6Zhuuze ahiiraga: <<Vuruwanani yego girohiliimi. 7Hiyo naamaganyile mapiddi eehu omidda, vevale nipiddi naaga nahiimela, mapiddi eenyu yahaapeelela naaga oworomela nipiddi naaga>>.#37.7 Yooroha ela yaakwaneliheye Zhuuze vadhowiliiye wEgubuddu. Moone Wambeela 42.6; 43.26; 44.14.
8Yahimukohaga addibile, wiira: <<Weevo, sowi oneere okale mwene eehu, onilamulege?>> Omwiidda weewa waheenjedhedheya mwaha wa yooroha yaaye ni madhu aaye.
9Zhuuze ahirohaga, wawaaddela addibile, wiira: <<Peeno gihiroha. Nduwa, mweeri, ttendderi kumi ni emohi, dhaatedhene dhenda dhahigirija, dhigikokorelaga miyo>>.#37.6-9 Nnoobuwelela wi kayafwaneelele Zhuuze ovuhulela dhooroha wa addibile. Dhatatamule wiiddana, baahi. 10Vawaaddeligiiye yooroha elena ababe vamohi ni addibile, Yakobo ahimunyanyuwelaga, wiira: <<Eyene enarohesiiwe ddi? Onoobuwela wi miyo ni amaayo ni addibilo nnoodha nuukokorelege weevo?>> 11Mowindala addibile yahimukalelave omwiidda, ababe yowuubuwela yooroha ele.#37.11 Oroha wewo addibile wanyemuliiwa wahaakwanelihiwa vowambeela muniivuru Wambeela 42.6 ni dila dhimohi dhooharela.
Ogulihiwa wa Zhuuze ni addibile
12Nlabo nimohi addibile Zhuuze yahidhowaga ojiha mabila ni mbuzi dha babiiwa epaddi ya oXikemu. 13Ezarayeli ahimwiirelaga Zhuuze: <<Addibilo enaajiha aneenyama oXikemu. Ginowuuruma wa aliwa>>. Zhuuze ahaakulaga, wiira: <<Ee, ginoyawo>>. 14Ezarayeli ahiiraga: <<Dhowa, wawoone addibilo akala bapameene ni mabilaya, odhe ogaaddele>>. Ezarayeli aaligi nddiba na Heboroni amurumaga Zhuuze. Oliye ahimaruwaga wewule, ahifiyaga epaddi ya oXikemu. 15Zhuuze oozeezeyaga mmiddani. Vevale muthu ahimfwanyaga, omukoha, wiira: <<Onasayela ddi?>> 16Oliye ahimwaakulaga, wiira: <<Ginaasayela addibilaga. Ginowuulobani, mugaaddele onajihiisu mabila ni mbuzi>>. 17Mulobwana ole ahiiraga: <<Ehivenyawo wuno. Gawiiwile wi enaya oDotani>>. Vevale Zhuuze owaasayelaga ayaaga oDotani, ahaafwanyaga wewo addibile.#37.17 Dotani aali makilomeeturu kumi ni matanu ni maraaru (18) omakumelo wa pevo ya kasekase oXikemu. 18Addibile yamoonilege adhaaga woolapelawene, ahinafiye yahipanganelaga ompa. 19Yahiiraga mmohi ni mukwaaye: <<Onoodha namaroha ole. 20Ohukweya! Nimpe, nimuthathilele vaceelani yowumma okokolani wuno, nawoge wi mwaneenyama dimutakunile. Noone oroha waaye oneeriiwa ogomele!>>#37.19-20 Wiiddana onotatamula oludduwa vajinji. Soofuneya wi niwane muwari mwa hiyo, moolibana mukalelo wowinda noonaga amohiwa dhaweeddelaga pama. Mulugu onafuna wi nidhivelanege kadda muthu ni mukwaaye naari ale ehineerihedha dhapama.
21Rubeni veewiliiye, ahifunaga omvulumusa, wiira: <<Kanimpe>>. 22Aheenjedhedhaga owoga, wiira: <<Kamuthathile mwazi! Niire omvokedha vaceelani okokolani wuno baahi, muhumporose ni madada eenyu>>. Oliye afunaga omwaakihedha wa addibile wi amuwelelihe wa babe.
23Agafiyile Zhuuze yahimukurulaga mukanjo waaye ole wooriya, wawariligiiye, 24omwihidda, omvokedha vaceelani voohukala mahinje.
25Yahikaraatigi ojaga. Vevale yahoonaga nikuru na aZhumayili nidhaaga woolapelawene epaddi ya oGileyadi. Akamelo eewa yathukulilege dhoonukwela makura ni manddela mithanko, eyaaga oguliha wEgubuddu. 26Zhuda ahiiraga wa addibile: <<Nneere nipure ddi nampa ddibilihu, nilogoha mwazi waaye? 27Ndoweni naagulihedhe aZhumayili ale. Nihimwiirele yootakala ela, vowi di ddibilihu a mwazi mmohive>>. Addibile yahimurumeedhaga.#37.27 Muthu mmohi ooniha moobuwelelo aaye nambeelege wiikoha mmurimani: <<Akala moobuwelelo ala eli oorumeedheya vameentoni va Mulugu?>>
28Vevale aZhumayili ale, aliba malondda a oMidiyani, eviraga, addibile yahimvenyihagamo Zhuuze muceelani. Yahimugulihaga#37.28 AZhumayili…Yahimuguliha Naari wi: Aliba malondda a oMidiyani eviraga vevale, yahimvenyihamo Zhuuze muceelani, yahaagulihedha aZhumayili. ni korowa dha parata makumi meenddi. AZhumayili yahimudhowagana Zhuuze wEgubuddu.
29Rubeni agawelele oceelani wewule ahoonaga wi Zhuuze kaalimo. Vevale ahitalaga maleya aaye, mwaha wa thagaraga. 30Ahiwelelaga wa addibile, wiira: <<Muzombwe kanooneya! Ki ginaadhowe wuuvi?>>
31Vevale addibile yahithukulaga mukanjo wa Zhuuze, opa mbuzi othikithela mwazi mukanjo ole. 32Yahidhowagana wa babiiwa, wiira: <<Nifwanyile mukanjo ola. Moone, kahuwo olene wa mwaaninyu?>> 33Yakobo ahoonaga, wiira: <<Ebaribareene mukanjo wa mwaanaga. Mwaneenyama owoopiha dimutakunile. Zhuuze ohunyenyiwa!>>
34Yakobo ahitalanyaga dhoowara dhaaye, owara nsakwi. Ahimala malabo majinji amunddelaga mwaanaye. 35Ahima aaye anaalobwana ni anaahiyana yoomuhagalaliha, embebeedhaga Yakobo, mbwenye karumeedhile omaalihiwa, eeraga: <<Ginaamunddelege ndala ofiyedha okwa, gagumane ni mwaanaga>>. Vano ahididela omuunddela mwaanaye.#37.31-35 Yakobo ndala ahambeela orabula ni ovoreya wadheela moonyengethiwa, wona babe varabuleliiye ni mwaha wa onyengetha wa Yakobo oyene. Onyengetha onogawa emudhi. Bu mwahaya Mulugu enakooddiheliiye. Matewuzhi 7.2 wiire: <<Ni mpimo oyene munapimiinyuna teto oliye oneere wuupimanaani oyene>>.
36AMidiyani vamuthukuligiisu Zhuuze, yahimugulihedhaga Potifare, namalaba oororomeleya mulubale a aliba waang'anela a Farawo, mwene a wEgubuddu.
Currently Selected:
Wambeela 37: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
