Okuma 32
32
Nakoro mung'onong'ono a ng'ombe oosasanyiwa ni oro
(Deteronomiyo 9.6-29)
1Athu vooniligiiwa wi Mozezi onoribeliwawo omwaangoni, yahimurijaga Aroni, yiiraga: <<Venya, onisasanyedhe amilugu oonisogolela, vowi mulobwana ole Mozezi, onivenyihile wEgubuddu, kaninonile yego emwiireyele>>.
2Aroni ahiiraga wa aliwa: <<Mukuguule birinku dha oro dhinawariwa mmabaruni ahiyana eenyu ni aniinyu anaahiyana ni anaalobwana, mugidheelena>>. 3Ndala athu aatene yahikuguulaga birinku dha oro mmabaruni, oveleela wa Aroni. 4Vaakeliligiiye mmadani mwaaye, ahimusasanya nakoro mung'onong'ono a ng'ombe a oro woonyungulusa oohaniwa ni mugogo. Vevale yahiiraga: <<Ee, aEzarayeli, baalena amilugu ayene yoovenyihileni elabo ya wEgubuddu>>.
5Aroni vooniligiiye, ahisasanyaga niburo na mukutho vakukuuve va ng'ombe elene vano ahilaleyelaga, wiira: <<Menselo onookala mathanga a Nabwiya!>> 6Omenseloni wiwa yahibehedhaga okutha mukutho, odhana dhooveleela dhoopahiwa ni dha murenddele. Athu yahikaraatigi, oja, ong'wa, vano yahithabaga.
Nabwiya onowoga ni Mozezi
7Nuwindo Nabwiya ahiwogaga ni Mozezi, wiira: <<Odhowe, okitele muddibani, vowi mulogo waawo oyene wakumihiliimi wEgubuddu, ohubwanyuwa. 8Mowaaguva ehihiya dila eyene gaathongeliimi; ehiisasanyedha nakoro mung'onong'ono a ng'ombe a oro woonyungulusa, othithimihaga eyene ni okuthela mukutho, yiiraga: <Ee, aEzarayeli, ba alena amilugu ayene yanivenyihile elabo ya wEgubuddu> >>. 9Ahiwogaga Nabwiya ni Mozezi, wiira: <<Gihawoona athu alena wi addiyamaru. 10Dhiinova ogihiye wi oludduwa waaga waanyanyuwele, gaatolose. Vano ginoodha gisasanye mulogo mulubale mwa weevo>>.
11Vevale Mozezi ahilobaga wa Nabwiya, Mulugu aaye ni ohidda meddo, eeraga: <<Mwaha bwaddi Nabwiya, oludduwa weenyu onyahuweliwa wa mulogo weenyu oyene mwavenyihiliinyu elabo ya wEgubuddu ni moono weenyu wakopolo wowaakwana? 12Kamwaavaha aEgubuddu mpatha wi yiirege, <Mootakala ohaavenyiha wEgubuddu, afunaga waapela omwaangoni ni waatolosa mwiilaboni>? Mmaalihe oludduwa weenyu, muhiye yootakala yuubuweleliinyu wa mulogo weenyu. 13Muubuwelele dha Abarahamu, Ezaaki ni Ezarayeli, anamalaba eenyu, ayene mwaalibeleliinyu mwaanyeene, mwiiraga: <Ginoodha gaweenjedhedhe aniinyu wi ekale wona ttendderi dha odhulu. Elabo yaatene elena guuroromelihiimi, ginoodha gaavahe aniinyu wi ekale yeewa malabo maatene> >>.#32.13 Moone Wambeela 22.16-17. 14Vevale Nabwiya ahihiya yootakala eyene yoobuweleliiye wawiirela athu.
Okita wa Mozezi omwaangoni
15Mozezi ahikitaga vamwaangoni agathukulile mmadani mwaaye mabwe meenddi ootopiwa a nipangano no waandana; oolebiwa dhipaddi dhaabiilidhene, osogolo ni mundduli. 16Mabwe ala yaali mabasa a Mulugu; Mulugu mwiinyeene daalebile.
