Okuma 17

Mahinje a vanibweni

(Numero 20.1-13)

1Mulogo waatene wa aEzarayeli wahivenyaga mwiiddeddereni mwa oSini, weeddaga wona Nabwiya mwaalamuleliiye. Yahimagaga misasa niburo na oRefidimi, mbwenye kayaalivo mahinje wi athu eng'wege. 2Mulogo woomunyanyuwelaga Mozezi, wiiraga: <<Onivahe mahinje ning'we>>. Mozezi ahaakulaga, wiira: <<Mwaha bwaddi munaginyanyuweleliinyu miyo? Mwaha bwaddi munamweeheliinyu Nabwiya?>>

3Vevale mulogo ni mwaha wa nthona womwaaba Mozezi, wiiraga: <<Onithukule wEgubuddu wi anipe nthona, vamohi ni ahima eehu ni dhoofuwa dheehu?>>

4Mozezi ahikuwaga wa Nabwiya, eeraga: <<Gawiirena avi athu ala? Ehalile vang'ono ogipa ni mabwe!>>

5 Nabwiya ahaakulaga, omwiirela Mozezi: <<Dhowa, wakale osogolo wa aEzarayeli. Waathukule apogo amohi, othukule mukumbuzo waawo oyene waddwadhiliiwena Nilu, weedde. 6Ginowiimela vameentoni vaawo vanibweni na oHorebi. Oddwadhe nibwe. Mwa nenddo nnookuma mahinje wi athu eng'we>>. Mozezi ahiiragana ndale, apogo a aEzarayeli yoonaga. 7Ahithwaga niburo ndde Masa ni Meriba,#17.7 Masa ni Meriba Masa sowi weeha, Meriba sowi onyanyuwa. mwaha woonyanyuwa wa aEzarayeli teto ni mwaha woomweeha Nabwiya yiiraga: <<Nabwiya oli ni hiyo naari kali ni hiyo?>>

Owana wa Amaleke ni aEzarayeli

8Yahidhaaga aAmaleke ni athu eewa owanaga ni aEzarayeli niburo na oRefidimi. 9Vowindala Mozezi ahimulamulaga Zhozuwe, wiira: <<Waasakule alobwana wi evenye yawane ni aAmaleke. Menselo ginoodha gikale vadhulu va mwaango, vano mukumbuzo wa Mulugu oneere okale mmadani mwaaga>>. 10Zhozuwe ahiiragana ndale wona Mozezi mwamulamuligiiye, vano ahiwanaga ni aAmaleke. Mbwenye Mozezi, Aroni ni Huri yahigwelaga vadhulu va mwaango. 11Mozezi avenyihaga moono waaye, aEzarayeli yowaagonjihaga athu a Amaleke. Aakitihaga, athu a Amaleke yowaagonjihaga aEzarayeli. 12Mozezi agagomile ni moono, Aroni ni Huri yahimukaraatihaga vanibweni. Yahihiddeelaga moono dhaaye, mmohi moono ola, vano mmohiya moono mmohi. Vevale moono dhaaye dhaaligi dhowiimeladhene ofiyedha nduwa odhowa. 13Ndala Zhozuwe ahaagonjihaga aAmaleke ni athu aaye okoddoni.

14Vevale Nabwiya ahiwogaga ni Mozezi, wiira: <<Olebe elena muniivuruni wi ekale yowuubusedha, omwaaddele teto Zhozuwe, wiire: <Ginoodha gaatolose athu a Amaleke, eddiwaaliwe mwiilaboni> >>. 15Mozezi ahisasanyaga ebuwa yoohelavo mukutho, othwa ndina nowi, <<Nabwiya banddeela naaga>>. 16Ahiiraga teto: <<Vowi yahiwana ni Nabwiya,#17.16 Yahiwana ni Nabwiya mu ewogelo ya eHeberi kineeweya pama. Makalelo mamohi ootapulela Venyihani banddeela ya Nabwiya. enoodha ekalewo koddo ya Nabwiya ni athu a Amaleke malabo maatene>>.

Currently Selected:

Okuma 17: tke

Highlight

Copy

Compare