Okuma 34

Nabwiya onomulamula Mozezi wi awelele omwaangoni

1 Nabwiya ahiwogaga ni Mozezi, wiira: <<Waaparule mabwe meenddi wona alene owambeela vano ginoodha gilebevo madhu mamohive alene yaaligi vamabweni owambeela waapwesiliiwe. 2Wiisasanyedhe wi menselo bebehi ogwele oMwaangoni Sinayi, ogijejihege vadhulu va mwaangoni vevo. 3Kakalevo oneere agwele ni weevo, kakalevo teto oneere aaddamele mwaango naari kakalevo oneere ajihewo mabila naari ng'ombe>>. 4Nuwindo Mozezi ahaaparulaga mabwe meenddi owi aalene owambeela. Vavenyiligiiye bebeheene, ahigwelaga oMwaangoni Sinayi, wona Nabwiya mwamulamuleliiye, agathukulile mundadani naaye mabwe meenddi owaaparula.

Mulugu onowoga ni Mozezi omwaangoni

5 Nabwiya ahikitaga mmuraboni, wiimela vevale ni Mozezi vano ahivuwihaga ndina naaye wi di Nabwiya. 6Nabwiya ahiviraga vakukuuve vaaligi Mozezi, akuwaga, eeraga: <<Gili Nabwiya, gili Nabwiya; gili Mulugu a thagaraga, a mahala, oohaaguva otakaleliwa, oodhivelesesa ni oororomeleya. 7Odhivela waaga onoofiyedha wa anamabaliwelamo macikwi ni macikwi. Ginowaakurumuwela oopahuwa, oohiiwelela ni dhoothega, mbwenye ginowaalaga oothega. Ginowaalaga alene ofiyedha wa aniiwa, ni aniiwa teto>>.

8Mowaaguva Mozezi ahikokoraga omuthithimihaga Nabwiya, 9eeraga: <<Nabwiya, gakalana mahala ni nyo, munisogolele. Naari mulogo ola ogali wooddiyamaru, mukurumuwele opahula weehu ni othega weehu, munithukule nikale mulogo weenyu>>.

Mulugu onowelela nipangano no waandana waaye

(Deteronomiyo 7.1-5)

10 Nabwiya ahiiraga: <<Woone ginosasanya nipangano no waandana vaari va mulogo waawo waatene. Ginoodha giirena dhootikiniha dhihinaabihege wiireya elabo yaatene ya vati, naari mwa malogo maatene. Athu aatene enakaliiwena munodha moone mabasa a Nabwiya, vowi ginoodha giirena dhowoopiha ni weevo. 11Wiiwelele dhedho ginoolamuleliimi peeno. Veva ginoodha gawiigare osogolo waawo aAmori, aKanani, aHeti, aPerezi, aHevi ni aZhebusi. 12Pole-pole kusasanye nipangano no waandana ni malogo alene a elabo eyene onadhowiiwe wi ohumorele mukogweni mweewa. 13Mpwese maburo eewa a mukutho, mwaapwese amilugu oosemiwa, mwaakakathe abodho a Axera mulugu eewa.#34.13 Abodho yaali maburo mwamweebedhiiwa mulugu amwihiyana eeriwa Axera. 14Ohunaalaba amilugu amohi, vowi Nabwiya winna ndina na <Aje>, di Mulugu a aje, kanaarumeedha amilugu amohi. 15Pole-pole kusasanye nipangano no waandana ni malogo a elabo eyene. Weerena ndo, mwa mudhidhi aliwa vinararuwigiiwa ni amilugu eewa, okutha mukutho wa aliwa, athu ala enoodha yuwiithaneni, nyo munoodha mudhowe mwaje dha mukutho dheewa. 16Nyo munoodha mwaatelihege azombwe eenyu anamwali eewa. Anamwali eewa yeeragana mararuwo ni amilugu eewa teto enowawiiriha azombwe eenyu wi eraruwege ni amilugu alena. 17Mwihiisasanyedhe amilugu oohaniwa.

