Okuma 33
33
Mulugu onowaalamula a aEzarayeli wi edhowege
1 Nabwiya ahiwogaga ni Mozezi, wiira: <<Dhowa, wasogolelege mulogo oyene othukuliliiwe mwiilaboni ya wEgubuddu, odhowegena elabo eyene gamulibeleliimi Abarahamu, Ezaaki ni Yakobo. Giwoga ni aliwa, giira: <Ginoodha gaavahedhe elabo elena anamabaliwelamo aawo>. 2Ginoodha guurumihedhe mungero aaga osogolo waawo, vano ginoodha gawiigarewo aKanani, aAmori, aHeti, aPerezi, aHevi ni aZhebusi. 3Omaruwe odhowege elabo eyene yowiinjivesa mukaka ni enwi wona mihinje. Mbwenye miyo kaginakala vaari veenyu, vowi nyoovo muli addiyamaru. Gahaadhowe ni nyoovo gowuutolosani mundila>>.
4Mulogo veewiligiiwa madhu alena oowaawa, yahambeelaga okubanya, vevale kaalivo mmohi awarilege dhooriya.#33.4 Dhooriya enatapulela dhowiiriyihana: birinku, purusera, pethe, mugufu ni dhimohi. 5Sowi Nabwiya ahimwaaddelaga Mozezi, eeraga: <<Wawaaddele aEzarayeli wiire: <Muli addiyamaru. Gaheere guuharani vang'ono, gowuutolosani. Ndala, mukuguule dhooriya dheenyu, ovenya vevo ginonona yowuwiirelani> >>. 6Vevale mulogo wahikuguulaga dhooriya dheewa oMwaangoni Horebi.#33.6 Horebi thi ndina nimohi na Mwaango Sinayi.
Nabwiya onowoga ni Mozezi kove ni kove
7Mozezi ahiimesaga musasa okwibi wa sanjala, woolapelana ni mulogo. Othwa ndina na musasa woogumanamo. Kadda muthu afunaga omukoha Nabwiya, oodhowaga musasa olene waali okwibi wa sanjala nde. 8Mozezi avenya aadhowaga ovolowa musasa olene, mulogo waatene wowiimela mmilagoni mwiwa, omusugwaga ofiyedha ovolowa waaye. 9Agali mba, murabo woolapa wookita, wiimela vamulagova, mwemule Nabwiya owogaga ni Mozezi. 10Mulogo waatene woonaga murabo ogeemelile vamulago va musasa, woovenya waatene mmilagoni mwa misasa dheewa omutamaalaga Mulugu. 11Mwemule Nabwiya ahiwogaga ni Mozezi kove ni kove wona muthu onawogeliiye ni mukwaaye. Vevale Mozezi oowelela osanjala, mbwenye muzombwe Zhozuwe, mwaana a Nuni, namalaba a Mozezi, kaavenyavo vamusasani vale.
Nabwiya onowooniha nthithimiho naaye
12Mozezi ahiwogaga ni Nabwiya, wiira: <<Munogiirelesa: <Muthukule mulogo ola mudhowegena>. Mbwenye kamugaaddele baani muneeriinyu mmurume wi athaananege ni miyo. Munowiira: <Gihinona pama ndina naawo, ohukanna mahala ni miyo>. 13Vano, gakalana mahala ni nyoovo, mugisuuzihe dila yeenyu wi guunoneni wi gikalegenaave mahala ni nyoovo. Muubuwelele wi mulogo ola mulogo weenyu>>.
14 Nabwiya ahaakulaga, wiira: <<Okalavo waaga onoodha wuuveleeleni, ginoodha guuvaheni withaala>>. 15Vevale Mozezi ahaakulaga, wiira: <<Okalavo weenyu waahiniveleelave, kamunivenyihe veva. 16Enaanoniwe addi wi miyo vamohi ni mulogo weenyu nihikanna mahala ni nyoovo? Oniveleelave onoonihedha wi miyo ni mulogo waaye oli woohiyana ni malogo mamohi a elabo ya vati>>.
17 Nabwiya ahiwogaga ni Mozezi, wiira: <<Ginoodha giirena eyene elobiliiwe, vowi ohukanna mahala ni miyo, mowindala gihinona pama ndina naawo>>.
18Mozezi ahiiraga: <<Ginowuulobani wi mugoonihe nthithimiho neenyu>>. 19Nabwiya ahimwaakulaga, wiira: <<Ginoodha giirena opama waaga waatene givire vameentoni vaawo, ginoodha givuwihe ndina na Nabwiya#33.19 Givuwihe ndina na Nabwiya nnatapulela wooniha makalelo a Nabwiya. vameentoni vaawo. Ginoodha gimwiirele ya mahala oyene ginamfuniimi omwiirela mahala, gimweeddiwele thagaraga oyene ginamfuniimi omweeddiwela thagaraga>>. 20Nabwiya ahiwelelaga owoga eeraga: <<Ohoone kove yaaga vowi muthu oyene onoona kove yaaga kanakalawo>>. 21Nabwiya ahiwogaga, eeraga: <<Nihikalavo niburo vakukuuve vaaga; weevo okale vanibweni va. 22Naviraga nthithimiho naaga, ginoodha guuvolosihe okunguni wa nibwe nenddi, ndada naaga nuukuneele ofiyedha givire. 23Gaviraga, fineeriimi givenyihevo ndada naaga, weevo onadha woone dduli yaaga baahi, kove yaaga kudha woona>>.
Currently Selected:
Okuma 33: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