17Zhozuwe veewiligiiye nthapa na athu enyagulaga, ahiiraga wa Mozezi: <<Ohukala nthapa na koddo omisasani>> 18Ahimwaakulaga Mozezi, eeraga: <<Kahuwo nthapa na athu oowodha naari oowodhiwa, mbwenye nthapa nowiiba gineewiimi>>.
19Mozezi agaaddamele omisasani, ahimoonaga nakoro a ng'ombe ole ni wiina wa athu. Ndala oludduwa waaye wahinyahuwa, ahaathathilaga mabwe yaaligi mmadani mwaaye otweya seresere ya omwaangoni. 20Ahithukulaga ng'ombe yasasanyiligiiwa, ovokedha veeko. Ahisilaga, osadduwa nthubi. Nenddo ahilengusa ni mahinje, waang'wiha aEzarayeli. 21Vevale teto, Mozezi ahimukohaga Aroni, eeraga: <<Athu ala wawiirele ddi wi waadhiihele yoothega yuulubalene elena?>>
22Ahaakulaga Aroni, eeraga: <<Ee, nabwiya, muhutakaleliwe ni miyo. Nyoovo muhunona wi athu ala boowiira dhootakala. 23Ndala yahiira wa miyo: <Onisasanyedhe amilugu oonisogolela, mbwenye mulobwana ole, Mozezi, onivenyihile wEgubuddu, kaninonile yego emwiireyele>. 24Teto gahawaaddela wi winna oro akuguule. Yaginkiliiwa, gahivokedha veeko, okumavo teto nakoro ole a ng'ombe>>.
25Vooniliiye Mozezi wi Aroni ahaahiya athu oholowa wi amwiiddani eewa yaateyege, 26Mozezi ahiimelaga odila, wawiithana, wiira: <<Ee! Olene oli a Nabwiya adhe wuno!>> Vevale yahitugumana wa oliye aLeevi aatene. 27Mozezi ahawaaddelaga aliwa, wiira: <<Nabwiya, Mulugu aEzarayeli dinawoga wi: <Kadda muthu asasanye mwaalago waaye. Mvire, vano muwelele teto ovira misasa dhaatedhene, kadda muthu ampege ddibile, mukwaaye ni mwaaddamani aaye> >>. 28ALeevi yahiiragana wona Mozezi mwawogeligiiye. Nlabo nendde yahikwaga mwa mulogo alobwana macikwi maraaru. 29Vevale Mozezi ahiiraga: <<Peeno veva mwihiirana mabasa a Nabwiya, vowi kadda muthu kamwihiyile mwaanaye naari ddibile. Ndala Nabwiya ohuuvahani peeno mareeliho>>.
30Omenseloni wiwa Mozezi ahiwogaga ni mulogo, wiira: <<Nyoovo mwihiirana yoothega yuulubalene. Dhiinova, ginoogwela odhowa wa Nabwiya, ginoodha gilobe okurumuweliwa#32.30 Okurumuweliwa Naari wi: oleveleliwa. yoothega yeenyu>>. 31Mozezi ahiwelelaga wa Nabwiya, eeraga: <<Ee! Ebaribareene mulogo ola ohiirana yoothega yuulubalene, wiisasanyedha weekiiwa amilugu eewa a oro. 32Vano, mwaakurumuwele#32.32 Mwaakurumuwele Naari wi: mwaalevelele. athu eenyu. Dhahikala ndala, ginowuulobani, mugithimihe muniivuru mweenyu mugilebiliinyu>>.
33Vevale Nabwiya ahiwogaga ni Mozezi, wiira: <<Ginoodha gimuthimihe muniivuruni mwaaga muthu oyene onagithegela. 34Vano, dhowa, osogolele mulogo wewo guwaaddeliimi. Mungero aaga onoodha akale osogolo waawo. Mbwenye wafiya mudhidhi, ginoodha gawoonihe goyi mwaha wa yoothega yeewa>>.
35 Nabwiya ahidhiiha mulili wa mulogo vowi wahimuthongela Aroni omusasanya nakoro a ng'ombe ya oro.
Currently Selected:
Okuma 32: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