Mathanga malubale ni malamulo mamohi

(Okuma 23.14-19; Levitiku 23.4-21; Deteronomiyo 16.1-17)

18<<Mwiiregena Mathanga a Mikaathe dhoohuhela emela. Malabo matanu nameenddi ojege mikaathe dhoohuheliwa emela wona guuthongeliimi. Mwiiregena mweeri wowambeela vowi bu oyene wakumiliiwe wEgubuddu.

19<<Dhowambeela obaliwa dhaatedhene dhapogo saaga: athu, ng'ombe, ni mabila. 20Oneerege omoobola buuru owambeela obaliwa ni nibila. Waahifunaga omoobola ompege. Wawoobolege teto anaawo anaalobwana aatene owambeela obaliwa.

<<Kakalevo oneere adheege wa miyo ahithukulile yego>>.

21<<Malabo matanu nammohi onoodha olaba mabasa aawo, mbwenye nlabo na neetanu nameenddi ovume, naari ogali mudhidhi wa olima, naari mudhidhi woohadda ovume.

22<<Mwiiregena Mathanga a Namulibu a tirigu, mwiiregena teto Mathanga a Dhoohadda omamalelo wa yaaka.

23<<Dila dhenda thaaru vayaakani anaalobwana eenyu aatene yooneyelege wa Nabwiya, mwiinya a dhaatedhene, Mulugu aEzarayeli. 24Vowi ginoodha gawiigare malogo osogolo waawo wi gunnuwihe elabo yaawo. Mudhidhi oyene munaagweligiinyu vameentoni va Nabwiya Mulugu eenyu, dila dhenda thaaru vayaakani, kadha akalavo oofuna oliga elabo yeenyu.

25<<Waakuthaga mukutho wa mwazi ohudheegena mikaathe dhinna emela. Naari ohuhalege mukutho wa Paxkwa mahiyu maatene ofiyedha obebehini wiwa.

26<<Odheegena mu nyuba ya Nabwiya Mulugu aawo namulibu a dhoohadda dha mwiilaboni.

<<Ohumpiyege mwaana mbuzi ni mukaka wa amaaye>>.

27 Nabwiya ahiwogaga teto ni Mozezi, wiira: <<Olebe madhu alena, vowi mwa alena gihisasanya nipangano no waandana ni weevo, vamohi ni aEzarayeli>>. 28Mozezi ahikalaga ni Nabwiya malabo makumi mannayi mahiyu ni mutana, Mozezi kaaja, naari ong'wa. Ahilebaga vamabweni owaaparula madhu a nipangano no waandana eli malamulo kumi.

Kove ya Mozezi enowaara

29Akitaga Mozezi oMwaangoni Sinayi, aganna mundadani naaye mabwe meenddi a nipangano no waandana, oliye kaanonilege wi kove yaaye yoowaraga mwaha wa owoga ni Nabwiya. 30Aroni ni aEzarayeli yegi omoona Mozezi, kove yaaye yaaraga, vano yoomoovaga omwaaddamela. 31Ndala Mozezi ahimwiithanaga Aroni ni apogo aatene a mulogo odha wa oliye, ahiwogaga ni aliwa. 32Vevale yahidhaaga aEzarayeli aatene, vano Mozezi ahaalamulelaga dhaatedhene Nabwiya dhawogiliiye oMwaangoni Sinayi. 33Aamaalagave Mozezi owogaga ni aliwa, owiikuneelesa ni guwo kove yaaye. 34Mbwenye Mozezi aavolowagave owoga ni Nabwiya, oovenyihawo guwo. Aakumagave owawaaddela aEzarayeli dhedho dhalamuleliwiiye. 35AEzarayeli yegi omoona Mozezi aganna kove yowaara. Oowelela wiikuneela ofiyedha teto owoga ni Nabwiya.

Currently Selected:

Okuma 34: tke

Highlight

Copy

Compare