Wambeela 38

Zhuda ni Tamari

1Mwa mudhidhi olene Zhuda ahivenyawo wa addibile, odhowa okalaga vaade va mulobwana a wAdulamu, ndina naaye Hira. 2Agali wewule, Zhuda ahimoonaga mwaana a Xuwa, muKanani, omutela olene, ahikalana vamohi. 3Ahirubalela, ombala mwaana-mulobwana, ndina naaye Eri. 4Ahirubalela teto, ombala mwaana mmohi, ndina naaye Onani. 5Osogolo wiwa ahimbala mwaana mmohi, ndina naaye Xela, oyene ambaliliiye agali oKezibe.

6Zhuda ahimuteliha mwaanaye owambeela Eri ni mwihiyana eeriwa Tamari. 7Mbwenye Eri ola keedda mwapama vameentoni va Nabwiya; ndala Nabwiya ahimpa. 8Veva Zhuda ahiiraga wa Onani: <<Omutele maamukwele ola, ombalele ahima ddibilo, enofwaneela vowi di mulamwaawo>>.#38.8 Enofwaneela vowi di mulamwaawo. Moone Deteronomiyo 25.5-10.

9Mbwenye Onani ahinonaga wi veeriiye ambale mwaana, kaakale aaye. Vevale aagonaga ni mulamu aaye, athathilela vati elobwanaya, kaafuna ombalela mwaana ddibile. 10Meerelo ala yaali ootakala vameentoni va Nabwiya; ndala Nabwiya ahimpa.#38.9-10 Onani kaafunile ombalela mwaana Tamari, vowi aheere oliye ahikalana mwaana Onani daakalena dhoohaladha. Akwele mwaha wa nrima nenddo. 11Vevale Zhuda ahiiraga wa Tamari, mwadha a mwaanaye: <<Owelele vaade va ababo, wakale maamukwele ndo ofiyedha mwaanaga Xela onnuwe>>. Zhuda amoovihaga mwaanaye okwa wona dheerile addibile ale amohiwa. Ndala Tamari ahiwelelaga wa ababiinya, okala wewo.#38.11 Zhuda kaafunile omvaha Xela Tamari mwaha wi Zhuda oova wi teto Xela onaadhe akwe.

12Egavirile malabo majinji, ahikwa mwadha a Zhuda, mwaana a Xuwa. Agamalile wuundda waaye, Zhuda ahidhowaga oTiimina vamohi ni mukwaaye Hira a wAdulamu wi oone mabasa owawiiga mabila aaye. 13Ahaaddeliwaga Tamari, wiira: <<Nabwiyo onaya oTiimina awiige mabila aaye>>. 14Vevale Tamari ahikurulaga dhoowara dha omaamukwele wiikuneela wiintoni ni guwo, okaraati dila enaya oTiimina, mundila waaddamela wEnayimu, vowi ahoonaga wi Xela ohunnuwa, ahimutelile Tamari. 15Zhuda vamooniligiiye, oobuwelelaga wi namararuwa vowi ahiikuneelaga wiintoni. 16Ahimuhabuwelaga, wiira: <<Ogihiye wi gigone ni we>>. Sowi kaanonaga wi mwadha a mwaanaye. Oliye ahimwaakulaga, wiira: <<Onaginka ddi wi ogone ni miyo?>> 17Zhuda ahimwaakulaga, wiira: <<Ginowuuvaha mbuzi emohi ya dhoofuwa dhaaga>>. Oliye ahimwaakula, wiira: <<Mbwenye ogihiyedhe yoohiddeelela ofiyedha mudhidhi oneeriiwe ogirumihedhe>>. 18Zhuda ahimukohaga, wiira: <<Yoohiddeela ddi enafuniiwe?>> Oliye ahimwaakulaga, wiira: <<Pethe yaawo ni mungoyiya vamohi mukumbuzo waawo, oyene oli mmadani mwaawo>>. Zhuda ahimwihiyedhaga dhego dhedhi, ogonana, vevale Tamari ahirubalelaga.

19Ahidhowaga, ovenyihawo wiintoni guwo elene, owara teto guwo dha omaamukwele.

20Zhuda ahimvahaga mbuzi mukwaaye muAdulamu wi mwihiyana ole amuwelihedhe yoohiddeelela, kamfwanyilege. 21Vevale ahaakohaga athu a epaddi elene, wiira: <<Ogele wuuvi namararuwa ole a wEnayimu, akala vadila va?>> Aliwa yahimwaakulaga, wiira: <<Va kavinakalege namararuwa>>. 22Ahiwelelaga wa Zhuda, wiira: <<Kagimfwanyilevo, athu awewule yiirile, epaddi elene kunakalege namararuwa>>. 23Zhuda ahimwaakulaga, wiira: <<Omwihiyedhe dhego ndo wi onanikalihegena manyazo. Ebaribari gihirumihawo mbuzi, mbwenye we kumfwanyilewo>>.

24Egamalile mweeri miraaru, Zhuda ahaaddeliwaga wi: <<Tamari, mwadha a mwaanawo, ohurubalela, mmararuwo>>. Vevale Zhuda ahiiraga: <<Mmudhowena okwibi, apahiwe veeko!>>

25Emudhowagana okwibi, Tamari ahirumihaga muselu wa ababe, wiira: <<Ogirubalelihe di mwiinya a dhego dhedhi. Ginowuulobani wi asayeliwe mwiinya a pethe ela, ni mungoyi ola vamohi ni mukumbuzo ola>>.#38.15-25 Mmalebani Otaleleya maatene oraruwa onohiihiwa. Zhuda ahinona wi yaali yoothega. Ononeyihile nde valamuliiye wi Tamari apiwe mwaha wa oraruwa. Dila dhijinji nnowaathonga athu mooliba mwaha wa dhoothega wona dhedho teto dhineeriihuna. 26Zhuda ahinonaga wi saaye, ahiiraga: <<Miyo gihikanna muladdu okwaranya oliye, vowi ahifwaneelela omvaha mwaanaga Xela wi amutele, mbwenye kagiirilena>>. Ovenya vevale Zhuda kaagonilena.

27Ogafiyile mudhidhi wa obala, Tamari ahaabala anapata. 28Abalaga, mwaana mmohi ahikumihaga ndada, namabaliha ahimagelela osalu woofiila, ahiiraga: <<Ola dowambeela obaliwa>>. 29Mbwenye oliye ahiwelihaga ndada, mukwaaye, dambeelilege obaliwa. Namabaliha, ahiiraga: <<We ohufugula dila!>> Ahimuthwaga ndina nowi Perezi.#38.29 Perezi mu ewogelo ya eHeberi nnatapulela ofugula dila. Perezi ahifiyedha okala musogoleli mulubale a nihimo na Zhuda. Anamabaliwelamo aaye onoheliwamo Davidi ni Yesu Kirixtu. 30Voogomihedha agakumile ddibile ole awarihiwe osalu woofiila, yahimuthwaga ndina nowi Zera.#38.30 Zera mu ewogelo ya eHeberi nnatapulela oofiila, naari wi: waara. Thalako ya Zhuda ni oraruwa waaye, ni ya emudhi yaaye, eli va wi yoonihe nifwanafwaniho na thalako ya mukalelo wa pama wa Zhuuze, oli kapitulu yooharela.

Currently Selected:

Wambeela 38: tke

Highlight

Copy

Compare