Okuma 20

Malamulo kumi

(Deteronomiyo 5.1-21)

1Mulugu ahiwogaga madhu maatene ala, eeraga:

2<<Miyo gili Nabwiya, Mulugu aawo, guuthukule mwiilaboni ya wEgubuddu wewo waaliiwe mudhaari.

3<<Ohukalena mulugu mmohi, ahili miyo.

4<<Ohiisasanyedhege engamuthu yoosemiwa, naari yoofwanafwaniha emohi ya yego eli odhulu, naari va elabo ya vati, naari dha mmahinjeni vati va elabo. 5Ohukokorelege dhedho naari weebedha; vowi miyo gili Nabwiya, Mulugu aawo, Mulugu ahaje. Ginowawooniha goyi ayene enagithegela ofiyedha wa ahima, a aniiwa teto ni aniiwa. 6Mbwenye ginowawooniha odhivela waaga woororomeleya wa athu ajinji#20.6 Wa athu ajinji Naari wi: ofiyedha wa anamabaliwelamo ooheelengeya. enagifuna ni ohariha malamulo aaga.

7<<Kuromolege ndina na Nabwiya, Mulugu aawo ebeweene, vowi Nabwiya onomooniha goyi oyene onaromola ebeweene ndina naaye.

8<<Wuubuwelege weeliha nlabo noovuma.#20.8 Nlabo noovuma Mwa aEzarayeli naali nendde nneeriihu nlabo nooweruwa, naari wi sabuddu. 9Malabo matanu nammohi ohidde ni omariha mabasa aawo maatene. 10Mbwenye nlabo na neetanu nabiili thi nlabo noovuma na Nabwiya, Mulugu aawo. Kuhiddege mabasa: naari weevo, naari mwaanawo mwaana-mulobwana naari mwaana-mwihiyana, naari mwiimeleli aawo a mwaana-mulobwana ni a mwaana-mwihiyana, naari aneenyama aawo naari namadha onakala ni we. 11Sowi mwa malabo matanu nammohi Nabwiya ahisasanya dha odhulu ni dha elabo ya vati, nyaza ni dhaatedhene dhili mwemo, vano ahivumaga nlabo na neetanu nabiili. Vowindala Nabwiya ahireeliha nlabo ndde wi nikale noweela.

12<<Waariihege ababo ni amaayo wi malabo aawo yinjive mwiilaboni Nabwiya, Mulugu aawo yuuvahiliiye.

13<<Kumpe muthu.

14<<Kuraruwe.

15<<Kawiiye.

16<<Kumwiinkedhe mukwaawo.

17<<Kukalelege nrima nyuba ya mukwaawo. Kumukalelege nrima mwadha mukwaawo, naari mwiimeleli aaye a mwaana-mulobwana, naari a mwaana-mwihiyana, naari ng'ombe yaaye, naari buuru aaye, naari yego emohi ya mukwaawo>>.

Woova wa mulogo

18Athu aatene yowiiwaga okukuma ni dari, ni oruma wa palaza, yahoonaga teto mwaango othuwaga mwiisi. Vooniligiiwa yahoovaga, othawa okala woolapela. 19Yahiwogaga ni Mozezi, wiira: <<Nyoovo muwogege ni hiyo nneerege wuwiiwani. Mbwenye Mulugu ahiwogege ni hiyo nnokwa>>.

20Mozezi ahaakulaga, wiira: <<Kamoove. Mulugu ohudha wa nyoovo wi oweeheni, mmoovege wi muhuthegege>>. 21Athu yaaligi woolapelawene; mbwenye Mozezi ahaaddamelaga vamuraboni wooriba vale vaaligi Mulugu.

Malamulo a ebuwa ya mukutho

22 Nabwiya ahiwogaga ni Mozezi, wiira: <<Wawaaddele ndala aEzarayeli, wiire: Muhoona wi miyo gihiwoga ni nyoovo odheela odhulu. 23Muhugifwanafwanihe ni amilugu amohi. Muhaasasanyege amilugu a parata naari a oro. 24Mugisasanyedhele ebuwa ya theya vookutha mukutho weenyu, vevo muneerigiinyu musasanyegevo dhooveleela dheenyu dha mabila ni ng'ombe ni ohelavo dhooveleela dha murenddele. Mumburoni mwaatemwene munasakuliimi wi mugeebedhegemo, ginoodha gikale ni nyoovo vano ginoodha guureeliheni. 25Mwaagisasanyedhelaga ni mabwe ebuwa ya mukutho, muhusasanyege ni mabwe oosemiwa, vowi mwavirihavo migogo dhoosemana, munogithegela. 26Muhusasanyege teto voogwela wooviha wi muhooneyege omadave weenyu mwaagwelaga sikaadda>>.

Currently Selected:

Okuma 20: tke

Highlight

Copy

Compare