Okuma 18
18
Zhetero onomweeddela Mozezi
1Zhetero, muliba a mukutho a oMidiyani, mooyaaye Mozezi, ahiiwaga dhego dhaatedhene Mulugu dhamwiireliiye Mozezi ni aEzarayeli athu aaye, Nabwiya mwaavenyiheliiye wEgubuddu. 2Zhetero, mooyaaye Mozezi, ahimudhaagana Zipora mwadha Mozezi, oyene amwihiyiligiiye owani. 3Ahaadhaagana teto anaaye abiili, ayene mmohi eethaniwa Geresomi (sowi namadha a wewo) vowi Mozezi ahiira: <<Gaali namadha mwiilaboni ya amohi>>, 4mmohiwa teto Eliyezeri (sowi Mulugu aaga dinagikamihedha) vowi ahiira: <<Mulugu a ababa digikamihedhe, vano digivulumuse wa mwaalago wa Farawo>>.
5Ahifiyaga Zhetero mooyaaye Mozezi egali vamohi ni ahima a Mozezi ni mwihiyanaaye. Yahimfwanyaga Mozezi mwiiddeddereni vamusasani waaddamela mwaango wa Mulugu. 6Ahimwiithanihaga Mozezi, wiira: <<Miyo, mooyaawo Zhetero, gihidha wa weevo ni mwihiyanaawo vamohi ni anaawo abiili>>. 7Mozezi ahivenyaga omuharelaga mooyaaye, omulojela ni nthithimiho, ombezhari, vano eselusanaga mmohi ni mukwaaye, yahivolowaga mmusasani. 8Mozezi ahimwaaddelaga mooyaaye dhaatedhene Nabwiya dhamwiireliiye Farawo ni aEgubuddu, mwaha wa aEzarayeli, ni dhookathamiha dhaatedhene dha mundila, ni mwemo Nabwiya mwanivulumuseliiye.
9Ahihagalalaga Zhetero mwa dhapama dhaatedhene Nabwiya dhawiireliiye aEzarayeli, awoobolaga mmadani mwa aEgubuddu. 10Ahiiraga: <<Nabwiya athithimihiwe, oyene wuwoobolileni mmadani mwa aEgubuddu ni wa Farawo. Nabwiya oyene oobolile mulogo warabulihiwa ni aEgubuddu. 11Ayene yeethukulela wa aEzarayeli. Vano gihinonaga wi Nabwiya ohaakwaranya amilugu aatene>>. 12Ndala Zhetero, Mozezi mooyaaye, ahithukulaga nibila wi akuthe mukutho wa Mulugu teto ni dhooveleela dhimohi. Aroni ahidhaaga ni apogo aatene aEzarayeli wi eje vamohi ni mooyaaye Mozezi vameentoni va Mulugu.
Osakuliwa wa aliba okamihedha
(Deteronomiyo 1.9-18)
13Omenseloni wiwa Mozezi ahikaraatigi wi aathongege athu. Athu yomwiing'anelaga egeemelile momwaapeelela Mozezi, wambeela bebehi ofiyedha nduwa odhowa. 14Agoonile nde mooyaaye, ahimukohaga, wiira: <<Elaya eneereliiwe mulogo ddi? Mwaha bwaddi weevo onakaraatiiwe, vano athu yiimelaga wambeela bebehi ofiyedha nduwa odhowa?>>
15Mozezi ahimwaakulaga mooyaaye, wiira: <<Sowi athu enadha wa miyo wi ewoge ni Mulugu. 16Yakalana muladdu weewa, enadha wa miyo wi gaathongele mmohi ni mukwaaye teto gaatapulele malamulo a Mulugu ni magano aaye>>.
17Vevale mooyaaye Mozezi, ahiiraga: <<Kiriyile eneeriiwe. 18Ginororomela wi onogoma mowaaguva weevo vamohi ni athu alena yinniiwena. Ela eli yoonyemelesesa wa weevo, vano we kunaande wiirana. 19Ndala ogivuruwane yoolaga yaaga, vano Mulugu akale ni we. Owoge ni Mulugu mu ndina na mulogo, othukulelege dhookathamiha dheewa wa oliye. 20Osuuzihege mathongelo ni masuuziho a Mulugu, ononiha dila yapama yoweeddamo, ni mabasa yinniiwana owaahidda. 21Waasakule mwa athu alobwana oofwaneelela, omoova Mulugu, oororomeleya, oohurumeedha onyingaliwa. Waavahe othonga wa athu cikwi (1.000), amohi yaalamulege athu zana (100), amohi athu makumi matanu (50) ni amohi athu kumi. 22Ayene yaalamulege athu alena mudhidhi dhaatedhene. Miladdu dhoorusa edheegena wa we, mbwenye miladdu dhimohi ayene ethongege. Ndala oneerege wona okweya teto eneerege wuukamihedha. 23Weeragana ndo, onoodha waande ebaribareene, vano si eyene Mulugu enafuniiye. Athu ala enoodha ekale mmurenddeleni>>.
24Mozezi ahiiwelelaga madhu a mooyaaye, wiirana ndala wona mwamusuuziheliiye. 25Mozezi ahaasakulaga alobwana oofwaneelela a mwa aEzarayeli aatene, ahaavahaga okala asogoleli a mulogo; asogoleli a athu cikwi (1.000), a athu zana (100), a athu makumi matanu (50), a athu kumi. 26Ala yowaathonga athu nlabo ni nlabo. Miladdu dhoorusa yoodhana wa Mozezi, mbwenye dhaatedhene dhookweya ayene bathonga. 27Ndala ahimpaganyaga mooyaaye Mozezi, owelelaga elabo ya owaniwa.
Currently Selected:
Okuma 18: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
