Okuma 23

Gano dha othonga

1<<Ohiirele onamoona wooratha, ohumukamihedhe muthu othegile omwiirelaga onamoona wootakala. 2Ohaarumeedhele athu owiinjiva wi waahare yadhowaga wiira yootakala. Naari kwiirele onamoona yego ehiireyile, waarumeedhelaga athu ale yakoromanihaga onamoona mooratha. 3Ohukoromanihe muladdu wi omudhivelihe muthu oorabula.

4<<Wafwanya ng'ombe naari buuru a mwiiddani aawo egaholowile, oveleele wa mwiinya. 5Wamfwanya buuru a muthu onooharahara agatongwile, akokora, omukamihedhe omvenyihe.

6<<Ohukoromanihe muladdu wa muthu aawo omwiirelaga orabula. 7Ohiye wawiinkedha athu. Ohuthonge wi apiwe muthu ahinna muladdu naari vihili ebaribari, vowi kagidha gimulevelela oyene winna muladdu. 8Kurumeedhege onyingaliwa, vowi onowaapiba athu wiintoni, otakaliha muladdu wa ebaribari.

9<<Ohumurabulihege namadha, vowi nyoovo teto mwaali anamadha mwiilaboni ya wEgubuddu, vano muhunona dha okala wiwa.

Gano dha ovuma

(Levitiku 25.1-7; 23.3)

10<<Yaaka tanu nammohi odhalege ni ohadda dhoolima dhaawo. 11Mbwenye yaaka ya neetanu nabiili, ohiye wi theya evume ohulime, dhahalamo pwedheyela, athu oorabula efwanyegemo dhooja, naari teto aneenyama. Ndo wiiregena midda dhaawo ni dhoodhala dhaawo.

12<<Malabo matanu nammohi ohiddege mabasa aawo, mbwenye na neetanu nabiili ovumege. Teto ovumihege ng'ombe dhaawo ni abuuru aawo wi dhikalena kopolo dhixa, mwiimeleli a mulogo waawo ni namadha.

13<<Mukale owiiwelela mwa dhaatedhene guwaaddeliimini. Ohuromoleve ndina na amilugu amohi naari wawuubuwelela.

Mathanga malubale maraaru

(Okuma 34.18-26; Levitiku 23.4-21, 33-44; Deteronomiyo 16.1-17)

14<<Vayaakani othabelege mathanga maraaru: 15Okameelege Mathanga a Mikaathe Dhoohuheliwa Emela. Malabo matanu nameenddi ojege mikaathe dhoohuhela emela, wona goolamuleliimi. Wiiregena mudhidhi githomiliimi mweeri wa Abibi,#23.15 Abibi mweeri wa Abibi wambeela vakukuuve omagomelo wa mweeri wa Marusu ni omambeelelo wa mweeri wa Abirili, mudhidhi woohadda dhilo waaddamelaga. vowi bu oyene wakumiliiwe wEgubuddu. Kakalevo oneere adhaaga wa miyo athukulaga yego. 16Okameelege mathanga a namulibu wa dhendo wadhaliliiwe mmiddani. Okameelege teto mathanga mamohi a dhoohadda dha vayaakani a dhoovaha dhaatedhene. 17Alobwana aatene edheege emweebedhege Nabwiya, mwiinya a dhaatedhene, dila thaaru vayaakani.

18<<Waakuthaga mukutho wa mwazi malabo a mathanga oohiyana-hiyana, ohudheegena mikaathe dhinna emela. Naari yoonuna ehihalege mahiyu maatene ofiyedha obebehini wiwa.

19<<Odheegena mu nyuba ya Nabwiya Mulugu aawo namulibu a dhoohadda dha mwiilaboni. Ohumpiyege mwaana mbuzi ni mukaka wa amaaye.

Mungero a Nabwiya

20<<Ginomuruma mungero wi oosogolelege ni wuukamihedha mundila, mwaatemwene ofiyedha niburo nenddo guusasanyedhiimi. 21Omvuruwanege ni omwiiwelela ohumvaanyege, vowi oliye onalaba mu ndina naaga kadha alevelela dhoothega dheenyu. 22Mbwenye weewelelave madhu aaye ni wiirana dhaatedhene dhedho guwaaddeliimi, ginoodha gikale mwiiddani a amwiiddani aawo, ni waaliga ayene enooliga. 23Mungero aaga onoodha akale ni weevo, vano onoodha oosogolelege elabo ya aAmori, aHeti, aPerezi, aKanani, aHevi ni aZhebusi. Miyo ginoodha gaape aliwa. 24Va mwaha ola kamwaalabege#23.24 Moone Okuma 20.5. amilugu eewa naari waakokorela ayene, ohuhiddegeve mabasa eewa. Waabwanyule ayene aatene teto waapwese abodho oweela eewa.

25<<Omulabege Nabwiya Mulugu aawo, vano oliye onoodha areelihe mukaathe waawo ni mahinje aawo oong'wa, onoodha teto avenyihevo dhoovoreya dhaawo. 26Mwiilaboni mwaawo kadha akalamo mwihiyana onaathathilege, naari oohubala. Onoodha ologele mwiilaboni. 27Ginoodha gawoopopihe athu aatene a mwiilaboni eyene oneeriiwe ovolowemo, vano amwiiddani aawo aatene enoodha ewelele mundduli. 28Ginoodha girumihe dhowoopiha wi dhawiigarege mwiilaboni mu aHevi, aKanani, ni aHeti, wawoonaga. 29Kaginawiigaremo aatene yaaka emohive wi ehihale elabo muhumagiwe teto wi aneenyama ooguwa ehirelanemo okwaranya weevo. 30Vang'ono-vang'ono gineerege wawiigara, ofiyedha murelane muthukule elabo yaatene ekale yeenyu. 31Ginoodha gitale munddile dhaawo wambeela Nyaza Yoofiila ofiyedha nyaza ya wa aFilisti, vano teto wambeela wiiddeddereni ofiyedha mwihinje Ewufarati. Ginoodha gaaveleele mmadani mwaawo athu emagilemo wi wawiigaremo. 32Ohaandane ni aliwa naari amilugu eewa. 33Aliwa ehimage mwiilaboni mwaawo wi ehuuthegihe; waalabave amilugu eewa onoodha oholowe>>.

Currently Selected:

Okuma 23: tke

Highlight

Copy

Compare