Okuma 22
22
Gano ya yego ya mwiinya
1<<Muthu eeya ng'ombe naari nibila, apa naari aguliha, vamburoni va ng'ombe emohi alivege ng'ombe tanu, vamburoni va nibila nimohi alivege mabila mannayi.
2<<Muthu amfwanya muliba wiiya agujulaga nyuba, emuddwadha akwa, muliba ompa kanakalana muladdu wovuuviha mwazi. 3Mbwenye akala mutana, onokalana muladdu.
<<Muthu eeya, awelihege dhego dhaatedhene. Aahikalana yooliva onoodha agulihiwege mwiinyeene wi alive ele yiiyiliiye. 4Eyene yeeyiliiye yafwanyiwa yameentweene, akala ng'ombe, naari buuru, naari nibila, oneere awelihe biili wa eyene yeeyiliiye.
5<<Muthu aajihaga aneenyama aaye, elupela mmiddani mwa mukwaaye, dhinoonga dhilo, onoodha alivege ni dhilo dhookwaranya dha mmiddani mwaaye.
6<<Muthu ahiddiha munddo, olupa, otadeya, opaha dhilo naari mudda wa mmohi, muliba ohiddiha onoodha alivege dhilo dhaatedhene dhedho dhizhile ni munddo.
7<<Muthu amwinka mukwaaye korowa naari dhego dhimohi wi alogolele, dhiiyiwa, ahiddiwa muliba wiiya, onoodha alivihiwege dila biili. 8Aahihiddiwa muliba wiiya, veva muliba ologolela dhego nde onoodha adhowiwegena vamburoni va Mulugu wi akohiwe akala ohuthukulavo yego.
9<<Yego eyene enakanganeliwa, ng'ombe naari buuru naari nibila naari guwo naari yego emohi yoorimeela, eyene muthu mmohi, eneeriiye, wi: <Ela saaga>, mmohi teto, eeraga: <Saaga>, edhowiwegena wa aliba othonga vamburoni va Mulugu. Oyene Mulugu oneeriiye amfwanyena mwaha, onoodha alivege dila biili.
10<<Muthu amwinkelela mukwaaye buuru, ng'ombe, nibila, naari mwaneenyama mmohi, ole akwa, naari aporeya, naari athukuliwa, ahikalavo omoonile 11veva onoodha okalevo omulibela Nabwiya mmohi ni mukwaaye wi kathukulileve yego yamukwaaye. Mwiinya arumeedha, muladdu kunakalavo. 12Mbwenye akala kaamukameele ebaribareene wiire wiiyiwa, amulive mwiinya. 13Enahiddiwa ni mwaneenyama ooguwa, aadhena makuvaya, veva muladdu kunakalavo.
14<<Muthu amboliha mukwaaye mwaneenyama, aporeya naari akwa mwiinya ahilivo, onoodha amulive mwiinya. 15Mwiinya akala vevo, kanaliviwa. Akala ambolihihege ni korowa, yoolivelaya eneere ekale elene.
Gano ya mukalelo wa athu
16<<Muthu amunyengetha namwali, ohumunonile mulobwana, naari ohuthomeliwe, agonana, vano alivege teto korowa dha omvalulana, amuthukule akale mwihiyanaaye. 17Ababe yahirumeedha ovaluliwa wi amuthukule, onoodha alive korowa wona enaliveliwa namwali ohumunonile mulobwana.
18<<Mukwiri ahikalewo, akwe. 19Muthu oomurarusa mwaneenyama, akwe ebaribareene. 20Oyene oneere akuthe mukutho wa amilugu amohi woohukala wa Nabwiya, onoodha atolosiwe.
21<<Ohumukubanyihe naari omooniha goyi namadha, vowi mwaali anamadha mwiilaboni ya wEgubuddu. 22Muhaakubanyihege amaamukwele naari anakwaadhuni. 23Mwaakubanyihaga mwawoonihaga goyi ayene yuundda wa miyo, ginoodha gawiiwe aliwa. 24Oludduwa waaga onoodha onyahuwe vano ginoodha gaape ni mwaalago. Ahiyana eenyu enoodha ekale amaamukwele ni aana eenyu ekale anakwaadhuni.
25<<Wafiyaariha korowa wa athu aaga, wa muliba oorabula oli ni weevo, ohujejihedhe owelihedhiwa ni yoweenjedhedhavoya. 26Wathukula yoowara ya mukwaawo wona yoohiddeelela, naari ahilivile omuwelihedhege yoowara yaaye nduwa nihinadhowe. 27Vowi oneekuneelana eyene. Oneere agone avi? Akuwa wa miyo ginoodha gimwiiwe vowi gili oweeddiwa thagaraga.
28<<Kumunyemule Mulugu naari omudduba musogoleli a mulogo waawo. 29Kuribeliwe odhiiha yooveleela ya dhoovaha dhapama dhoohadda ni dha mmiddani mwaawo. Mugiveleelele teto aniinyu owambeela obaliwa. 30Mwiiregena emodha-modhave teto ni ng'ombe dheenyu ni mabila eenyu, munoodha mugiveleelele; yabaliwa emalege malabo matanu ni meenddi egali ni mmeenya, nlabo na neetanu nathaaru mugiveleelelege.
31<<Mwiveleelege wa miyo okala athu oweelihiwa; kammujege mwaneenyama apiwa ni aneenyama ooguwa. Ela mwaavahege anabwa.
Currently Selected:
Okuma 22: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
