Okuma 21

Gano dha adhaari

(Deteronomiyo 15.12-18)

1<<Gano dhineeriiwe wawaaddelege si nda: 2Muthu amugula mudhaari a muHeberi, aakwanihege yaaka tanu nammohi alabaga. Mbwenye yaaka ya neetanu nabiili amutapulege odhaari waaye vano ahimulivihege. 3Akala avolowile odhaari agali muddiye, atapuliwege agali muddiye. Akala ahitela, atapuliwege teto odhaari waaye ni mwihiyanaayene. 4Nabwiya aaye amwinka mwihiyana, aabalana ahima anaalobwana ni anaahiyana, nlabo noomala odhaari waaye, mwihiyanaaye ni ahima enaakalege a nabwiya aaye, mbwenye oliye akume yeeka. 5Mbwenye mudhaari ole awoga, eera: <Miyo ginamfuna nabwiya aaga, vamohi teto mwihiyanaaga ni anaaga, kaginafuna okuma muudhaarini>. 6Ndala nabwiya aaye amudhowihe vamburoni va Mulugu. Egafiyile, nabwiya aaye onoodha amutorole nibaru ni perepeso vamulago naari vamavolowelo, vano ndo onaakale mudhaari aaye malabo maatene.

7<<Muthu amuguliha mwaanaye a mwaana-mwihiyana wi ateliwe,#21.7 Wale yaali elemeelelo ya abaabi oorabula waagulihaga aniiwa anaahiyana wa alobwana ooreela wona ahiyaniiwa. ola kanakuma wona vinakumeliiwa adhaari anaalobwana. 8Eera ahimuhagalalihaga nabwiye, oliye ahimurumeedha omutela, nabwiya aaye amwihiye wi amudhi aaye emoobole. Ahimugulihedhe teto muthu mmoheene, eera ndo ohumunyoza. 9Mbwenye eera wi ateliwa ni mwaana a nabwiya aaye, akamihedhiwege wona mwaana a vaade vevo. 10Avalaanya, ahimunyozege mwihiyana owambeela ole, naari omwaaka dhoowara ni dhooja dhaaye, amvahege dhoofwaneelela wona mwihiyanaaye. 11Ahimwiirelaga dhego dhedhi thaaru, mwihiyana ola onoodha avenyemo muudhaarini waaye ahimulivile korowa nabwiya aaye.

Gano dha athu oowali

12<<Muthu amporosa mukwaaye, akwa, ole omporosile mukwaaye akwe teto. 13Mbwenye ampa moohufuna, akala di Mulugu orumeedhele wi akwe, muliba ompa athawele elabo gineeriimi gitoonye. 14Ampa mukwaaye yapudha mootakaleliwa, naari agathaweleve omburoni wa mukutho, athukuliwegewo wi apiwe.

15<<Ole onamporose babe naari maaye, ola teto apiwe. 16Ole onamwihidda mukwaaye wi amugulihe naari omwiira mudhaari aaye, ola teto apiwe. 17Ole onamudduba babe naari maaye, ola teto apiwe.

18<<Yeera wi athu abiili ewanaga, mmohi amporosa mukwaaye ni nibwe naari ni madada, ola aahikwa, mbwenye abulelaga, 19ayila eeddaga ni mukogodho, muliba omporosa kanakalana muladdu mulubale. Mbwenye alive malabo alene yaliiye voolilini, vano amukamihedhe wi ayile pama.

20<<Muthu amuddwadha ni emiri mudhaari aaye a mulobwana naari a mwihiyana, ofiyedha ompa, ola teto oonihiwege goyi. 21Mbwenye eera amala malabo meenddi naari maraaru abulelaga, muliba oddwadha kanoonihiwege goyi vowi diyeleele korowa dhaaye.

22<<Yiira alobwana ewanaga, emporosa mwihiyana a wari, oliye abala mwaha wooddwadhiwa, ehipadduwavo yego yootakala, aliba omuddwadha enoodha emulive korowa muliba mwihiyana vinafuneliiye. Enoodha emulive wona munapimele anamathonga. 23Mbwenye yeera epadduwavo yego emohi yootakala, ndala vinoodha vikale oliva egumi ni egumi, 24niinto ni niinto, niino ni niino, ndada ni ndada, nnyalo ni nnyalo, 25ampaha, ni oliyeene teto apahiwege, aporosa, ni oliyeene teto aporosiwege, amuddwadha ni oliyeene teto addwadhiwege.

26<<Muthu ampwesa niinto mudhaari aaye a mulobwana naari a mwihiyana, ahoonaga, ola amutapule odhaari waaye wi adhowege mwaha wa niinto naaye. 27Eera wi ni owali waaye muthu amukula niino mudhaari aaye, ola amutapule odhaari waaye wi adhowege mwaha wa niino naaye nikuliwe.

Gano dha aneenyama owaafuwa oowali

28<<Ng'ombe emulata ni manyaga mulobwana naari mwihiyana akwa, ng'ombeya evonyiwe ni mabwe ofiyedha ekwe, mbwenye ehitakuniwe. Mwiinya kanakalana muladdu. 29Mbwenye yeera wi ng'ombeya mwiinya aganonile wi enowaalatesa athu ni manyaga, ahimagelela, empa muthu, mulobwana naari mwihiyana, ng'ombeya evonyiwe ni mabwe, mwiinyaya teto apiwe. 30Mbwenye alamuliwa wi eyoobole, vamburoni va okwa onoodha alive dhego dhedho dhinaathongeliwiiye oliva. 31Ng'ombe yamulata ni manyaga mwaana-mulobwana naari mwaana-mwihiyana, ng'ombeya vamohi mwiinya oneere othongiwa mooligana ni mukalelo mmohive wa nlamulo ndde. 32Ng'ombe yamugudhula mudhaari a mulobwana naari a mwihiyana, onoodha aliviwe mpimo wa korowa#21.32 Mpimo wa korowa Mpimo ola weethaniwa siikulu malabo awale; wanyemela vakukuuve garama kumi. makumi maraaru dha parata wa mwiinya a adhaari vano ng'ombeya enoodha evonyiwe ni mabwe efiyedhe okwa.

33<<Muthu atiba muliddi ahivuhelela, emorelamo ng'ombe naari buuru, 34muliba otiba onoodha alivege korowa wa mwiinya a mwaneenyama ookwa ole, mwaneenyama ole akalege a muliba muliddi.

35<<Ng'ombe epa ekwaaye, egulihiwege. Korowadha egawanege ni muliba ng'ombe epiwe. Ng'ombe ekwile, egawaniwe teto. 36Mbwenye ng'ombeya epile ekwaaye akala yahinoniwa wi yaali yoowali, vano mwiinya ohiyile yapudha ahimagelela, ola onoodha alivege ni ng'ombe yameentweene. Ele ekwile ehale ni muliba oliva.

Currently Selected:

Okuma 21: tke

Highlight

Copy

Compare