Okuma 19

Mulugu onowoga ni Mozezi oMwaangoni Sinayi

1AEzarayeli yahifiyaga mwiiddeddereni ya oSinayi nlabo nowambeela na mweeri wa neethaaru egakumile wEgubuddu. 2Vavenyiligiiwa oRefidimi yahimagaga misasa mwiiddeddereni ya oSinayi seresere ya mwaango. 3Mozezi ahivenyaga ogumana ni Mulugu, omwaangoni wewo Nabwiya ahimwiithanaga, wiira: <<Waaddele emudhi ya Yakobo, osorihe wa aEzarayeli, wiire: 4<Mwahoona eyene gawiireliimi wa aEgubuddu, gudhaaganaani wa miyo wona mpungu munaathukuleliiye anaaye mmompeloni. 5Vano mweera mwiiwelelaga madhu aaga, ni waakwanihedha waandana woopangana waaga, veva munoodha mukale athu aageene oosakuliwa wa athu aatene. Elabo ya vati yaatene saaga. 6Munoodha mukale wa miyo a muumweneni wa anamakutha ni mulogo woweela>. Ba alena madhu oneeriiwe wawaaddelege aEzarayeli>>.

7Ahidhaaga Mozezi, wawiithana apogo aatene aEzarayeli, wawaaddeliha madhu maatene Nabwiya yamulamuleligiiye. 8Ndala mulogo waatene wahaakulaga vamohi, wiira: <<Dhaatedhene Nabwiya dhiwogiliiye nnowiirana>>. Mozezi ahimwaaddelaga Nabwiya madhu athu yaakuliligiisu. 9Nabwiya ahiwogaga ni Mozezi, wiira: <<Ebaribareene ginoodha gidhe wa weevo mmuraboni wooriba wi athu yiiwege gawogaga ni weevo wi athu yuuroromelege>>. Mozezi vamwaaddeligiiye Nabwiya madhu a athu aaye, 10Nabwiya ahiwogaga teto ni oliye, wiira: <<Dhowa wa athu, waweelihe peeno ni menselo. Efule dhoowara dheewa, 11ekale owiisasanyedheene, vowi nlabo na neethaaru Nabwiya onoodha akitele wa athu aatene oMwaangoni Sinayi. 12Olebemo munddile wowaapeela mwaango wi athu ehilupe. Wawaaddele, wiire: <Pole-pole wi muhugwele mwaango naari ohidda mwemu mugomeliiwamo. Oyene oneere ahidde onoodha apiwe. 13Onoodha avonyiwe ni mabwe naari ni mathere, mbwenye ahikalevo oneere amwihidde. Naari agali muthu, naari agali mwaneenyama kadha akalawo. Yarumave palaza moodidela, mudhowe omwaangoni> >>.

14Mozezi ahikitaga omwaangoni odhowa wa mulogo weeliha vano yahifula dhoowara dheewa. 15Mozezi ahiwogaga ni athu, wiira: <<Mwiisasanyedhe vowi nlabo na neethaaru, vano kammukahinye mwihiyana>>.

Ogumana wa mulogo ni Mulugu

16Njijiji noomaselo wa nlabo nendde na neethaaru, wahiiweyaga okukuma ni dari; vano vadhulu va mwaango vahikalaga murabo wooriba ni oruma wuulubale wa palaza, vevale athu mmavade mweewa yoogurumelaga. 17Mozezi ahaathukulaga athu mmisanani mwiwa, edhowaga ogumana ni Mulugu, vano yahiimelaga waapeelela mwaango. 18Mwaango wa Sinayi waatene wahikuneeleyaga ni mwiisi vowi Nabwiya ahikitelagavo mwa muunddo; mwiisi waaye wahigwelaga wona mwiisi wa thukutha vano mwaango waatene woothikeyaga. 19Oruma wa palaza wooweenjedhedheyaga. Mozezi awogaga, Mulugu oomwaakulaga mwa okukuma.

20Vookita Nabwiya vaMwaangoni Sinayi ahimwiithanaga Mozezi wi agwele vadhulu va mwaango. Oliye ahigwelaga, 21Nabwiya ahiwogaga ni Mozezi, wiira: <<Okite, wawaaddele athu wi ehilupe munddile efunaga ogoona, vowi yeera ndo enoodha etolowe. 22Anamakutha ayene enagaaddamela, yiyeelihe wi miyo Nabwiya gihaape>>.

23Vevale Mozezi ahiwogaga ni Nabwiya, wiira: <<Athu kidha egwela vaMwaangoni Sinayi, vowi nyoovo mwahinaaddela, mwiiraga: <Mweelihe mwaango, osasanyedhe munddile wowaapeelela> >>.

24 Nabwiya, ahiwelelaga owoga, eeraga: <<Okite, weera ndo ogwele weevo ni Aroni. Mbwenye anamakutha ni athu, ehilupe munddile efunaga ogoona, wi gihaape>>. 25Mozezi ahikitelaga wa athu, wawaaddela dhaatedhene dhedhi.

Currently Selected:

Okuma 19: tke

Highlight

Copy

Compare